ৰাছিয়াৰ ৰাষ্ট্ৰপতি ভ্লাদিমিৰ পুটিনে সাংবাদিকৰ আগত সদৰী কৰিছে যে, “ৰাছিয়া-ইউক্ৰেইন যুদ্ধ অতি সোনকালেই সমাপ্ত হ’ব।‘’ একে সময়তে তেওঁ দাবী কৰে যে আমেৰিকা যুক্তৰাষ্ট্ৰই ৰাছিয়াক সামৰিকভাৱে দুৰ্বল কৰিবলৈ ইউক্ৰেইনক ব্যৱহাৰ কৰি আছে।
পুটিনৰ মতে তেওঁ যিকোনো উপায়েৰে যুদ্ধ সমাপ্ত কৰিবলৈ ইচ্ছুক। কিন্তু ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিৰ জেদৰ বাবেই যুদ্ধ বন্ধ কৰাৰ কোনো উপায় উলিয়াব পৰা হোৱা নাই। ইয়াৰ বিপৰীতে ইউক্ৰেইনৰ সেনাই ডনবাছ অঞ্চলত আক্ৰমণ অব্যাহত ৰাখিছে।
লগতে পঢ়ক: চীনত বিএফ.৭-ৰ আতংক; দৈনিক ১০লাখ সংক্ৰমণ, ৫হাজাৰ মৃত্যু! প্ৰতিবেদনকলৈ চাঞ্চল্য
বছৰটোৰ শেষত ৰাছিয়াৰ ৰাষ্ট্ৰপতিয়ে সাংবাদিকৰ মুখামুখি হৈছিল। ইয়াৰ ঠিক এদিন আগতে জেলেনস্কিয়ে আমেৰিকা যুক্তৰাষ্ট্ৰৰ তেওঁৰ কেইঘণ্টীয়া ভ্ৰমণ সম্পূৰ্ণ কৰিছিল। সেয়েহে সংবাদমেলৰ আৰম্ভণিৰ পৰাই পুটিনে একেসময়তে আমেৰিকা আৰু ইউক্ৰেইনক আক্ৰমণৰ লক্ষ্য কৰি লয়।
তেওঁ স্পষ্ট কৰি কয়, “আমাৰ লক্ষ্য হৈছে এই যুদ্ধ বন্ধ কৰা। আমি দীৰ্ঘদিন ধৰি এইটো চেষ্টা কৰি আছো। আমি যিমান সম্ভৱ সোনকালে এই যুদ্ধ বন্ধ কৰিবলৈ চেষ্টা কৰি আছো।‘’ যিকি নহওক, পুটিনৰ মন্তব্যত সামৰিক যুঁদ্ধ বন্ধ কৰি কূটনৈতিক আলোচনাৰ জৰিয়তে যুদ্ধৰ অৱসান ঘটোৱাৰ বিষয়টো উত্থাপিত হৈছে।
ৰাছিয়াৰ ৰাষ্ট্ৰপতিগৰাকীয়ে লগতে কয়, “আমি যুদ্ধখন সোনকালে সমাপ্ত কৰিব বিচাৰো। কিন্তু আমাৰ প্ৰতিপক্ষই সেইটো নিবিচাৰে। তেওঁলোকে যিমান সোনকালে যুদ্ধ বন্ধ কৰাৰ গুৰুত্ব উপলব্ধি কৰিব, সিমানেই ভাল।‘’
লগতে পঢ়ক: কিছুমান দেশৰ নেতাৰ আমেৰিকা নিৰ্ভৰশীলতাৰ পৰিণতিৰ পৰা শিক্ষা লওক জেলেনস্কিয়ে: ইৰান
আমেৰিকা যুক্তৰাষ্ট্ৰৰ ৰাষ্ট্ৰপতিয়ে ইউক্ৰেইনৰ প্ৰতিৰক্ষাৰ বাবে এটা বিশেষ পেকেজ ঘোষণা কৰিছে। পুটিনে এই বিষয়টোকলৈও পৃথকে সতৰ্ক কৰি দিছে। তেওঁৰ মতে, কিছুমান পক্ষই অপ্ৰয়োজনীয়ভাৱে যুদ্ধ অব্যাহত ৰাখিবলৈ চেষ্টা কৰি আছে। কিন্তু এনেদৰে কোনো লাভ নহ’ব।
অৱশ্যে, মুখত যুদ্ধ বন্ধৰ কথা ক’লেও ৰাছিয়াৰ সেনাই ইউক্ৰেইনত আক্ৰমণ অব্যাহত ৰাখিছে। নিৰন্তৰ আক্ৰমণ চলাই ইউক্ৰেইন দখল কৰিবলৈ বাধ্য হৈছে ভ্লাদিমিৰ পুটিন। বিশেষজ্ঞসকলে অনুমান কৰিছিল যে প্ৰায় দহ মাহৰ যুদ্ধৰ পিছত ৰাছিয়াই ইয়াৰ ৰণনীতি সলনি কৰিব আৰু বক্ৰপথেৰে আক্ৰমণ চলাব।
