কোভিডৰ আশংকা এতিয়াও দূৰ হোৱা নাই। বিগত ২৪ ঘণ্টাত দেশত ১,৯৪৬ গৰাকী লোক কোভিডত আক্ৰান্ত হৈছে। ২৪ ঘণ্টাৰ ভিতৰত কোভিডত মৃত্যু ঘটিছে ১০ জন লোকৰ। এনে সময়তে দেশত পুনৰ কোভিডে সংহাৰী ৰূপ ধাৰণ কৰিব নেকি তাকে লৈ বহুতৰে মনত প্ৰশ্ন উদয় হৈছে।
আনকি বিজ্ঞানীসকলেও তেনে আশংকাই কৰা দেখা গৈছে।অমিক্ৰনৰ নতুন প্ৰজাতি ধৰা পৰাৰ পিছতে দীপাৱলীৰ আগতে দেশত পুনৰ কোভিডে সংহাৰী ৰূপ ধাৰণ কৰিব পাৰে বুলি আশংকাৰ সৃষ্টি হৈছে। শেহতীয়াকৈ ভাৰতত অমিক্ৰনৰ নতুন উপ-প্ৰকাৰ বি.এ.৫.১.৭ আৰু বি.এফ.৭ ধৰা পৰাৰ পিছতে স্বাস্থ্য বিজ্ঞানীসকল অধিক চিন্তিত হৈ পৰিছে।
এই উপ-প্ৰকাৰসমূহ অতি সংক্ৰামক বুলি প্ৰমাণিত হৈছে আৰু চীনৰ মঙ্গোলিয়া অঞ্চলৰ পৰা বিয়পি পৰাৰ পিছত অধিক শক্তিশালী হৈ উঠিছে বুলি বিজ্ঞানীসকলে কৈছে। এনে উপ-প্ৰকাৰবোৰে এতিয়া পৃথিৱীৰ আন প্ৰান্ততো বিয়পি পৰিছে আৰু ইয়াৰ ফলতে কোভিড সংক্ৰমণৰ এক নতুন ঢৌ সৃষ্টি হোৱাৰ আশংকা কৰা হৈছে।
শেহতীয়াকৈ গুজৰাট জৈৱ প্ৰযুক্তি গৱেষণা কেন্দ্ৰই ভাৰতত বিএফ.৭-ৰ প্ৰথম সংক্ৰমণৰ ঘটনা চিনাক্ত কৰিছে। ভেকছিনৰ লগতে ৰোগ প্ৰতিৰোধ ক্ষমতাকো হাৰ মনাব পৰা এইবিধ প্ৰজাতিয়ে সেয়ে সংহাৰৰ সৃষ্টি কৰিব পাৰে বুলি আশংকা কৰা হৈছে।
দেশত এতিয়া লকডাউন নাই। কোভিডৰ আন নিষেধাজ্ঞা বোৰো হ্ৰাস কৰা হৈছে । ইয়াৰ ফলতে কোভিডৰ নতুন প্ৰজাতিৰ সংক্ৰমণ সহজ হৈ উঠিব পাৰে বুলি বিজ্ঞানীসকলে মত প্ৰকাশ কৰিছে।বিশেষকৈ শিশু, বৃদ্ধ, কৰ্কট ৰোগী, অংগ সংৰোপণ কৰা ৰোগীৰ দৰে দুৰ্বল লোকসকল এইবিধ প্ৰজাতিয়ে সহজে আক্ৰান্ত কৰিব পাৰে বুলি আশংকা কৰা হৈছে।সেয়ে কোভিড বিধি সমূহ এতিয়াও মানি চলিবলৈ বিজ্ঞানীসকলে আহ্বান জনাই আহিছে। বিশেষকৈ সঘনাই হাত ধোৱা, মাস্ক পৰিধান কৰা আদি কাৰ্যসমূহৰ পৰা বিৰত নহ’বলৈ মানুহক আহ্বান জনাই অহা হৈছে।
