১৯৭০-ৰ দশকত হিন্দী চলচ্চিত্ৰ প্ৰেমীসকলৰ বাবে এক সুপৰিচিত নাম আছিল অৰুণা ইৰাণী। অৱশ্যে অভিনেত্ৰীগৰাকীয়ে পাৰ্শ্ব চৰিত্ৰৰ মাজতে সন্তুষ্ট থাকিবলগীয়া হৈছিল। তেওঁক নায়িকাৰ চৰিত্ৰত দেখা যোৱা নাছিল। কিন্তু ৰূপতেই হওঁক বা অভিনয় দক্ষতাই হওঁক অৰুণা কোনো গুণে কম নাছিল। অতি সুন্দৰ দেহশ্ৰী, নৃত্যতো ভাল, তথাপিও বেহু ভাঙিব নোৱাৰিলে।
শেহতীয়া এক সাক্ষাৎকাৰত অৰুণাই কয় যে বহুবাৰ তেওঁক পাৰ্শ্ব চৰিত্ৰৰ পৰাও আঁতৰাই দিয়া হৈছিল। অৰুণা ইৰাণীয়ে পুৰণি স্মৃতিৰ এক তিক্ত অভিজ্ঞতাৰ কথা বৰ্ণনা কৰে য’ত ‘ভাল বান্ধৱী’ ৰেখাই তেওঁক এখন চলচ্চিত্ৰৰ পৰা বাদ দিছিল।
অৰুণাই কয়, “ৰেখা মোৰ এজন ভাল বান্ধৱী আছিল, কিন্তু তেওঁৰ বাবেই মই মঙ্গলসূত্ৰ চলচ্চিত্ৰখনৰ পৰা বাদ পৰিছিল।”
শেহতীয়াকৈ সংবাদ সংস্থাৰ পডকাষ্ট শ্ব’ত প্ৰবীণ অভিনেত্ৰীগৰাকীয়ে আঁতধৰোতা স্মৃতি প্ৰকাশক কয় যে তেওঁ ছবিখনত নায়কৰ মৃত পত্নীৰ চৰিত্ৰত অভিনয় কৰাৰ কথা আছিল। তেওঁক মুখ্যতঃ চলচ্চিত্ৰখনত ভূতৰ চৰিত্ৰত দেখা গ’লহেঁতেন। আনহাতে, ৰেখা দ্বিতীয় পত্নীৰ চৰিত্ৰত আছিল। চুপাৰষ্টাৰ ৰেখাই শেষ মুহূৰ্তত অৰুণাক ছবিখনৰ পৰা বাদ দিয়ে।
অভিনেত্ৰীগৰাকীয়ে কয় যে তেওঁ বাদ পৰাৰ পিছত পৰিচালকজনক প্ৰশ্ন কৰিছিল। তেতিয়াই উত্তৰ আছিল, ‘সঁচাকৈয়ে, ৰেখাজীয়ে আপুনি সেই চৰিত্ৰটো কৰাটো বিচৰা নাছিল’।
অৰুণা ইৰাণীয়ে কয় যে তেওঁ আন এখন চলচ্চিত্ৰৰ দৃশ্যগ্ৰহণৰ সময়ত ‘উমৰাও জান’ৰ অভিনেত্ৰীগৰাকীক পোনপটীয়াকৈ সুধিছিল। জানিব বিচাৰিছিল যে ৰেখাই তেওঁক কিয় ছবিখনৰ পৰা বাদ দিছিল? নাই, ৰেখাই অভিযোগবোৰ অস্বীকাৰ কৰা নাছিল। তাৰ পৰিৱৰ্তে তেওঁ কৈছিল, ‘’চোৱা অৰুণা, যদি সেই ছবিখনৰ অভিনয় অলপ হেৰফেৰ হয়, তেন্তে মই খলনায়িকাৰ দৰে অনুভৱ কৰিম, সেয়েহে মই বিচৰা নাছিলো যে তুমি সেই চৰিত্ৰটো কৰা।‘’
ৰেখাই অৰুণা ইৰাণীৰ অভিনয় দক্ষতাক সমীহ কৰিয়েই এনেকুৱা কৰিছিল। কিন্তু তাত অৰুণাৰ মন শাত নপৰিল। তেওঁ কৈছিল যে ৰেখাই তেওঁক ফোন কৰিব লাগিছিল আৰু বিষয়টোৰ সম্পৰ্কে তেওঁৰ সৈতে পোনপটীয়াকৈ কথা পাতিব লাগিছিল। পিচে, দুখ প্ৰকাশ কৰি ৰেখাই কয় যে তেওঁ নিজৰ কেৰিয়াৰৰ বাবে এনে কৰিছিল।
অৱশ্যে অৰুণাই তেওঁৰ বান্ধৱীৰ সৈতে মনোমালিন্য মনত ৰখা নাই। তেওঁ তিক্ত স্মৃতি মনত ৰাখিব নিবিচাৰে। পিছত অৰুণা ইৰাণীয়ে ‘বেটা’ৰ দৰে চলচ্চিত্ৰত মাধুৰী দীক্ষিতৰ চক্ৰান্তকাৰী শাহু হিচাপে যথেষ্ট প্ৰশংসা লাভ কৰিছিল।
