Sri Lanka to elect a new President অৰ্থনৈতিক সংকটত শ্ৰীলংকাৰ পৰিস্থিতি জুৰুলা হৈ পৰিছে। গণ বিক্ষোভৰ ফলত অগ্নিগৰ্ভ হৈ পৰিছে দেশখন। লণ্ডভণ্ড কৰা হৈছে ৰাষ্ট্ৰপতিৰ বাসগৃহ। গোটেই ভৱনটো এতিয়াও প্ৰতিবাদকাৰীসকলৰ নিয়ন্ত্ৰণত আছে।
ইপিনে শ্ৰীলংকাৰ সংসদে ২০ জুলাইত নতুন ৰাষ্ট্ৰপতি নিৰ্বাচন কৰিব। সোমবাৰে অধ্যক্ষ মহিন্দা ইয়াপা আবেৱৰ্ডনাই এইকথা জনায়। আবেৱৰ্ডনাই এক বিবৃতিত কয় যে শুকুৰবাৰে সংসদ পুনৰ আহ্বান কৰা হ’ব আৰু পাঁচ দিন পিছত নতুন ৰাষ্ট্ৰপতি নিৰ্বাচিত কৰিবলৈ ভোটদান অনুষ্ঠিত হ’ব।
বিবৃতিটোত লগতে কোৱা হৈছে, “আজি অনুষ্ঠিত দলৰ নেতাসকলৰ বৈঠকত সন্মত হৈছে যে সংবিধান অনুসৰি নতুন সৰ্বদলীয় চৰকাৰ নিশ্চিত কৰাৰ বাবে এইটো অপৰিহাৰ্য। শাসকীয় দলটোৱে কৈছে যে সৰ্বদলীয় চৰকাৰ গঠনৰ বাবে প্ৰধানমন্ত্ৰী আৰু কেবিনেটে পদত্যাগ কৰিবলৈ সাজু।”
শ্ৰীলংকা বৰ্তমান অৰ্থনৈতিক অস্থিৰতাৰ কবলত পৰিছে আৰু এয়া সাত দশকৰ ভিতৰত আটাইতকৈ শোচনীয় অৱস্থা।
যোৱা সপ্তাহৰ শেষত হাজাৰ হাজাৰ প্ৰতিবাদকাৰীয়ে ৰাজধানী কলম্বোত ৰাষ্ট্ৰপতি গোটাবায়া ৰাজপাক্ষেৰ চৰকাৰী বাসভৱনত আক্ৰমণ চলায় আৰু শ্ৰীলংকাৰ প্ৰধানমন্ত্ৰী ৰনিল বিক্ৰমাসিংহেৰ ব্যক্তিগত বাসগৃহত জুই লগাই দিয়ে। তেওঁ পলাই যাবলৈ বাধ্য হয় আৰু পিছত তেওঁ পদত্যাগৰ কথা ঘোষণা কৰে। দেওবাৰে দুয়োজন নেতাৰ পদত্যাগৰ পিছত বিৰোধী দলসমূহে সৰ্বদলীয় অন্তৱৰ্তীকালীন চৰকাৰ গঠন কৰাৰ সিদ্ধান্ত লয়।
বাতৰি অনুসৰি, শ্ৰীলংকাৰ মুখ্য বিৰোধী দল চামাগী জনা বালৱেগয়াই (SJB) সোমবাৰে সৰ্বসন্মতিক্ৰমে অন্তৱৰ্তীকালীন ৰাষ্ট্ৰপতিপদৰ বাবে তেওঁলোকৰ নেতা সাজিথ প্ৰেমদাসাক মনোনীত কৰাৰ সিদ্ধান্ত লয়।
আনহাতে, চামাগীয়ে কয় যে দলৰ সম্পাদক ৰঞ্জিত মাদুমা বান্দাৰাই প্ৰস্তাৱটো দাখিল কৰাৰ পিছত আবেলি অনুষ্ঠিত সংসদীয় গোটত দলৰ অধ্যক্ষ ফিল্ড মাৰ্শ্বেল শৰথ ফনসেকাই ইয়াৰ সমৰ্থন কৰিছে।
সংসদত SJB-ৰ প্ৰায় ৫০ জন সাংসদ আছে আৰু সংসদীয় ভোটত জয়ী হ’বলৈ তেওঁলোকক ১১৩ জন সাংসদৰ সমৰ্থনৰ প্ৰয়োজন।
