দেশৰ ক্ৰীড়াক্ষেত্ৰৰ বাবে সুখবৰ। ভাৰতীয় ক্ৰীড়া জগতৰ শীৰ্ষ সংস্থাসমূহত ৰাজনৈতিক নেতাসকলৰ দপদপনিৰ সময়তে ভাৰতীয় অলিম্পিক সন্থাৰ সভাপতি হিচাপে নিৰ্বাচিত হৈছে কিংবদন্তি স্প্ৰিণ্টাৰ পি টি উষা।
ভাৰতীয় অলিম্পিক সন্থাৰ নিৰ্বাচনৰ মনোনয়ন পত্ৰ দাখিলৰ অন্তিম তাৰিখ কালি সমাপ্ত হয় আৰু মনোনয়ন দাখিল কৰা একমাত্ৰ প্ৰাৰ্থী হিচাপে প্ৰাক্তন তাৰকা ক্ৰীড়াবিদগৰাকী সভাপতি হিচাপে নিৰ্বাচিত হয়।
কেবিনেট মন্ত্ৰী কিৰেন ৰিজিজুৱে এই টুইটযোগে প্ৰবীণ খেলুৱৈগৰাকীক আই অ’ এত নতুনকৈ নিযুক্তি পোৱাৰ বাবে অভিনন্দন জনায়। এক টুইটত ৰিজিজুৱে কয়, “ভাৰতীয় অলিম্পিক সন্থাৰ সভাপতি হিচাপে নিৰ্বাচিত হোৱা কিংবদন্তি স্বৰ্ণ কন্যা পি টি উষালৈ অভিনন্দন।”
তেওঁ লগতে আই অ’ এৰ বিষয়ববীয়া হিচাপে মনোনীত হোৱা দেশৰ প্ৰতিগৰাকী ক্ৰীড়া তাৰকাক অভিনন্দন জনায় আৰু সমগ্ৰ দেশে তেওঁলোকৰ বাবে গৌৰৱ অনুভৱ কৰিছে বুলি টুইটটোত উল্লেখ কৰে।
Congratulations to legendary Golden Girl, Smt. P T Usha on being elected as the President of Indian Olympic Association. I also congratulate all the sporting heroes of our country on becoming the office bearers of the prestigious IOA! Nation is proud of them ! pic.twitter.com/LSHHdmMy9H
— Kiren Rijiju (@KirenRijiju) November 27, 2022
সৰ্বকালৰ অন্যতম শ্ৰেষ্ঠ ভাৰতীয় খেলুৱৈ হিচাপে গণ্য কৰা পি টি উষাই ইতিপূৰ্বে টুইটাৰৰ জৰিয়তে তেওঁ আই অ’ এৰ সভাপতি পদৰ বাবে মনোনয়ন দাখিল কৰিব বুলি নিশ্চিত কৰিছিল।
উল্লেখ্য যে চাৰিটা স্বৰ্ণ আৰু সাতটা ৰূপৰ পদকসহ তাৰকা স্প্ৰিণ্টাৰ উষাই এছিয়ান গেমছত মুঠ ১১ টা পদক অৰ্জন কৰিছিল। ১৯৮৬ চনৰ চিউল এছিয়ান গেমছত তাৰকাগৰাকীয়ে চাৰিটা স্বৰ্ণ লাভেৰে এক ইতিহাসৰ সৃষ্টি কৰিছিল।
ইফালে মহাৰাজা যাদবীন্দ্ৰ সিঙৰ পিছত ভাৰতীয় অলিম্পিক সন্থাৰ সভাপতি পদত অধিষ্ঠিত হোৱা দেশৰ প্ৰথমগৰাকী ক্ৰীড়াবিদ হিচাপে পৰিগণিত হ’ব পি টি উষা।
১৯৩৪ চনত ভাৰতীয় দলৰ হৈ টেষ্ট ক্ৰিকেট খেলা মহাৰাজা যাদবীন্দ্ৰ সিঙে ১৯৩৮ চনৰ পৰা ১৯৬০ চনলৈকে আই অ’ এৰ তৃতীয়গৰাকী সভাপতি হিচাপে কাৰ্যনিৰ্বাহ কৰিছিল।
