দুই চেকেণ্ডতে মুখৰ হাঁহি পৰিণত হ’ল মৰণকাতৰ চিঞৰলৈ : যাত্ৰীৰ মবাইলত উদ্ধাৰ নেপাল বিমান দুৰ্ঘটনাৰ ভিডিঅ’

নেপালৰ বিমান দুৰ্ঘটনাত দুৰ্ঘটনাগ্ৰস্ত হোৱাৰ আগমুহূৰ্তত এজন যাত্ৰীয়ে মোবাইলত হাঁহি হাঁহি বন্দী কৰিছিল জীৱনৰ শেষৰটো ভিডিঅ’।

দেওবাৰে পুৱা পোখাৰা বিমানবন্দৰত অৱতৰণ কৰাৰ ঠিক পূৰ্বেই য়েটি এয়াৰলাইন্সৰ এ টি আৰ-৭২ নামৰ বিমান খনে ৭২ জন যাত্ৰী সহ মাটিত খুন্দা মাৰে।

দুৰ্ঘটনাগ্ৰস্ত বিমানখনৰ ধ্বংসাৱশেষৰ পৰা উদ্ধাৰকাৰীয়ে উদ্ধাৰ কৰে এজন যাত্ৰীৰ এটা মোবাইল ফোন। সেই ফোনতেই উদ্ধাৰ হৈছে দুৰ্ঘটনাটোত মৃত্যু হোৱা যাত্ৰীজনে কৰি ৰখা ভিডিঅ’।

ইতিমধ্যে এই ভিডিঅ’টো ছ’চিয়েল মিডিয়াত ভাইৰেল হৈ পৰিছে। ভিডিঅ’টোত দেখা গৈছে যে এজন যাত্ৰীয়ে হাঁহি হাঁহি বিমানখনৰ ভিতৰত থকা সহযাত্ৰীসকলৰ লগতে বিমানৰ বাহিৰৰ দৃশ্যও ৰেকৰ্ডিং কৰি আছে।

বিমানখনে মাটিত খুন্দা মৰাৰ আগতেই তেওঁ খিৰিকীৰে সমগ্ৰ চহৰখন কেমেৰাত বন্দী কৰিছে।

আনন্দেৰে ভিডিঅ’টো কৰি থাকোঁতেই হঠাৎ বিস্ফোৰণৰ শব্দত কঁপি উঠিছে বিমানখন।

যাত্ৰীজনৰ হাতৰ পৰা বাগৰি পৰিছে মোবাইল ফোনটো।

ভিডিঅ’টোৰ শেষৰ কেইটামান চেকেণ্ডত দেখা গৈছে ভয়ংকৰ অগ্নিকাণ্ড। লগতে শুনা গৈছে যাত্ৰীসকলৰ কান্দোনৰ শব্দ।

Supposedly a video made by a passenger of the Nepal Airplane Crash#airline #planecrash #planecrashnepal #nepal pic.twitter.com/2O3Yt8NH7s

— Extreme Videos (@handymanbtsea) January 16, 2023

উল্লেখ্য যে বিমান দুৰ্ঘটনাটোত এতিয়ালৈকে ৬৮ গৰাকী যাত্ৰীৰ মৃত্যু হৈছে। বিমানখনত আছিল ৫ জন ভাৰতীয় যাত্ৰী। গোটেইকেইজন যাত্ৰীৰেই ঘৰ উত্তৰ প্ৰদেশত। ইয়াৰে এজন যাত্ৰীৰ ফোনৰ পৰা উদ্ধাৰ হৈছে এই ভিডিঅ’টো।