মধ্যপ্ৰদেশৰ দামোহ জিলাত মঙলবাৰে সংঘটিত হৈছে এক চাঞ্চল্যকৰ হত্যাকাণ্ড। এগৰাকী ব্যক্তিৰ পত্নীৰ ওপৰত দৃষ্টি নিবদ্ধ কৰাৰ বাবেই এগৰাকী ৩২ বছৰীয়া দলিত যুৱক আৰু তেওঁৰ পিতৃ-মাতৃক গুলীয়াই হত্যা কৰিছে ছয় দুৰ্বৃত্তই।
এই ভয়াৱহ আক্ৰমণত যুৱকগৰাকীৰ দুই সৰু ভাতৃও গুৰুতৰভাৱে আহত হৈছে। জিলাখনৰ আৰক্ষী অধীক্ষক ডি আৰ টেনিৱাৰে জানিবলৈ দিয়া মতে দামোহ জিলাৰ সদৰৰ পৰা প্ৰায় ২০ কিলোমিটাৰ দূৰত দেৱৰান নামৰ এখন গাঁৱত পুৱা প্ৰায় ৬.৩০ বজাত এই নৃশংস হত্যাকাণ্ড সংঘটিত হয়।
অভিযোগ অনুসৰি যুৱকগৰাকীয়ে এগৰাকী ব্যক্তিৰ পত্নীৰ ফালে চাই থকাৰ বাবেই একেখন গাঁৱৰে মহিলাগৰাকীৰ স্বামীসহ ছয় দুৰ্বত্তই যুৱকগৰাকীৰ লগতে তেওঁৰ পিতৃ-মাতৃক গুলীয়াই হত্যা কৰে।
এই আক্ৰমণত বৃদ্ধ দম্পতীহালৰ আন দুগৰাকী পুত্ৰ গুৰুতৰভাৱে আহত হৈ বৰ্তমান জিলা চিকিৎসালয়ত চিকিৎসাধীন হৈ আছে বুলি আৰক্ষী বিষয়াগৰাকীয়ে লগতে জানিবলৈ দিয়ে।
জিলাখনৰ এগৰাকী শীৰ্ষ আৰক্ষী বিষয়াই ঘটনাস্থলী ভ্ৰমণ কৰাৰ পিছত সাংবাদিকৰ আগত উল্লেখ কৰা মতে, যুৱকগৰাকীয়ে প্ৰায়ে মূল অভিযুক্ত জগদীশ পেটেলৰ পত্নীলৈ চাই থকাৰ অভিযোগ উত্থাপিত হোৱাৰ পিছত বিবাদৰ সূত্ৰপাত হৈছিল।
ইয়াৰ পৰিণতিত পেটেলে আন কেইজন ব্যক্তিৰ সৈতে পৰিয়ালটোৰ ওপৰত আক্ৰমণ চলায়। হত্যাকাণ্ডৰ পিছত অভিযুক্ত পেটেলক গ্ৰেপ্তাৰ কৰা হয় বুলি বিষয়াগৰাকীয়ে লগতে কয়। আনহাতে পলাতক আন পাঁচগৰাকী অভিযুক্তৰ সন্ধান চলাই থকা হৈছে বুলি তেওঁ জানিবলৈ দিছে।
ভাৰতীয় দণ্ডবিধিৰ অধীনত হত্যাৰ লগতে অনুসূচীত জাতি আৰু অনুসূচীত জনজাতি (অত্যাচাৰ প্ৰতিৰোধ) আইনৰ ধাৰাৰ আধাৰত পেটেল আৰু আন পাঁচ অভিযুক্তৰ বিৰুদ্ধে ইতিমধ্যে গোচৰ ৰুজু কৰা হৈছে।
ইফালে মধ্য প্ৰদেশ ৰাজ্যিক কংগ্ৰেছৰ মুৰব্বী কমল নাথে দলিত পৰিয়ালটোৰ তিনিগৰাকীকৈ সদস্যক এইদৰে হত্যা কৰাৰ পাছতে উচ্চ পৰ্যায়ৰ তদন্তৰ দাবী জনাইছে। চৰকাৰে পৰিয়ালটোৰ নিৰাপত্তা নিশ্চিত কৰা উচিত বুলি মন্তব্য কৰি তেওঁ লগতে পৰিয়ালটোক সম্ভৱপৰ সকলো সহায় আগবঢ়াবলৈও আহ্বান জনায়।
