বয়স বৃদ্ধিৰ লগে লগে মানুহৰ শৰীৰত মাংসপেশীসমূহ লাহে লাহে হ্ৰাস পাবলৈ ধৰে। এটা গৱেষণাত প্ৰকাশ পোৱা অনুসৰি ৩৫-৫০ বছৰ বয়সলৈকে কোনো পৰিশ্ৰম অবিহনে বা মাংসপেশী প্ৰয়োগ নকৰাকৈ শৰীৰত প্ৰায় ৭ পাউণ্ড মাংসপেশী হ্ৰাস হয়।
তেনেহ’লে প্ৰতিদিনে আপুনি ১ পাউণ্ড মাংসপেশীৰ পৰা ৩৫-৫০ কেলৰি বাৰ্ন কৰাৰ ক্ষমতা হেৰুৱাই পেলায়। যদিহে এনেদৰে ৫০ বছৰ বয়সলৈ আপুনি ৭ পাউণ্ড মাংসপেশী হ্ৰাস কৰে, তেন্তে সেই হিচাপত প্ৰতিদিনে ৩৫০ কেলৰি বাৰ্ন কৰা ক্ষমতা হেৰুৱাইছে।
তাৰ ফলত শৰীৰত মেটাবলিজিমটো লাহে লাহে হ্ৰাস পাবলৈ ধৰে। সহজ অৰ্থত মেটাবলিজিম মানে হ’ল শৰীৰৰ কেলৰি বাৰ্ন কৰিব পৰা এক ক্ষমতা। ইফালে কিছুসংখ্যক লোকৰ শৰীৰত বিনা কাৰণত ওজন হ্ৰাস হয় আৰু কিছুমান লোকৰ দেহত ওজন বৃদ্ধি হয়।
যদি আপুনি দেখিবলৈ পায় যে বিনা কাৰণত আপোনাৰ শৰীৰৰ ওজন হ্ৰাস পাবলৈ ধৰিছে, তাৰ অৰ্থ হ’ল আপোনাৰ দেহৰ পৰা মাংসপেশী হ্ৰাস পাই আছে। এনেক্ষেত্ৰত আপুনি সঠিক পুষ্টিকৰ খাদ্য খোৱাৰ লগতে শাৰিৰীক পৰিশ্ৰম অথবা ব্যায়াম কৰাটো প্ৰয়োজন। তৎসত্ত্বেও কিন্তু ইয়াক নিয়ন্ত্ৰণ কৰাটো আপোনাৰ বাবে প্ৰত্যাহ্বানস্বৰূপ।
পূৰ্বে উল্লেখ কৰি অহা হৈছে আপোনাৰ ৩৫-৫০ বছৰ বয়স হোৱালৈকে মানুহৰ শৰীৰত প্ৰায় ৭ পাউণ্ড মাংসপেশী হ্ৰাস হোৱাৰ কাৰণে প্ৰতিদিনে ৩৫০ কেলৰি বাৰ্ন কৰাৰ ক্ষমতা হেৰুৱাইছে, সেই ৩৫০ কেলৰি মেদ হিচাপত আপোনাৰ শৰীৰত লাহে লাহে জমা হ’বলৈ ধৰে, তাৰ ফলত আপোনাৰ ওজন বৃদ্ধি হয়।
যদি এই ৩৫০ কেলৰি প্ৰতিদিনে এৰাই চলিব পাৰে তেতিয়াহে আপুনি আপোনাৰ শৰীৰত ওজন বৃদ্ধিৰ পৰা নিজক বচাব পাৰিব পাৰে। সহজ ভাষাত অতিৰিক্ত কেলৰি গ্ৰহণ কৰা মানে অতিৰিক্ত মেদ শৰীৰত সঞ্চিত হোৱা বুজা যায়। যিমানেই বঢ়াই ৰাখিব, সিমানেই কেলৰি বাৰ্ন কৰিব পৰা ক্ষমতাটো বৃদ্ধি পায়।
Also Read : Health benefits of the jackfruit: এতিয়া কঁঠালৰ বতৰ; ইয়াৰ বহুমূলীয়া উপকাৰিতাৰ বিষয়ে শুনিলে আচৰিত হব আপুনি
এইক্ষেত্ৰত শাৰীৰিক ব্যায়াম আৰু সঠিক পুষ্টিকৰ খাদ্য খোৱাটো অতি দৰকাৰী। যদিহে আপুনি আপোনাৰ কাৰণে নিয়মিত ব্যায়াম কৰা ৰুটিনৰ কথা ভাবিছে। ব্যায়ামে আপোনাৰ শৰীৰৰ হাড়ৰ ঘনত্ব বৃদ্ধি কৰা, ৰক্তচাপ নিয়ন্ত্ৰণ, হৃদযন্ত্ৰ শক্তিশালী কৰা, কলেষ্ট’ৰল লেভেল নিয়ন্ত্ৰণকে ধৰি বহু দিশৰ পৰা আপোনাৰ শৰীৰটোৰ উপকাৰ সাধন কৰে।
প্ৰতিদিনে ন্যূনতম যিখিনি ব্যায়াম কৰিব লাগে তাৰে তালিকাখনৰ বৰ্ণনা এনে ধৰণৰ- প্ৰতিদিনে অন্ততঃ ১০,০০০ টা খোজকাঢ়িব লাগিব বা অন্ততঃ ১০ মিনিট খটখটী বা চিৰি বগাব লাগিব বা ৩০-৪০ মিনিটৰ বাবে হাওঁফাওঁৰ বাবে উপযোগী ধৰণৰ ব্যায়াম কৰিব লাগিব।
অৰ্থাৎ ক’বলৈ গ’লে নিতৌ প্ৰতিবাৰতে কৰা ব্যায়ামৰ জৰিয়তে দেহৰ শক্তি ৪০০ কেলৰি বাৰ্ন কৰিব লাগিব। তদুপৰি সপ্তাহত অন্ততঃ এদিনকৈ হ’লেও ইয়াৰে দুগুণ শক্তি (অৰ্থাত্ ৮০০-১০০০ কেলৰি) বাৰ্ন কৰিব লাগিব। কোনো ক্ৰীড়া প্ৰতিযোগিতাত অংশগ্ৰহণ কৰিবলগীয়া নহ’লে প্ৰয়োজনীয় এই গোটেইখিনি ব্যায়াম একে লেথাৰিয়ে নকৰি দিনটোৰ বিভিন্ন সময়ত বিভক্ত কৰিব পাৰি।
পাছে চিন্তনীয় দিশটো হৈছে যে বহুতো মানুহে নিয়মীয়াভাৱে ব্যায়াম কৰা স্বত্বেও ভালেমান মানুহৰ ফিটনেছ আশানুৰূপ ধৰণৰ নহয়।
ব্যায়ামৰ হেতুকে শৰীৰত যথেষ্ট প্ৰভাৱ পৰে। যিসকলে নিয়মিত প্ৰতিদিনে এঘণ্টাতকৈ বেছি সময় ব্যায়াম কৰে তেওঁলোকৰ অকালতে মৃত্যুবৰণ কৰাৰ শংকা ৪০ শতাংশ কমি যায়। অৱশ্যে এটা কথা অনস্বীকাৰ্য যে ইয়াতকৈ বেছি সময় ব্যায়াম কৰিলে স্বাস্থ্যৰ সামগ্ৰিক উন্নতিৰ আশা আৰু মৃত্যুৰ শংকা নাবাঢ়ে।
গতিকে ডেকাই হওক বা বৃদ্ধই হওক, যিসকলে মাত্ৰাধিক সময়ৰ বাবে জিমত ব্যায়াম কৰে তেওঁলোকে প্ৰতিযোগিতাত ভাল পাৰদৰ্শিতা দেখুওৱাৰ বাবে দৈহিক দৃষ্টিকোণৰ পৰা বিশেষভাৱে লাভান্বিত নহয়। আনহাতে বিপৰীত ক্ৰমে দৈহিক আঘাত প্ৰাপ্তিৰ শংকা বাঢ়ে।
এষাৰ কথা স্মৰ্তব্য যে ভালেই হওক বা বেয়াই হওক কোনো কাম মাত্ৰাধিক পৰিমাণে কৰা অনুচিত। মানৱ স্বাস্থ্যৰ ওপৰত ব্যায়ামৰ প্ৰভাৱ সম্বন্ধীয় দুটামান তথ্য হ’ল:-
১) যিসকল ব্যক্তিয়ে মুঠেই ব্যায়াম নকৰে বা নিচেই সামান্য মাত্ৰাতহে ব্যায়াম কৰে তেওঁলোকৰ অকাল মৃত্যুৰ শংকা অতি বেছি।
২) যিসকলে প্ৰতি সপ্তাহত অন্ততঃ ১৫০ মিনিটৰ (অৰ্থাত্ নিতৌ ২০-২৫ মিনিটকৈ) বাবে গড় হিচাপত ব্যায়াম কৰে তেওঁলোকৰ মৃত্যুৰ সংখ্যা ব্যায়াম নকৰাকৈ থকা মানুহৰ তুলনাত ৪০ শতাংশ কম।
৩) দৈহিক নিষ্ক্ৰিয় অৱস্থাৰ হেতুকে অকালতে মৃত্যুৰণ কৰাৰ শংকা ৭ শতাংশ বাঢ়ে।
৪) যিসকলৰ শাৰীৰিক স্থূলতা বা মেদবহুলতাৰ মাত্ৰা অতি বেছি (যদিহে বি এম আই-ৰ পৰিমাণ ৩০-তকৈ বাঢ়ে) তেনেহলে মৃত্যুৰ শংকা ৪ শতাংশ বৃদ্ধি হয়। অৱশ্যে এই শেহোক্ত পৰিসংখ্যাটিত নিম্ন উল্লেখিত কাৰকবোৰে তেনে কোনো ধৰণৰ প্ৰভাৱ নেপেলায়- মদ্যপান, ধূমপান, লিংগ আৰু শিক্ষা-দীক্ষাৰ প্ৰভাৱ।
গতিকে আমি সকলোৱেই ব্যায়াম কৰাটো সময়ৰ আহ্বান। ব্যায়াম কৰি নিজৰ স্বাস্থ্যৰ যতন লোৱাতো অতিকৈ গুৰুত্বপূৰ্ণ।
Also Read : Health Benefits of Cucumber : উপকাৰিতাৰ বিষয়ে জানেনে? আহকচোন চাওঁ কিমান উপকাৰী তিয়ঁহ
