গুজৰাটত এক অদ্ভুত কাণ্ড সংঘটিত কৰি ৰঙাঘৰৰ আলহী হৈছে এগৰাকী ব্যক্তি। এই ব্যক্তিগৰাকীয়ে নিজৰ বিচ্ছেদিত প্ৰাক্তন পত্নীক পুনৰ সম্পৰ্কলৈ উভতি অহাৰ দাবী অস্বীকাৰ কৰাৰ বাবে এইচ আই ভি সংক্ৰমিত তেজৰ বেজী দিয়াৰ অভিযোগ উঠিছে।
এই আজৱ কাণ্ড সংঘটিত হৈছে গুজৰাটৰ চুৰাটত। ব্যক্তিগৰাকীৰ এই কাণ্ডৰ বলি হৈ বৰ্তমান মহিলাগৰাকী চিকিৎসাধীন হ’বলগীয়া হৈছে।
অভিযুক্ত ব্যক্তিগৰাকীক শংকৰ কাম্বলে বুলি চিনাক্ত কৰা হৈছে। জেৰাৰ সময়ত কাম্বলেই আৰক্ষীক জনোৱা মতে তেওঁ মহিলাগৰাকীক দিয়া এইচ আই ভি সংক্ৰমিত তেজৰ বেজী চিকিৎসালয়ৰ পৰা ক্ৰয় কৰিছিল।
এই পৰিকল্পনা ৰূপায়িত কৰিবলৈ ধৃত কাম্বলেই প্ৰাক্তন পত্নীক এক নিৰ্জন অঞ্চললৈ লৈ যায় আৰু তাতে তেওঁ এই বিজাণুযুক্ত বেজী দিয়ে। তাৰ পিছত অজ্ঞান হৈ পৰা মহিলাগৰাকীক সেই স্থানতে থৈ উধাও হয় দুৰ্বৃত্ত কাম্বলে।
আৰক্ষীয়ে জানিবলৈ দিয়া মতে, কাম্বলেই এখন চিকিৎসালয়ৰ এইচ আই ভি ৱাৰ্ডলৈ গৈ তেজ সংগ্ৰহ কৰিছিল।
চিকিৎসালয়ত থকা এগৰাকী এইচ আই ভি পজিটিভ ৰোগীক পৰীক্ষাৰ বাবে তেওঁ তেজৰ নমুনা সংগ্ৰহ কৰিছে বুলি আভুৱা ভাৰি কাম্বলেই এই তেজৰ নমুনা নিজৰ লগত লৈ আনে আৰু সেই তেজ মহিলাগৰাকীৰ শৰীৰত বেজীৰে সুমুৱাই দিয়ে।
ভুক্তভোগী মহিলাগৰাকীয়ে আৰক্ষীৰ আগত দিয়া ভাষ্য মতে, তেওঁৰ চৰিত্ৰক লৈ কাম্বলেই সন্দেহ প্ৰকাশ কৰিছিল আৰু এই সন্দেহৰ বাবেই দুমাহ পূৰ্বে তেওঁ কাম্বলেৰ সৈতে বিবাহ বিচ্ছেদ কৰিছিল।
ইতিমধ্যে অভিযুক্ত কাম্বলেৰ বিৰুদ্ধে ভাৰতীয় দণ্ডবিধিৰ সংশ্লিষ্ট ধাৰাৰ অধীনত গোচৰ ৰুজু কৰা হৈছে আৰু ঘটনাৰ অধিক তদন্ত অব্যাহত আছে বুলি এগৰাকী স্থানীয় আৰক্ষী বিষয়াই জানিবলৈ দিয়ে।
