ভাৰত জোড়ো যাত্ৰা বন্ধ কৰিবলৈ ক’ভিদক এক অজুহাত হিচাপে দেখুৱাইছে বিজেপিয়ে— এই গুৰুতৰ অভিযোগ উত্থাপন কৰিছে কংগ্ৰেছ নেতা তথা ভাৰত জোড়ো যাত্ৰাৰ নেতৃত্ব বহন কৰা ৰাহুল গান্ধীয়ে। ভাৰত জোড়ো যাত্ৰাত ক’ভিদ প্ৰট’কল অনুসৰণ কৰিবলৈ তথা প্ৰট’কল অনুসৰণ নকৰিলে ৰাষ্ট্ৰীয় স্বাৰ্থত যাত্ৰা কাৰ্যসূচী বাতিল কৰিবলৈ কেন্দ্ৰীয় স্বাস্থ্যমন্ত্ৰীয়ে পত্ৰ প্ৰেৰণ কৰাৰ পাছতে এই মন্তব্য কৰিছে গান্ধীয়ে।
“কাশ্মীৰলৈকে এই যাত্ৰা অব্যাহত থাকিব। এয়া বিজেপিৰ নতুন পৰিকল্পনা। তেওঁলোকে মোৰ বাবে এক পত্ৰ প্ৰেৰণ কৰি ক’ভিদ আহি আছে আৰু সেয়ে যাত্ৰা বন্ধ কৰক বুলি কৈছে। এই সকলোবোৰ প্ৰকৃততে যাত্ৰা বন্ধ কৰাৰ এক অজুহাত। দেশৰ শক্তি আৰু সত্যক লৈ আতংকিত হৈ পৰিছে বিজেপি।”— ৰাহুল গান্ধীয়ে কয়।
“বিজেপিয়ে ভয় খাইছে আৰু সেয়াই সত্য। তেওঁলোকে আমাক বাধা দিব বিচাৰে। ভাৰতৰ শক্তিলৈ বিজেপিয়ে ভয় খাইছে। আমি এশ দিনৰো অধিক সময় খোজ কাঢ়ি আহিছো। হিন্দু, মুছলমান, শিখ, খ্ৰীষ্টান, মহিলা, পুৰুষ, শিশু সকলোৱে আমাৰ লগত যোগদান কৰিছে। যাত্ৰা জম্মু-কাশ্মীৰলৈ যাব।’— গান্ধীয়ে লগতে কয়।
#WATCH | …It’s their (BJP) new idea, they wrote a letter to me saying COVID is coming & stop the Yatra. All these are excuses to stop this Yatra, they are scared of India’s truth: Rahul Gandhi on Union Health min’s letter pertaining to Covid protocols in Bharat Jodo Yatra pic.twitter.com/BCzziH2n06
— ANI (@ANI) December 22, 2022
উল্লেখ্য যে, বুধবাৰে কেন্দ্ৰীয় স্বাস্থ্যমন্ত্ৰী মানসুখ মাণ্ডব্যই গান্ধীলৈ এক পত্ৰ যোগে ৰাহুল গান্ধীক ‘ভাৰত জোডো যাত্ৰা’ত ক’ভিদ প্ৰট’কল পালন কৰিবলৈ অনুৰোধ জনাইছিল। যদি যাত্ৰাৰ সময়ত ক’ভিদ প্ৰট’কল অনুসৰণ নকৰে, তেতিয়া ৰাষ্ট্ৰীয় স্বাৰ্থত যাত্ৰা স্থগিত ৰাখিব লাগে বুলিও পত্ৰত উল্লেখ কৰিছিল কেন্দ্ৰীয় স্বাস্থ্যমন্ত্ৰী গৰাকীয়ে।
ৰাহুল গান্ধীলৈ লিখা পত্ৰখনত কেন্দ্ৰীয় স্বাস্থ্যমন্ত্ৰী মালব্যই উল্লেখ কৰিছিল, “মই ৰাহুল গান্ধীক অনুৰোধ কৰিছো যে পদযাত্ৰাৰ সময়ত মাস্ক আৰু চেনিটাইজাৰ ব্যৱহাৰকে ধৰি অন্যান্য ক’ভিদ প্ৰট’কল কঠোৰভাৱে পালন কৰা হওক আৰু কেৱল টিকাকৰণ কৰাসকলকহে যাত্ৰাত অংশগ্ৰহণ কৰিবলৈ দিয়া হওক।”
“যদি এই ক’ভিদ প্ৰট’কল মানি চলিব নোৱাৰি, তেন্তে জনস্বাস্থ্যৰ জৰুৰীকালীন অৱস্থাৰ প্ৰতি লক্ষ্য ৰাখি আৰু দেশক ক’ভিদ মহামাৰীৰ পৰা ৰক্ষা কৰাৰ বাবে ৰাষ্ট্ৰীয় স্বাৰ্থত ‘ভাৰত জোড়ো যাত্ৰা’ স্থগিত ৰাখিবলৈ অনুৰোধ জনালো।”— পত্ৰখনত লগতে এইদৰে কোৱা হৈছিল।
কিন্তু দেশত কোনো ধৰণৰ ক’ভিদ প্ৰট’কল কাৰ্যকৰী হৈ নথকাৰ বাবে মালব্যৰ এই নিৰ্দেশনাৰ পাছতে কংগ্ৰেছে এই ক’ভিদ প্ৰট’কল কেনেধৰণৰ বুলি প্ৰশ্ন উত্থাপন কৰিছিল। পত্ৰখনৰ প্ৰতি সঁহাৰি দি কংগ্ৰেছে শেহতীয়াকৈ গুজৰাটত প্ৰধানমন্ত্ৰী নৰেন্দ্ৰ মোডীৰ নিৰ্বাচনী প্ৰচাৰ আৰু বিজেপিৰ চলি থকা পদযাত্ৰাৰ বাবে এনে নিৰ্দেশনা প্ৰেৰণ কৰা হৈছিল নেকি বুলি প্ৰশ্ন তুলিছিল।
অৱশ্যে আজি বিজেপিয়ে সম্ভাৱ্য ক’ভিদ পৰিস্থিতিৰ প্ৰতি লক্ষ্য ৰাখি ৰাজস্থানত দলৰ ‘জন আক্ৰোশ যাত্ৰ’ বাতিল কৰিছে। তদুপৰি ক’ভিদ সন্দৰ্ভত আলোচনাৰ বাবে আজি প্ৰধানমন্ত্ৰী নৰেন্দ্ৰ মোদীয়ে এক বৈঠকো আহ্বান কৰিছে।
