মঙলদৈত পাঁচ দিনীয়াকৈ আয়োজিত ৰঙালী বিহু উদযাপনৰ আজি অন্তিম দিনৰ ৰাতিলৈ জনপ্ৰিয় গায়ক জুবিন গাৰ্গে সংগীতানুষ্ঠান পৰিৱেশন কৰাৰ কথা। অনুষ্ঠানটোত অশং গ্ৰহণ কৰিবলৈ যোৱা জুবিনৰ সুৰক্ষা নিশ্চিত কৰিবৰ বাবে দৰং আৰক্ষীয়ে নিৰাপত্তা ব্যৱস্থা কটকটীয়া কৰা বুলি জানিব পৰা গৈছে।
উল্লেখযোগ্য যে সদৌ ৰঙালী বিহু উদযাপন সমিতি, মঙলদৈৰ দ্বাৰা ইয়াৰ গান্ধী ময়দানত ৬৪ সংখ্যক ৰঙালী বিহু পাঁচ দিনীয়াকৈ উদযাপন কৰা হৈছে। আজি ইয়াৰ অন্তিম দিন।
মঙলদৈবাসীক বিহু আৰু জুবিনৰ সংগীতৰ সোৱাদ দিয়াৰ উদ্দেশ্যে আয়োজকে জনপ্ৰিয় গায়কজনক সংগীত পৰিৱেশন কৰিবলৈ আমন্ত্ৰণ কৰিছে।
চহৰখনত জুবিনৰ সংগীতানুষ্ঠানৰ অতীতৰ ৰেকৰ্ড চাই আৰক্ষীয়ে গোট খাব পৰা বিপুল সংখ্যক দৰ্শকক নিয়ন্ত্ৰণ আৰু ছোৱালী জোকোৱা আদি ৰোধ কৰা তথা মহিলাৰ লগতে শিশুৰ নিৰাপত্তাৰ দিশ উন্নত কৰাৰ সিদ্ধান্ত লৈছে।
জিলাখনৰ আৰক্ষী অধীক্ষক শ্ৰীজিথ থিৰাৱিৰামে নিজেই এই নিৰাপত্তা ব্যৱস্থাৰ তদাৰক কৰা বুলি জানিব পৰা গৈছে। “মঞ্চৰ বেৰাৰা যিকোনো ধৰণৰ আৱেষ্টনীৰ ভিতৰত যাতে কোনো অকৰ্তৃত্বশীল ব্যক্তি প্ৰৱেশ কৰিব নোৱাৰে তাৰ বাবে ব্যৱস্থা কৰা হৈছে। বাঁহ দি মহিলা আৰু শিশুসকল প্ৰৱেশ কৰাৰ সুকীয়া প্ৰৱেশ পথ দিয়া হৈছে। গোটেই পথাৰখনকে উপযুক্ত পোহৰৰ সৈতে চি চি টি ভিৰ নিৰীক্ষণত ৰখা হৈছে।” আৰক্ষী অধীক্ষকজনে কয়।
“তাৰোপৰি সশস্ত্ৰ আৰক্ষী জোৱান, মহিলা আৰক্ষী আৰু অৰ্ধ সামৰিক বাহিনী সমগ্ৰ চহৰখনতে উপযুক্ত সংখ্যাত মোতায়েন কৰা হৈছে। বিভিন্ন প্ৰৱেশ পথত তালাচী চলোৱা হৈছে। লগতে সম্ভাব্য যিকোনো প্ৰাকৃতিক দুৰ্ঘটনাত শিশু আৰু মহিলাৰ বাবে অস্থায়ী আশ্ৰয়স্থানৰ ব্যৱস্থা কৰা হৈছে।” আৰক্ষী অধীক্ষকজনে কয়।
উল্লেখযোগ্য যে যোৱাবছৰো বিহু উদযাপন অনুষ্ঠানত জুবিনে ইয়াত সংগীতানুষ্ঠান পৰিৱেশন কৰিছিল আৰু বয়বস্তু ভঙা, ছোৱালী জোকোৱাকে ধৰি বিভিন্ন দুষ্কাৰ্য্য সংঘটিত হৈছিল। ডাঙৰকৈ অহা বৰষুণৰ সুবিধা লৈ দুষ্কৃতিকাৰীয়ে এইবোৰ সংঘটিত কৰিছিল।
