সন্ত্ৰাসবাদে হেঁচা মাৰি ধৰিছে বিশ্বক। মধ্য প্ৰাচ্যৰ পৰা আৰম্ভ কৰি ইউৰোপীয় দেশ তথা দক্ষিণ এছীয় দেশসমূহত সন্ত্ৰাসবাদ এক নতুন বিপদ হৈ থিয় দিছে। সন্ত্ৰাসবাদৰ বাবেই বিশ্বই বিগত দুটা দশকত ৯০০ বিলিয়ন মাৰ্কিন ডলাৰৰো অধিক ধন হেৰুৱাইছে। নতুন দিল্লীত ৭০ খন দেশৰ প্ৰতিনিধিৰ উপস্থিতিত অনুষ্ঠিত হৈ থকা সন্ত্ৰাসবা সম্পৰ্কীয় সন্মিলনত সেয়ে সন্ত্ৰাসবাদীক ধনৰ যোগান ধৰাৰ বিষয়টোকলৈ বিশদভাবে আলোচনা কৰা হৈছে। সন্মিলনত ভাষণ দি প্ৰধানমন্ত্ৰী নৰেন্দ্ৰ মোদীয়ে পাকিস্তানৰ নাম উল্লেখ নকৰাকৈ কৈছিল যে দেশ খনে সন্ত্ৰাসবাদক তেওঁলোকৰ বৈদেশিক নীতিৰ অংশ হিচাপে গ্ৰহণ কৰিছে।
তাৎপৰ্যপূৰ্ণ কথাটো হ’ল পাকিস্তান আৰু আফগানিস্তানক এই সন্মিলনলৈ আমন্ত্ৰণ জনোৱা হোৱা নাই। বিশ্ব মঞ্চত ইছলামাবাদ সমৰ্থিত সন্ত্ৰাসবাদী সংস্থাসমূহৰ পক্ষ লোৱা চীনে সন্মিলনত ভাগ লোৱাৰ পৰা বিৰত আছে। সন্মিলনত মোদীয়ে কয় যে সন্ত্ৰাসবাদৰ বিৰুদ্ধে যুঁজত এটা ডাঙৰ প্ৰত্যাহ্বান হ’ল বিত্তৰ উৎস চিনাক্ত কৰা আৰু সেয়া ব্যাহত কৰা। ধন , ড্ৰাগছ সৰবৰাহ, মৌলবাদী ধৰ্মীয় গোটৰ পৰা দান আৰু মুক্তিপণৰ বাবে অপহৰণৰ কৰি সংগ্ৰহ কৰা বৃহৎ পৰিমাণৰ ধনেৰে সন্ত্ৰাসবাদ অব্যাহত আছে বুলি তেওঁ কয়। এক পৰিসংখ্যা অনুসৰি প্ৰতি বছৰে সন্ত্ৰাসবাদীৰ হাতলৈ যোৱা ধনৰ পৰিমাণ হৈছে বিশ্বব্যাপী জিডিপিৰ ২-৫ শতাংশ ।আনহাতে, বিশ্বব্যাপী সন্ত্ৰাসবাদীয়ে ড্ৰাগছ সৰবৰাহ কৰি গোটাইছে প্ৰায় ৩২ বিলিয়ন আমেৰিকান ডলাৰ। বিগত বছৰবোৰত সন্ত্ৰাসবাদৰ বাবে বিশ্ব অৰ্থনীতিয়ে যথেষ্ট মূল্য ভৰিবলগীয়া হৈছে।
২০১৯ বৰ্ষৰ পৰা সন্ত্ৰাসবাদী কাৰ্যকলাপৰ বাবে বিশ্বই ৯০০ বিলিয়ন ডলাৰ হেৰুৱাইছে। আটাইতকৈ ডাঙৰ লোকচান আছিল ২০১৪ চনত । সেই সময়ত আইছিছ সক্ৰিয় হৈ আছিল।ইৰাক আৰু চিৰিয়াৰ অঞ্চলবোৰ আইছিছে দখল কৰিছিল। বিশ্বৰ অৰ্থনীতি ক্ষতিগ্ৰস্ত হোৱাৰ লগে লগে সন্ত্ৰাসবাদী গোটবোৰ অধিক সমৃদ্ধ হৈ পৰিল। ফৰ্বছৰ এক প্ৰতিবেদন অনুসৰি ২০১৬ চনতআইছিছৰ বাৰ্ষিক টাৰ্ণঅ’ভাৰ আছিল ২ বিলিয়ন মাৰ্কিন ডলাৰ, আনহাতে হামাছে প্ৰতি বছৰে ১ বিলিয়ন মাৰ্কিন ডলাৰ উপাৰ্জন কৰিছিল। আন কিছুমান সন্ত্ৰাসবাদী গোটে ২০১৬ ৰ পৰা ২০১৮ ৰ ভিতৰত তেওঁলোকৰ উপাৰ্জন দুগুণ কৰিছিল। উদাহৰণ স্বৰূপে, হিজবুল্লাৰ বাৰ্ষিক টাৰ্ণঅ’ভাৰ ৫০০ মিলিয়ন ডলাৰৰ পৰা ১.১ বিলিয়ন ডলাৰলৈ, তালিবানৰ ৪০০ মিলিয়ন ডলাৰৰ পৰা ৮০০ মিলিয়ন ডলাৰলৈ আৰু আল কায়েদাৰ মাত্ৰ দুবছৰত ১৫০ মিলিয়ন ডলাৰৰ পৰা ৩০০ মিলিয়ন ডলাৰলৈ বৃদ্ধি পাইছিল।আফ্ৰিকা ইছলামিক সন্ত্ৰাসবাদৰ আন এক কেন্দ্ৰ হৈ পৰিছে।
বকো হাৰাম, আল চাবাব আৰু আইছিছৰ বিভিন্ন শাখাই বৃহৎ অঞ্চল দখল কৰিছে, যাৰ ফলত চৰকাৰী বাহিনী আৰু অসামৰিক লোক ব্যাপক হাৰত হতাহত হৈছে। এই সকলোবোৰ গোটে অপহৰণ, ড্ৰাগছ সৰবৰাহ আৰু অনুদানৰ পৰা ধন উপাৰ্জন কৰিছে। ২০২০ আৰু ২০২১ চনত আফগানিস্তানত সন্ত্ৰাসবাদৰ ফলত ২,৬৭৮ জন লোকৰ মৃত্যু ঘটিছে।তাৰ পিছতে আছিল বুৰ্কিনা ফাছো (১,৩৯০), চোমালিয়া (১,২৬৫), মালি (১,২৪০) আৰু নাইজাৰ (৮৪৫)। এই দেশবোৰে বিশ্ব সন্ত্ৰাসবাদ সূচকতো উচ্চ স্থান লাভ কৰিছে। আফগানিস্তানে ৯.১১ নম্বৰৰ সৈতে তালিকাৰ শীৰ্ষত আছে, তাৰ পিছত আছে ইৰাক (৮.৫১) আৰু চোমালিয়া (৮.৪)।
