হাজাৰ টকাতকৈ অধিক দৰৰ এটা গেছ চিলিণ্ডাৰ জনতাই পাব মাত্ৰ ৫০০ টকাত! অহাবৰ্ষৰ পৰাই ৰাজ্যৰ জনসাধাৰণে এই দৰতে পাব গেছৰ চিলিণ্ডাৰ। এই ঘোষণা কৰিছে স্বয়ং মুখ্যমন্ত্ৰীয়ে। ৰাজস্থানৰ মুখ্যমন্ত্ৰী অশোক গেহলটে আজি এই বৃহৎ ঘোষণা কৰিছে।
আজি ৰাজস্থানৰ আলৱাৰ জিলাত অনুষ্ঠিত এক সমাৱেশত ভাষণ দি মুখ্যমন্ত্ৰী গেহলটে কয় যে তেওঁৰ ৰাজ্যৰ বিপিএল শ্ৰেণী আৰু উজ্জ্বলা আঁচনিৰ অধীনৰ লোকসকলক ৫০০ টকাকৈ গেছ চিলিণ্ডাৰ দিয়া হ’ব।
“মূল্যবৃদ্ধিৰ বিষয়টো অত্যন্ত গুৰুতৰ। আমি অহা বছৰৰ ১ এপ্ৰিলৰ পিছত বিপিএল পৰিয়ালক ৫০০ টকাকৈ এবছৰত ১২টা গেছ চিলিণ্ডাৰ দিম। চৰকাৰী কল্যাণমূলক আঁচনিৰ সুবিধাৰ পৰা কোনেও বঞ্চিত হৈ থাকিব নালাগে।”- গেহলটে কয়।
তেওঁ লগতে কয়, “আমাৰ চৰকাৰে সবিশেষ অধ্যয়ন কৰি আছে। অহা মাহত বিধানসভাত বাজেট দাখিল কৰিম। এতিয়াৰ হিচাপত মাত্ৰ এটা কথা ক’ব বিচাৰিছো, বাকী ঘোষণাবোৰ মই বাজেটত দিম। এল পি জি কানেকচন আৰু গেছ ষ্ট’ভ দিয়াৰ বাবে উজ্জ্বলা যোজনাৰ নামত প্ৰধানমন্ত্ৰী নৰেন্দ্ৰ মোদীয়ে এখন নাটক কৰিছিল। এতিয়া তেওঁলোকৰ চিলিণ্ডাৰবোৰ খালী হৈ পৰি আছে।”
“এই চিলিণ্ডাৰ এতিয়া কোনেও কিনা নাই, কিয়নো এল পি জিৰ দাম ৪০০ টকাৰ পৰা ১০৪০ টকালৈ বৃদ্ধি পাইছে। বি পি এলৰ অধীনলৈ অহা লোক বা উজ্জ্বলা যোজনাৰ লগত জড়িত লোকৰ ওপৰত অধ্যয়ন কৰিম আৰু ১ এপ্ৰিলৰ পৰা বৰ্তমানৰ ১০৪০ টকাৰ মূল্যৰ পৰিৱৰ্তে তেওঁলোকে ৫০০ টকাত প্ৰতি বছৰে ১২ টাকৈ চিলিণ্ডাৰ পাব।” মুখ্যমন্ত্ৰী গেহলটে ভাষণত লগতে কয়।
উল্লেখ্য যে, অহা বৰ্ষত ৰাজস্থানত অনুষ্ঠিত হ’ব বিধানসভা নিৰ্বাচন। নিৰ্বাচনৰ পূৰ্বে কংগ্ৰেছৰ জেষ্ঠ নেতা তথা বৰ্তমানৰ ৰাজস্থান চৰকাৰৰ মুখ্যমন্ত্ৰী অশোক গেহলটৰ এই বৃহৎ ঘোষণা লক্ষণীয় হৈ পৰিছে।
