দলৰ ভিতৰতে এতিয়া এলাগী হৈ পৰাৰ উপক্ৰম ঘটিছে নীতিন গাডকাৰীৰ। বিজেপিৰ বিৰুদ্ধে বিভিন্ন সময়ত মাত মাতি এতিয়া যেন দলীয় নেতৃত্বৰ ৰোষত পৰিছে গাডকাৰী। সেয়ে বিজেপিয়ে শেহতীয়াকৈ পুনৰ গঠন কৰা দলটোৰ কেন্দ্ৰীয় সংসদীয় বোৰ্ডৰ পৰা বাদ পৰিছেনীতিন গাডকাৰীৰ দৰে জ্যেষ্ঠ নেতা । আৰএছএছৰ ঘনিষ্ঠ গাডকাৰীক দলত এলাগী কৰাৰ কথাই বহুতকে আচৰিত কৰিও তুলিছে।
শেহতীয়া তথ্য অনুসৰি আৰএছএছৰ পৰা সেউজ সংকেত লাভ কৰাৰ পিছতে গাডকাৰীক দলৰ সংসদীয় সমিতিৰ পৰা আঁতৰ কৰা হৈছে।কেন্দ্ৰীয় মন্ত্ৰী নীতিন গাডকাৰীয়ে চৰকাৰৰ ভুলবোৰ আঙুলিয়াই দি আহিছে।শেহতীয়াকৈ বিজেপিৰ শীৰ্ষ সিদ্ধান্ত গ্ৰহণকাৰী দলৰ পৰা বাদ দিয়া গাডকাৰীয়ে চৰকাৰক সমালোচনা কৰা দেখা গ’ল। কেন্দ্ৰৰ অস্বস্তি বৃদ্ধি কৰি গাডকাৰীয়ে আজি কয় যে চৰকাৰে “সময়মতে সিদ্ধান্ত লোৱা নাই” আৰু ই এক “ডাঙৰ সমস্যা”, দেওবাৰে এক অনুষ্ঠানত গাডকাৰীয়ে কয়। “আপুনি অলৌকিক কাম কৰিব পাৰে… আৰু এটা সম্ভাৱনা আছে… মোৰ পৰামৰ্শ হৈছে যে ভাৰতীয় আন্তঃগাঁথনিৰ ভৱিষ্যত অতি উজ্জ্বল। আমি বিশ্ব আৰু দেশত ভাল প্ৰযুক্তি, ভাল উদ্ভাৱন, ভাল গৱেষণা আৰু সফল অনুশীলন গ্ৰহণ কৰিব লাগিব। আমাৰ ওচৰত বৈকল্পিক সামগ্ৰী থাকিব লাগে যাৰ জৰিয়তে আমি গুণগত মানদণ্ডৰ সৈতে আপোচ নকৰাকৈ ব্যয় হ্ৰাস কৰিব পাৰোঁ। নিৰ্মাণৰ ক্ষেত্ৰত সময় হৈছে আটাইতকৈ গুৰুত্বপূৰ্ণ বস্তু। সময় হৈছে আটাইতকৈ ডাঙৰ মূলধন। আটাইতকৈ ডাঙৰ সমস্যাটো হ’ল চৰকাৰে সময়মতে সিদ্ধান্ত লোৱা নাই,” কেন্দ্ৰীয় মন্ত্ৰীগৰাকীয়ে কয়।
মুম্বাইত এছ’চিয়েশ্যন অৱ কনচাল্টিং চিভিল ইঞ্জিনিয়াৰৰ দ্বাৰা আয়োজিত নেটকন ২০২২ ত ভাষণ দি গাডকাৰীয়ে কয় যে “সময় প্ৰযুক্তি বা সম্পদতকৈ অধিক গুৰুত্বপূৰ্ণ।” কিছুদিন আগতে, গাডকাৰীৰ কথা আৰু প্ৰধানমন্ত্ৰী নৰেন্দ্ৰ মোদীৰ মন্তব্যৰ মাজত অমিল আছিল।
বহুতে এইবুলি কৈছে যে নীতিন গাডকাৰীয়ে শেহতীয়াকৈ সাম্প্ৰতিক ৰাজনীতিয়ে তেওঁক আমুৱাইছে বুলি কৰা মন্তব্যৰ বাবেও হয়তো বিজেপিৰ শীৰ্ষ নেতৃত্ব তেওঁৰ ওপৰত খৰ্ড়হস্ত হ’ব পাৰে৷ গাডকাৰীয়ে তেওঁৰ মন্তব্যৰ জৰিয়তে সাম্প্ৰতিক নীতিহীন ৰাজনীতিক উদঙাই দিয়া বুলি বহুতে আলোচনা কৰিছে৷
আন কিছুসংখ্যকে আকৌ ক’ব বিচাৰিছে যে বিজেপিত অমিত শ্বাহে মোদীৰ পিছতে দ্বিতীয় শক্তিশালী নেতা হৈ থাকিব বিচাৰে৷ সেয়ে গাডকাৰীৰ দৰে নেতাক নীতি নিৰ্ধাৰক সমিতিত ৰাখিলে অসুবিধা হ’ব বুলি ভাবিয়েই তেওঁক আঁতৰোৱা হৈছে৷
উল্লেখ্য অলপতে বিজেপিৰ ৰাষ্ট্ৰীয় অধ্যক্ষ জে পি নাড্ডাৰ নেতৃত্বত গঠিত কেন্দ্ৰীয় সংসদীয় পৰিষদত সৰ্বানন্দ সোণোৱালৰ অন্তৰ্ভুক্তিকৰণৰ সমান্তৰালভাৱে বিজেপিৰ নৱগঠিত কেন্দ্ৰীয় নিৰ্বাচনী সমিতিতো অন্তৰ্ভুক্ত কৰা হৈছে সৰ্বানন্দ সোণোৱালৰ নাম ।
