যোৱা সোমবাৰে গাজিয়াবাদ জিলা আৰু সত্ৰ আদালতে ২০০৬ চনৰ বাৰানসী ধাৰাবাহিক বোমা বিস্ফোৰণৰ মূল অভিযুক্ত ৱালিউল্লাহক মৃত্যুদণ্ডৰ শাস্তিৰে দণ্ডিত কৰাৰ পাছত আদালতৰ এই ৰায়ৰ বিৰুদ্ধে উচ্চতম ন্যায়ালয়লৈ যাবলৈ সাজু হৈছে জমিয়ত উলামা-ই-হিন্দ।
জমিয়ত উলামা-ই-হিন্দৰ ৰাষ্ট্ৰীয় সভাপতি মৌলানা আসাদ মাদানীয়ে কয় যে ২০০৬ চনৰ বাৰাণসী ধাৰাবাহিক বিস্ফোৰণৰ গোচৰত ৱালিউল্লাহক প্ৰদান কৰা মৃত্যুদণ্ডক উচ্চ ন্যায়ালয়ত প্ৰত্যাহ্বান জনোৱা হ’ব।
যোৱা দহ বছৰ ধৰি এই গোচৰত ৱালিউল্লাহক মুছলমান সংগঠন জমিয়ত উলামা-ই-হিন্দে আইনী সাহায্য প্ৰদান কৰি আহিছিল।
সাংবাদিকৰ আগত মৌলানা আসাদ মাদানীয়ে কয়, “আমাৰ সম্পূৰ্ণ বিশ্বাস আছে যে তেওঁ শীৰ্ষ আদালতত সম্পূৰ্ণ ন্যায় পাব। এনে বহুতো গোচৰ আছে য’ত নিম্ন আদালতে শাস্তি দিয়াৰ পাছত শীৰ্ষ ন্যায়ালয়ৰ কাষ চপা হৈছিল আৰু ন্যায়ালয়ে ন্যায় প্ৰদান কৰিছিল।”
তেওঁ লগতে কয় যে অক্ষৰধাম মন্দিৰ আক্ৰমণৰ গোচৰত নিম্ন আদালতে তিনিজন লোকক মৃত্যুদণ্ড আৰু চাৰিজনক আজীৱন কাৰাদণ্ড প্ৰদান কৰিছিল যদিও উচ্চতম ন্যায়ালয়ে তেওঁলোকক নিৰ্দোষ সাব্যস্ত কৰিছিল আৰু আৰক্ষীক ভৰ্ৎসনা কৰিছিল।
জমিয়ত উলামা-ই-হিন্দে এই ক্ষেত্ৰত প্ৰয়োজনীয় আইনী সহায় আগবঢ়াইছিল। গতিকে ৱালিউল্লাহৰ ক্ষেত্ৰতো উচ্চতম ন্যায়ালয়ে সঠিক সিদ্ধান্ত গ্ৰহণ কৰিব বুলি মাদানীয়ে আশা প্ৰকাশ কৰিছে।
উল্লেখ্য যে সুদীৰ্ঘ ১৬ বছৰৰ পিছত ২০০৬ চনৰ বাৰানসীত সংঘটিত ধাৰাবাহিক বোমা বিস্ফোৰণৰ মূল অভিযুক্ত সন্ত্ৰাসবাদী ৱালিউল্লাহ খানক যোৱা সোমবাৰে গাজিয়াবাদ জিলা আৰু সত্ৰ আদালতে ফাঁচীৰ আদেশ প্ৰদান কৰিছিল।
২০০৬ চনৰ ৭ মাৰ্চত বাৰানসীৰ সংকট মোচন মন্দিৰ আৰু সেনা নিবাস ৰেল ষ্টেচনত হোৱা বিস্ফোৰণত ২৮ জন নিহত হোৱাৰ লগতে ১০০ ৰো অধিক লোক আহত হৈছিল।
সেই দিনটোত সন্ধিয়া ৬.১৫ বজাত সংকট মোচক মন্দিৰৰ ভিতৰত প্ৰথম বিস্ফোৰণ সংঘটিত হয়। ১৫ মিনিটৰ পিছতে বাৰানসী সেনানিবাস ৰেল ষ্টেচনৰ প্ৰথম শ্ৰেণীৰ বিশ্ৰাম কক্ষৰ বাহিৰত আন এটা বোমা বিস্ফোৰণ হয়।
একেদিনাই এখন আৰক্ষী থানাৰ ৰে’লৱে ক্ৰছিংৰ ৰেলিঙৰ ওচৰত আৰু দশশ্বমেধ ঘাটত বিস্ফোৰক সামগ্ৰী উদ্ধাৰ হৈছিল।
বিস্ফোৰণৰ তদন্ত কৰি থকা বিশেষ টাস্ক ফ’ৰ্চে ২০০৬ চনৰ এপ্ৰিল মাহত ৱালিউল্লাহ এই বিস্ফোৰণৰ মাষ্টাৰমাইণ্ড বুলি দাবী কৰিছিল। লগতে টাস্ক ফ’ৰ্চে ৱালিউল্লাহ বাংলাদেশৰ এটা সন্ত্ৰাসবাদী গোট হৰকত-উল-জেহাদ আল ইছলামীৰ সৈতে জড়িত বুলিও দাবী কৰে।
২০০৬ চনৰ ৫ এপ্ৰিলত আৰক্ষীয়ে এই গোচৰটোৰ সন্দৰ্ভত লক্ষ্ণৌৰ গোচাইনগঞ্জ অঞ্চলৰ পৰা এলাহাবাদৰ ফুলপুৰ গাঁৱৰ বাসিন্দা ৱালিউল্লাহক গ্ৰেপ্তাৰ কৰে।
বাৰানসীৰ অধিবক্তাসকলে ৱালিউল্লাহৰ হৈ গোচৰটোত অংশ ল’বলৈ অস্বীকাৰ কৰিছিল। ইয়াৰ পিছতে উচ্চ ন্যায়ালয়ে গোচৰটো গাজিয়াবাদ জিলা ন্যায়াধীশৰ আদালতলৈ স্থানান্তৰ কৰে।
ৱালিউল্লাহৰ লগতে এই বোমা বিস্ফোৰণৰ গোচৰত আন চাৰিজন অভিযুক্তকো তদন্তকাৰী দলটোৱে চিনাক্ত কৰিছিল। ইয়াৰে তিনিজন ক্ৰমে মুস্তাফিজ, জাকাৰিয়া আৰু ৱাছিৰ পলাতক অৱস্থাত থকাৰ বিপৰীতে মহম্মদ জুবেৰ নামৰ আন এজন অভিযুক্ত আৰক্ষীৰ সৈতে সংঘৰ্ষত নিহত হৈছিল।
