দেশৰ বিখ্যাত আইটি কোম্পানী উইপ্ৰোৰ মুখ্য কাৰ্যবাহী বিষয়া থিয়েৰী ডেলাপোৰ্টে এক নতুন অভিলেখ গঢ়িছে। থিয়েৰী ভাৰতীয় তথ্য প্ৰযুক্তি প্ৰতিষ্ঠানসমূহৰ ভিতৰত সৰ্বাধিক দৰমহা পোৱা ব্যক্তি হিচাপে পৰিগণিত হৈছে। তেওঁ ৩১ মাৰ্চ, ২০২২ তাৰিখে সমাপ্ত হোৱা বিত্তীয় বৰ্ষৰ দৰমহা হিচাপে ৭৯.৮০ কোটি টকা (১০.৫১ নিযুত ডলাৰ) লাভ কৰিছে।
উইপ্ৰোৱে ইউএছ চিকিউৰিটিজ এণ্ড এক্সচেঞ্জ কমিছনৰ ওচৰত দাখিল কৰা বাৰ্ষিক প্ৰতিবেদনত এই তথ্য দাঙি ধৰিছে। টাটা কনচাল্টেন্সি চাৰ্ভিচেছ আৰু ইনফোচিছৰ মুখ্য কাৰ্যবাহী বিষয়াসকলে লাভ কৰা দৰমহাতকৈ উইপ্ৰোৰ মুখ্য কাৰ্যবাহী বিষয়াগৰাকীৰ দৰমহা বহুত বেছি।
থিয়েৰী ডেলাপোৰ্টক ২০২০-২১ বিত্তীয় বৰ্ষৰ বাবে ৬৪.৩ কোটি টকাৰ দৰমহা পেকেজৰ সৈতে উইপ্ৰোৱে নিয়োগ কৰিছিল। এই দৰমহা তেওঁক ৯ মাহৰ বাবে দিয়া হৈছিল। কিয়নো ডেলাপোৰ্টে ২০২২ৰ জুলাইত কোম্পানীটোত যোগদান কৰিছিল। ডেলাপোৰ্টৰ তথ্য প্ৰযুক্তি খণ্ডত ২৭ বছৰৰ অভিজ্ঞতা আছে।
ডেলাপোৰ্ট ফ্ৰান্সৰ নাগৰিক। উইপ্ৰোত যোগদান কৰাৰ আগতে তেওঁ কেপজেমিনিত কেইবাটাও শীৰ্ষ পদত কাৰ্যনিৰ্বাহ কৰিছিল।
উইপ্ৰোৰ মুখ্য কাৰ্যবাহী বিষয়া হিচাপে ডেলাপোৰ্টৰ পেকেজত ১৩.২ কোটি টকাৰ দৰমহা আৰু ভাট্টা অন্তৰ্ভুক্ত আছে। কোম্পানীটোৱে তেওঁক কমিছন আৰু ভেৰিয়েবলৰ ৰূপত ১৯.৩ কোটি টকা পৰিশোধ কৰে। তেওঁ অন্যান্য সুবিধা হিচাপে ৩১.৮ কোটি টকাৰ বৃহৎ ধন লাভ কৰে। দীৰ্ঘম্যাদী ক্ষতিপূৰণৰ অধীনত ডেলাপোৰ্টক ১৫.৫০ কোটি টকা পৰিশোধ কৰা হৈছে।
ইপিনে, একে সময়তে, উইপ্ৰোৱে ২০২২ বিত্তীয় বৰ্ষত অধ্যক্ষ ৰিশাদ প্ৰেমজীক দৰমহা হিচাপে ১.৮২নিযুত ডলাৰ পৰিশোধ কৰিছে।
দৰমহাৰ ক্ষেত্ৰত উইপ্ৰোৰ মুখ্য কাৰ্যবাহী বিষয়া থিয়েৰী ডেলাপোৰ্ট অন্যান্য ভাৰতীয় তথ্য প্ৰযুক্তি কোম্পানী ইনফোচিছ আৰু টাটা কনচাল্টেন্সি চাৰ্ভিচেছৰ মুখ্য কাৰ্যবাহী বিষয়াসকলৰ তুলনাত আগবাঢ়ি আছে।
লগতে পঢ়ক: Pervez Musharraf: গুৰুতৰভাৱে অসুস্থ প্ৰাক্তন পাক ৰাষ্ট্ৰপতি পাৰভেজ মুছাৰফ; ডুবাইত চিকিৎসাধীন
ইনফোচিছৰ মুখ্য কাৰ্যবাহী বিষয়া সলিল পাৰেখে ২০২২ বিত্তীয় বৰ্ষত বাৰ্ষিক ৭১ কোটি টকা দৰমহা লাভ কৰিছে। পাৰেখে ২০২২ চনত ২০২১ বিত্তীয় বৰ্ষতকৈ ৪৩ শতাংশ অধিক দৰমহা লাভ কৰিছে। সেইদৰে, টাটা কনসালটেন্সি চাৰ্ভিচেছৰ মুখ্য কাৰ্যবাহী বিষয়া ৰাজেশ গোপীনাথনে ২০২২ বিত্তীয় বৰ্ষত দৰমহা হিচাপে লাভ কৰিছে ২৫.৮ কোটি টকা।
