দেশৰ ন্যায় ব্যৱস্থাৰ লেহেমীয়া গতিৰ বাবে প্ৰায়েই সৃষ্টি হয় বিৰূপ প্ৰতিক্ৰিয়াৰ। ন্যায় লাভৰ আশাত বন্দী ন্যায় প্ৰত্যাশীসকলে ন্যায় ব্যৱস্থাৰ এনে শামুকীয়া গতিৰ বাবে দীৰ্ঘদিন অপেক্ষা কৰিবলগীয়া হয়।
এনে ব্যৱস্থাৰ বাবেই বহুসময়ত দোষ প্ৰমাণ নোহোৱাকৈয়ে অভিযুক্তই বিনা বিচাৰত গুৰু শাস্তিৰ সন্মুখীন হোৱাৰো উদাহৰণ আছে।
ন্যায়িক ব্যৱস্থাৰ এনে সমস্যাৰ পৰিণতিত আজি কেৰালা উচ্চ ন্যায়ালয়ত সৃষ্টি হয় এক অনাকাংক্ষিত পৰিস্থিতিৰ। আদালতে ন্যায় প্ৰদানত বিলম্ব কৰাৰ অভিযোগ তুলি আজি কেৰালা উচ্চ ন্যায়ালয়ৰ ভৱনৰ পৰা জঁপিয়াই আত্মহত্যাৰ ভাবুকি দিয়ে এগৰাকী ব্যক্তিয়ে।
জানিব পৰা মতে এৰ্নাকুলামৰ এখন পাৰিবাৰিক আদালতে চিতুৰৰ মিনু এণ্টনী নামৰ ব্যক্তিগৰাকীক বিবাহ বিচ্ছেদৰ পাছত তেওঁৰ প্ৰাক্তন পত্নীৰ জীৱন নিৰ্বাহৰ বাবে ধন পৰিশোধ কৰিবলৈ নিৰ্দেশ দিছিল।
আদালতৰ এই আদেশক প্ৰত্যাহ্বান জনাই এণ্টনী উচ্চ ন্যায়ালয়ৰ কাষ চাপে আৰু পাৰিবাৰিক আদালতৰ ৰায়ৰ বিৰুদ্ধে আপীল দাখিল কৰিছিল।
কিন্তু উচ্চ ন্যায়ালয়ত শুনানিৰ বাবে তেওঁৰ আবেদন গ্ৰহণত পলম হোৱাৰ ফলত তেওঁ বিচলিত হৈ পৰে আৰু আত্মহত্যাৰ ভাবুকি দি গোচৰটোৰ খৰতকীয়া শুনানিৰ বাবে হেঁচা দিয়ে।
ব্যক্তিগৰাকীৰ এই আজৱ কাণ্ডত মুহূৰ্তৰ ভিতৰতে আদালত চৌহদত এক চাঞ্চল্যকৰ পৰিস্থিতিৰ সৃষটি হয়। অৱশ্যে আদালতত কৰ্তব্যৰত নিৰাপত্তাৰক্ষী সকলে কৌশলেৰে তেওঁক কৰায়ত্ব কৰি তললৈ নমাই আনে।
এই ঘটনাৰ বিষয়ে সংবাদ মাধ্যমত প্ৰকাশ পোৱাৰ পিছতে তীব্ৰ প্ৰতিক্ৰিয়াৰ সৃষ্টি হৈছে। সম্প্ৰতি ধৃত ব্যক্তিগৰাকী আৰক্ষীৰ জিম্মাতে আছে বুলি জানিব পৰা গৈছে।
