যোৱা শতিকাৰ ৭০-৮০ দশকতে ভাৰতত বিলুপ্ত হোৱা দ্ৰুতবেগী জন্তু চিতাৰ সংখ্যা পুনৰ দেশত বৃদ্ধি কৰাৰ লক্ষ্যৰে কেন্দ্ৰীয় চৰকাৰে গ্ৰহণ কৰা পদক্ষেপৰ অংশ হিচাপে অহা ফেব্ৰুৱাৰী মাহত আফ্ৰিকান দেশৰ পৰা পুনৰ ১২ টা চিতা লাভ কৰিব ভাৰতে।
সূত্ৰ অনুসৰি ফেব্ৰুৱাৰী মাহৰ মাজভাগত দক্ষিণ আফ্ৰিকাৰ পৰা এই চিতাকেইটা ভাৰতলৈ অনা হ’ব। যোৱা ১৫ জুলাইৰ পৰা দক্ষিণ আফ্ৰিকাত এই চিতাকেইটা কোৱাৰেণ্টাইনত ৰখা হৈছে বুলি জানিব পৰা গৈছে।
চিতাকেইটা ভাৰতলৈ অনাৰ পিছত মধ্যপ্ৰদেশৰ কুনো ৰাষ্ট্ৰীয় উদ্যানত ৰখা হ’ব বুলি জানিব পৰা গৈছে। যোৱা সপ্তাহত নতুন দিল্লী আৰু দক্ষিণ আফ্ৰিকাৰ প্ৰশাসনিক ৰাজধানী প্ৰিট’ৰিয়াৰ মাজত বুজাবুজিৰ চুক্তি স্বাক্ষৰিত হোৱাৰ পিছতে এই কথা প্ৰকাশ পাইছে।
প্ৰকাশিত খবৰ অনুসৰি প্ৰতিটো চিতা স্থানান্তৰিত কৰাৰ পূৰ্বে ভাৰতে ৩ হাজাৰ মাৰ্কিন ডলাৰ পৰিশোধ কৰিব লাগিব। কুনো ৰাষ্ট্ৰীয় উদ্যানৰ সঞ্চালক উত্তম শৰ্মাই জনোৱা মতে, চিতা কেইটাৰ বাবে ১০ টা কোৱাৰেণ্টাইন এনক্ল’জাৰ স্থাপন কৰা হৈছে আৰু প্ৰতিটোতে দুটাকৈ চিতাক ৰখাৰ ব্যৱস্থা কৰা হৈছে।
তেওঁ লগতে কয় যে বুজাবুজি চুক্তি স্বাক্ষৰ কৰাৰ পিছত প্ৰিট’ৰিয়াই চিতা স্থানান্তৰৰ বাবে নিৰ্দেশনা জাৰি কৰিছে। বুজাবুজি চুক্তি স্বাক্ষৰত পলম হোৱাৰ বাবে আৰু দীৰ্ঘদিনীয়া কোৱাৰেণ্টাইনৰ বাবে চিতাকেইটাৰ স্বাস্থ্যক লৈ বন্যপ্ৰাণী বিশেষজ্ঞসকলে উদ্বেগ প্ৰকাশ কৰিছে।
উল্লেখ্য যে এই ১২ টা চিতা বাঘ ভাৰতলৈ চলিত মাহতে আমদানি কৰাৰ সম্ভাৱনা আছিল যদিও বুজাবুজি চুক্তি স্বাক্ষৰত পলম হোৱাৰ বাবে এই ক্ষেত্ৰত বিলম্ব হয়। ভাৰতীয় বন্যপ্ৰাণী প্ৰতিষ্ঠানে প্ৰস্তুত কৰা ‘ভাৰতত চিতা পুনৰ প্ৰৱৰ্তনৰ কাৰ্য্য পৰিকল্পনা’ অনুসৰি নতুনকৈ চিতাৰ বংশ বিস্তাৰৰ বাবে এই চিতাকেইটা আমদানি কৰা হ’ব।
আমদানি কৰিবলগীয়া চিতাকেইটাৰে ৮ টা চিতা মতা আৰু ৪ টা মাইকী চিতা বুলি জানিব পৰা গৈছে।
উল্লেখ্য যে প্ৰধানমন্ত্ৰী নৰেন্দ্ৰ মোদীয়ে ১৭ ছেপ্টেম্বৰত তেওঁৰ জন্মদিনৰ দিনাই নামিবিয়াৰ পৰা প্ৰথমটো গোটৰ আঠটা চিতা, পাঁচটা মাইকী আৰু তিনিটা মতা- কুনো ৰাষ্ট্ৰীয় উদ্যানৰ কোৱাৰেণ্টাইন ঘেৰাওত মুকলি কৰি দিছিল।
দেশত ১৯৫২ চনত এই বিশেষ প্ৰজাতিৰ দ্ৰুতবেগী জন্তুবিধ বিলুপ্ত হোৱাৰ ৭০ বছৰৰ পাছত পুনৰ ভাৰতলৈ অনা হৈছে চিতা।
