শনিবাৰে নিশা বংগত কোটি কোটি টকাৰ সৈতে গ্ৰেপ্তাৰ হোৱা ঝাৰখণ্ডৰ তিনিগৰাকী কংগ্ৰেছ বিধায়কৰ সৈতে অসমৰ মুখ্যমন্ত্ৰী হিমন্ত বিশ্ব শৰ্মাৰ নাম সাঙোৰ খাই পৰাৰ পিছতে সমালোচনাত মুখৰ হৈ পৰিছে অসম বিধানসভাৰ বিৰোধী দলপতি দেবব্ৰত শইকীয়া।
এক ভিডিঅ’ বাৰ্তা যোগে কংগ্ৰেছ নেতাগৰাকীয়ে মুখ্যমন্ত্ৰী হিমন্ত বিশ্ব শৰ্মাক আক্ৰমণৰ লক্ষ্য কৰি কয় যে হিমন্ত বিশ্ব শৰ্মাৰ নেতৃত্বত যিধৰণে গণতন্ত্ৰক নাশ কৰাৰ ষড়যন্ত্ৰ চলি আছে,সেয়া পূৰ্বোত্তৰৰ ৰাজ্যৰ ৰাইজে বহু দিনৰ পৰা দেখি আহিছে।
নিজ মন্তব্যত শইকীয়াই কয় যে অৰুণাচল প্ৰদেশ হওক মণিপুৰ হওক বা নাগালেণ্ডেই হওক, কেনেকৈ নিৰ্বাচিত চৰকাৰক ওফৰাই ধন আৰু ভাবুকিৰে বিজেপিৰ চৰকাৰ গঠন কৰিছিল সেয়া সকলোৱে জানে।
শেহতীয়াকৈ শিৱসেনাৰ বিধায়ক সকলক ধন-প্ৰলোভন আৰু ভাবুকিৰে গুৱাহাটীৰ বিলাসী হোটেলত ৰাখি মহাৰাষ্ট্ৰৰ শিৱসেনাৰ চৰকাৰ ভংগ কৰাৰ ষড়যন্ত্ৰত হিমন্ত বিশ্ব শৰ্মা কেনেধৰণে লিপ্ত আছিল সেয়াও সকলোৱে প্ৰত্যক্ষ কৰিলে বুলি বুলি মন্তব্য কৰে কংগ্ৰেছ নেতাগৰাকীয়ে।
তেওঁ লগতে কয়, “এইবাৰ মুখ্যমন্ত্ৰী হিমন্ত বিশ্ব শৰ্মাৰ ওপৰত ঝাৰখণ্ড চৰকাৰখন ধন-ভাবুকি আৰু প্ৰলোভনেৰে ভংগ কৰাৰ অভিযোগ উত্থাপন হৈছে। সেয়াও শাসকীয় ঝাৰখণ্ড মুক্তি মৰ্চাৰ এজন বিধায়ক কুমাৰ জয়মঙ্গল ডাঙৰীয়াই।”
কুমাৰ জয়মঙ্গলক ইতিমধ্যে কলিকতাত হিমন্ত বিশ্ব শৰ্মাৰ তৰফৰ পৰা ১০ কোটি টকা আৰু কেবিনেট মন্ত্ৰীৰ প্ৰলোভন দিয়া হৈছে বুলি লিখিত অভিযোগ উত্থাপন কৰিছে বুলিও দেবব্ৰত শইকীয়াই ভিডিঅ’ বাৰ্তাটোত উল্লেখ কৰে।
উল্লেখ্য যে ঝাৰখণ্ডৰ বিধায়ক কুমাৰ জয়মঙ্গলে ইতিমধ্যে মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে ঝাৰখণ্ডৰ শাসনাধিষ্ঠ চৰকাৰ উৎখাতৰ ষড়যন্ত্ৰত মুখ্য ভূমিকা লোৱা বুলি আৰক্ষীৰ ওচৰত অভিযোগ দাখিল কৰিছে।
এই অভিযো পত্ৰত বিধায়ক গৰাকীয়ে যোৱা নিশা বংগত কেইবা কোটি টকাৰ সৈতে গ্ৰেপ্তাৰ হোৱা ঝাৰখণ্ডৰ তিনি সতীৰ্থ ববিধায়কে তেওঁকো মুখ্যমন্ত্ৰী হিমন্ত বিশ্ব শৰ্মাক সাক্ষাতৰ বাবে প্ৰস্তাৱ দিয়া বুলি দাবী কৰিছে।
ইতিমধ্যে এই সমগ্ৰ ঘটনাটোৱে দেশৰ ৰাজনীতিত খলকনি তুলিছে। ঝাৰখণ্ড কংগ্ৰেছৰ মুৰব্বী ৰাজেশ ঠাকুৰেও অসমৰ মুখ্যমন্ত্ৰী হিমন্ত বিশ্ব শৰ্মাক এই সন্দৰ্ভত তীব্ৰ নিন্দা কৰিছে।
অৱশ্যে হিমন্ বিশ্ব শৰ্মাই তেওঁৰ বিৰুদ্ধে উত্থাপিত এই অভিযোগ অস্বীকাৰ কৰি, কিয় তেওঁৰ নাম সাঙোৰ খাইছে সেই বিষয়ে কোনো ধাৰণা নাই বুলি মন্তব্য কৰিছে।
