কটকটীয়া নিৰাপত্তাৰক্ষী বেষ্টনীৰ মাজেৰে দেওবাৰে গুৱাহাটী ছয়মাইলৰ হোটেল লিলিত অনুষ্ঠিত অসম টেবুল টেনিছ সন্থাৰ সাধাৰণ সভাত নতুন কাৰ্যনিৰ্বাহক সমিতি গঠন কৰা হয়।
উক্ত সভাত বিনা প্ৰতিদ্বণ্ডিতাৰে নতুন সভাপতি ৰূপে নিৰ্বাচিত হয় মৃগাংক বৰ্মন। আৰু সম্পাদক হিচাপে পুনৰবাৰ নিৰ্বাচিত হ’ল বিগত ৯ বছৰ ধৰি কাৰ্যকাল চলাই অহা ত্ৰিদিব দুৱৰা। মন কৰিবলগীয়া যে সম্পাদকৰ পদতো কোনো এজন প্ৰতিদ্বন্দ্বী নোলাল।
একেদৰে পুনৰবাৰ নয়নজ্যোতি শৰ্মাক কোষাধ্যক্ষৰ দায়িত্ব অৰ্পণ কৰা হয়। সন্থাৰ পূৰ্বৰ সভাপতি তথা প্ৰাক্তন মন্ত্ৰী ৰকিবুল হুছেইনে এইবাৰৰ নিৰ্বাচনত প্ৰতিদ্বন্দ্বিতা নকৰাৰ বাবে তেওঁক মুখ্য উপদেষ্টা ৰূপে ৰখা হয়।
ইফালে, গুৱাহাটী উচ্চ ন্যায়ালয়ৰ জ্যেষ্ঠ অধিবক্তা বিজন মহাজনকো উপদেষ্টা ৰূপে ৰখা হৈছে। নতুন সমিতিৰ উপ-সভাপতি ৰূপে মনালিছা বৰুৱা মেহতা, নন্দিনী বৰুৱা শৰ্মা, অৰুণজ্যোতি বৰুৱা, মুনীন নবিছ, ৰাজ কাকতি, বাবুল হোৰ, লীলাকান্ত গগৈ, জামছেদ আহমেদ খান, ৰাজীৱ শৰ্মা আৰু ঈশ্বৰ বৰঠাকুৰক ৰখা হৈছে।
আনহাতে কাৰ্ফিউ ৰয়, গৌতম হাজৰিকা, বিপ্লৱ গোস্বামী, শুভ্ৰজিৎ সিন্হা আৰু যতীন বৰাক সন্থাৰ যুটীয়া সম্পাদক হিচাপে দায়িত্ব প্ৰদান কৰা হয়। সহকাৰী সম্পাদক ৰূপে কুকিল দত্ত, দিলীপ সিন্হা, দেৱজ্যোতি শ্ৰুতিকৰ আৰু বিমান ভাগৱতীক ৰখা হৈছে ।
সমিতিৰ কাৰ্যনিৰ্বাহক সদস্য ৰূপে আছে মানসপ্ৰতিম দাস,সোণোশ্বৰ ডেকা, ঘৃতাচি হাজৰিকা দাস, জুপি বৰঠাকুৰ, পাপৰি হাজৰিকা, প্ৰাণজ্যোতি শইকীয়া, প্ৰবীৰ কুমাৰ দাস, সঞ্জীৱ সন্দিকৈ, ৰবীন চাহু, উৎপল বৰ্মন, নৱ দত্ত আৰু ৰত্নদ্বীপ চক্ৰৱৰ্তী।
উল্লেখ্য যে প্ৰথমবাৰৰ বাবে নিৰাপত্তাৰক্ষীৰ উপস্থিতিত অসম টেবুল টেনিছ সন্থাৰ বাৰ্ষিক সাধাৰণ সভা অনুষ্ঠিত হোৱাক কেন্দ্ৰ কৰি ইতিমধ্যে তীব্ৰ বিতৰ্কৰ সৃষ্টি হৈছে। ৰাজ্যিক সন্থাৰ কেইবাখনো স্বীকৃতিপ্ৰাপ্ত জিলাৰ প্ৰতিনিধিক এই বাৰ্ষিক সভাত অংশগ্ৰহণ কৰাৰ পৰা বিৰত ৰখাৰ বাবে উক্ত জিলাৰ প্ৰতিনিধিসকলে ক্ষোভ প্ৰকাশ কৰিছে।
তেওঁলোকৰ মতে ৰাজ্যিক সন্থাৰ পত্ৰ পলমকৈ পোৱাৰ বাবে তেওঁলোকে নিৰ্দিষ্ট সময়ত প্ৰতিনিধিৰ নাম জমা দিব পৰা নাছিল। মূলতঃ ৰাজ্যিক সন্থাৰ কেইগৰাকীমান সদস্যৰ কাম-কাজক লৈ আপত্তি দৰ্শাই অহাৰ বাবেই জিলা প্ৰতিনিধি সকলক বাৰ্ষিক সাধাৰণ সভাৰ পৰা আঁতৰাই ৰখাস বুলি গুৰুতৰ অভিযোগ উত্থাপন কৰে।
এই সম্পৰ্কত বঞ্চিত জিলা প্ৰতিনিধিসকলে দেওবাৰৰ দিনটো অসম টেবুল টেনিছ সন্থাৰ বাবে এটা ক’লা দিন বুলি মন্তব্য প্ৰকাশ কৰিছে।
