সুৰা কেলেংকাৰীৰ অভিযোগত কেন্দ্ৰীয় তদন্তকাৰী সংস্থা চিবিআই- এ আজি দিল্লীৰ উপ মুখ্যমন্ত্ৰী মনীষ চিছ’দিয়া চাৰিটাকৈ বেংক লকাৰত তালাচী কৰাৰ পিছত লকাৰকেইটাত কোনো সামগ্ৰী উদ্ধাৰ কৰাত বিফল হয়।
তাৰ পিছতে আপ নেতাগৰাকীয়ে তদন্তকাৰী সংস্থাটোৰ পৰা ক্লিন চিট পোৱা বুলি দাবী কৰিছে। চিবিআইৰ পাঁচজনীয়া বিষয়াৰ এটা দলে আজি দিল্লীৰ উপকণ্ঠত গাজিয়াবাদৰ বসুন্ধৰাস্থিত পঞ্জাৱ নেচনেল বেংকৰ শাখাত তালাচী চলাইছিল।
“চিবিআইৰ অভিযানৰ সময়ত মোৰ বাসগৃহত একো পোৱা নাছিল। একেদৰে আজিও মোৰ বেংকৰ লকাৰত কোনো সামগ্ৰী পোৱা নগ’ল। মই সুখী যে মই ক্লিন চিট পাইছো।”— চিছ’দিয়াই কয়।
চিছ’দিয়াই লগতে কয় যে তদন্তকাৰী চিবিআইৰ বিষয়াসকলে তেওঁৰ লগতে পৰিয়ালকো ভাল ব্যৱহাৰ কৰিছিল আৰু তেওঁলোকেও চিবিআইৰ বিষয়াসকলৰ সৈতে সহযোগিতা আগবঢ়াইছিল।
“চিবিআইয়ে জন্মাষ্টমীত মোৰ ঘৰত তালাচী চলাইছিল। ১৯ আগষ্টত অভিযানৰ সময়ত চিবিআইয়ে লকাৰৰ চাবি জব্দ কৰিছিল। আজি চিবিআইয়ে সেই লকাৰকেইটা খুলি পৰীক্ষা কৰিছিল যদিও একো পোৱা নাছিল। কেৱল মোৰ পত্নীৰ ৭০,০০০ ৰ পৰা ৮০,০০০ টকাৰ গহনাহে তাত পোৱা গৈছিল।”— চিছ’দিয়াই কয়।
ইফালে আজিৰ অভিযানটোৰ পিছতে কেন্দ্ৰীয় চৰকাৰকো তীব্ৰ আক্ৰমণ কৰে আপ নেতাগৰাকীয়ে। প্ৰধানমন্ত্ৰী মোদীয়ে চিছ’দিয়াৰ ঘৰ তথা তেওঁৰ বেংক লকাৰ পৰীক্ষা কৰিবলৈ চিবিআইৰ দল প্ৰেৰণ কৰিছে বুলি অভিযোগ কৰিছে চিছ’দিয়াই।
অৱশ্যে চিবিআই বিষয়াসকলে লকাৰ আৰু নথিপত্ৰসমূহ পৰীক্ষা কৰি কেলেংকাৰীৰ কোনো তথ্য-প্ৰমাণ লাভ কৰাত ব্যৰ্থ হয় যদিও ওপৰৰ পৰা থকা আদেশৰ বাবে শীঘ্ৰেই তেওঁক গ্ৰেপ্তাৰ কৰিব বুলিও চিছ’দিয়াই দাবী কৰে।
চিবিআয়ে কোনো প্ৰমাণ উদ্ধাৰ কৰাত বিফল হোৱাৰ পিছত চিছ’দিয়াই সত্যই জয় লাভ কৰিছে বুলিও মন্তব্য কৰে।