দিল্লীৰ নৃশংস শ্ৰদ্ধা হত্যাকাণ্ডই দেশব্যাপী সৃষ্টি কৰিছিল তীব্ৰ চাঞ্চল্যৰ। লিভ ইন সম্পৰ্কত থকা যুৱতীগৰাকীক ৩৫ টুকুৰাকৈ কাটি হত্যা কৰিছিল তেওঁৰেই প্ৰেমিক যুৱকগৰাকীয়ে।
এই নৃশংস শ্ৰদ্ধা হত্যাকাণ্ডৰ ঘটনা এতিয়াও সজীৱ হৈ আছে দেশবাসীৰ মনত। ইয়াৰ মাজতে শ্ৰদ্ধা হত্যাকাণ্ডৰ অনুৰূপ ধৰণে হত্যাৰ ভাবুকি দি চৰ্চালৈ আহিছে আন এগৰাকী যুৱক।
এগৰাকী যুৱতীক দিয়া প্ৰেমৰ প্ৰস্তাৱ নাকচ কৰাৰ বাবেই এই যুৱকগৰাকীয়ে যুৱতীগৰাকীক শ্ৰদ্ধাৰ দৰেই ৩৫ টুকুৰাকৈ কাটি হত্যা কৰাৰ ভাবুকি দিছে। এই ভয়ংকৰ ভাবুকি দিয়া যুৱকগৰাকী মধ্য প্ৰদেশৰ ইন্দোৰৰ বাসিন্দা। নাম শুভম কুমাৰ।
জানিব পৰা মতে শুভম কুমাৰে এগৰাকী মুছলমান যুৱতীক বিয়াৰ প্ৰস্তাৱ দিছিল। যুৱতীগৰাকীৰ সৈতে তেওঁ বলপূৰ্বকভাৱে শাৰীৰিক ঘনিষ্ঠতাও গঢ়ি তুলিবলৈ চেষ্টা কৰিছিল।
প্ৰস্তাৱৰ প্ৰতি সঁহাৰি নজনোৱাৰ বাবে কুমাৰে বিগত কিছুদিন ধৰি যুৱতীগৰাকীক অবিৰতভাৱে ভাবুকি দি আহিছিল। কুমাৰে স্পষ্ট কৰি দিছিল যে যুৱতীগৰাকীয়ে তেওঁৰ প্ৰস্তাৱ মানি নল’লে নৃশংসভাৱে হত্যা কৰিবলৈ কুণ্ঠাবোধ নকৰে।
নিৰন্তৰ এনে ভয়ংকৰ ভাবুকিৰ ফলত ভীতিগ্ৰস্ত হৈ অৱশেষত মুছলমান যুৱতীগৰাকীয়ে আৰক্ষীৰ কাষ চাপে। যুৱতীগৰাকীৰ অভিযোগৰ ভিত্তিত স্থানীয় আৰক্ষীয়ে তদন্ত চলাই শুভম কুমাৰ নামৰ অভিযুক্ত যুৱকগৰাকীক আটক কৰে।
আৰক্ষীয়ে লগতে ভাৰতীয় দণ্ডবিধিৰ একাধিক ধাৰাত অভিযুক্ত শুভম কুমাৰৰ বিৰুদ্ধে গোচৰ ৰুজু কৰিছে।
