ভাৰতৰ তাৰকা ফুটবলাৰ তথা ৰাষ্ট্ৰীয় দলৰ অধিনায়ক সুনীল ছেত্ৰীক সপ্তমবাৰৰ বাবে অল ইণ্ডিয়া ফুটবল ফেডাৰেচনে ‘মেনচ্ ফুটবলাৰ অৱ দ্য ইয়েৰ’ হিচাপে বাছনি কৰিছে। আনহাতে মনীষা কল্যাণলৈ আগবঢ়োৱা হৈছে ২০২১-২২ বৰ্ষৰ ‘ৱমেনচ্ ফুটবলাৰ অৱ দ্য ইয়েৰ’ সন্মান।
দুয়োগৰাকী তাৰকাক ভাৰতৰ পুৰুষ আৰু মহিলাৰ ৰাষ্ট্ৰীয় দলৰ প্ৰশিক্ষকদ্বয় ক্ৰমে ইগৰ ষ্টিমাক আৰু থমাছ ডেনাৰবিয়ে বিজয়ী হিচাপে মনোনীত কৰিছে।
আন্তঃৰাষ্ট্ৰীয় ফুটবলত সক্ৰিয় খেলুৱৈসকলৰ ভিতৰত তৃতীয় সৰ্বাধিক গ’ল স্ক’ৰাৰ ছেত্ৰীয়ে প্ৰথমবাৰৰ বাবে ২০০৭ চনত এই বঁটাৰ বাবে মনোনীত হৈছিল। তাৰ পিছত তেওঁ ক্ৰমে ২০১১, ২০১৩, ২০১৪, ২০১৭, ২০১৮-১৯ বৰ্ষত এই সন্মান অৰ্জন কৰিছিল।
আনহাতে মনীষা কল্যাণে প্ৰথমবাৰৰ বাবে এই সন্মান লাভ কৰিছে। ইয়াৰ পূৰ্বে তেওঁ ২০২০-২১ বৰ্ষত বৰ্ষটোৰ মহিলা উদীয়মান ফুটবলাৰৰ সন্মান জয় কৰিছিল।
ইফালে মাৰ্টিনা থোকচোমক ২০২১-২২ বৰ্ষৰ মহিলা উদীয়মান ফুটবলাৰ হিচাপে মনোনীত কৰা হয়। পুৰুষ ফুটবলাৰৰ ক্ষেত্ৰত এই সন্মান লাভ কৰিছে বিক্ৰম প্ৰতাপ সিঙে।
বছৰটোৰ শ্ৰেষ্ঠ ৰেফাৰী হিচাপে বাছনি কৰা হৈছে ক্ৰিষ্টেল জনক। সেইদৰে বৰ্ষশ্ৰেষ্ঠ সহকাৰী ৰেফাৰী হিচাপে পৰিগণিত হৈছে উজ্জল হালদাৰ।
