ভোজন বিলাসত কৃপণালী নকৰে অভিনেতা চনু সুদে: খাদ্যৰ জুতিয়ে আকৰ্ষিত কৰিব আপোনাকো

বলীউদৰ জনপ্ৰিয় অভিনেতা চনু সুদৰ প্ৰতি কোনোৱে অনুৰাগ অনুভৱ নকৰাকৈ থাকিব পাৰিব, সেয়া এই সময়ত প্ৰায় ভাবিব নোৱাৰা কথা। নিজৰ সুন্দৰ-সুঠাম শৰীৰৰ বাবে অনুৰাগীৰ মনত বিশেষ স্থান দখল কৰি আহিছে অভিনেতা গৰাকীয়ে।

শেহতীয়াকৈ চনু সুদে মানৱীয় কাম-কাজৰ যোগেদি সমগ্ৰ অনুৰাগীৰ হৃদয়ত দখল কৰিছে এক বিশেষ স্থান। বিশেষকৈ কৰ’ণাকালীন লকডাউনৰ সময়ত বনুৱা-শ্ৰমিকসকলৰ বাবে অভিনেতাগৰাকীয়ে যি মানৱ প্ৰেমৰ প্ৰশংসিত নিদৰ্শন দাঙি ধৰিছিল, তাৰ পিছৰ পৰাই সুদৰ জনপ্ৰিয়তা পূৰ্বতকৈ বহুগুণে বৃদ্ধি পায়।

সদা স্বাস্থ্য সচেতন চনু সুদে নিজৰ সুন্দৰ-সুঠাম পেশীবহুল স্বাস্থ্য অটুট ৰখাৰ বাবে যৎপৰোনাস্তি চেষ্টা কৰে আৰু এই ক্ষেত্ৰত তেওঁ সফলতাও লাভ কৰিছে। তেওঁৰ এই আকৰ্ষণীয় স্বাস্থ্যৰ প্ৰতি আকৰ্ষিত হয় প্ৰতিজন অনুৰাগী।

এই স্বাস্থ্য সচতনতাৰ সমসাময়িকভাৱে কিন্তু চনু সুদ ভীষণ জোজন বিলাসীও। নিত্য নতুন খাদ্য গ্ৰহণৰ ক্ষেত্ৰত অভিনেতা গৰাকীয়ে কোনো ধৰণৰ কৃপণালী নকৰে। পৰিয়ালৰ সৈতে গ্ৰহণ কৰা বিভিন্ন খাদ্য সম্ভাৰৰ দৃশ্যৰাজি সময়ে সময়ে সামাজিক মাধ্যম যোগে প্ৰচাৰ কৰে সুদে।

স্বাস্থ্যকৰ আহাৰ গ্ৰহণত সদা সষ্টম চনু সুদে ইনষ্টাগ্ৰাম ষ্ট’ৰীজত তেওঁৰ গ্ৰহণ কৰা আহাৰ আকৰ্ষণীয় ৰূপত সজাই তোলা দেখিবলৈ পোৱা গৈছে। ফটোখনৰ সৈতে সুদে লিখিছে, “স্বাস্থ্যকৰ আহাৰ খাওক।”

চনু সুদে বিভিন্ন খাদ্য সামগ্ৰী, বিশেষকৈ দেশীয় সুস্বাদু খাদ্য গ্ৰহণত অধিক গুৰুত্ব দিয়ে। কেৱল ভোজন বিলাসীয়েই নহয়, ৰান্ধনী হিচাপেও অভিনেতা গৰাকীয়ে প্ৰদৰ্শন কৰিছে পাৰদৰ্শিতা। প্ৰায়ে ইনষ্টাগ্ৰামত খাদ্য ৰন্ধনৰ ভিডিঅ’ শ্বেয়াৰ কৰে সুদে।

কিছুদিন পূৰ্বে তেওঁ “চনু দা ধাবা” শীৰ্ষক এটা ভিডিঅ’ শ্বেয়াৰ কৰিছিল। ভিডিঅ’টোত তেওঁ বিভিন্ন খাদ্য সম্ভাৰৰ বিষয়ে উল্লেখ কৰিছিল। তেওঁ লাচ্ছা পৰঠা, বাটাৰ নান, মিচি ৰুটি, চীজ লাচ্ছা পৰঠা, প্লেইন নান আৰু প্লেইন ৰুটিকে ধৰি বিভিন্ন আকৰ্ষণীয় খাদ্য সম্ভাৰৰ বিষয়ে ভিডিঅ’টোত উল্লেখ কৰিছিল।

View this post on Instagram

A post shared by Sonu Sood (@sonu_sood)

আন এবাৰ চনু সুদে জনপ্ৰিয় মহাৰাষ্ট্ৰীয় ব্যঞ্জন মিছাল পাভ প্ৰস্তুত কৰিছিল। এই ভিডিঅ’টোত তেওঁ এই ব্যঞ্জনবিধৰ প্ৰতি থকা তেওঁৰ আকৰ্ষণ ব্যক্ত কৰিছিল। লগতে তেওঁ উৎকৃষ্ট মানৰ মিছাল পাভ পোৱা ফিল্মিস্তান কেণ্টিন নামৰ এখন ৰেষ্টুৰেন্টৰ নামো উল্লেখ কৰিছিল।

অনুৰাগী সকলক এই ৰেষ্টুৰেন্টৰ মিছাল পাভৰ সোৱাদ ল’বলৈও তেওঁ পৰামৰ্শ দিছিল। অভিনেতাগৰাকীক ইনষ্টাগ্ৰাম ষ্ট’ৰীত নিজ হাতে মিছাল পাভ বনোৱাও দেখিবলৈ পোৱা গৈছিল। ভিডিঅ’টোত তেওঁ লিখিছিল, “নিজে ৰান্ধক আৰু নিজেই খাওক।”