ভাৰতৰ বহুতো ঠাই ‘আক্ৰমণকাৰী’ৰ নামেৰে নামাকৰণ কৰা হৈছে। সেয়েহে, এখন নতুন আয়োগ গঠন কৰিব লাগে আৰু সেই ঠাইবোৰৰ নাম সলনি কৰিব লাগে। বিজেপি নেতা অধিবক্তা অশ্বিনী উপাধ্যায়ে উচ্চতম ন্যায়ালয়ত এটা ৰাজহুৱা স্বাৰ্থৰ গোচৰ ৰুজু কৰি কৈছিল যে ভাৰত ইতিহাসৰ দাস হ’ব নোৱাৰে। কিন্তু সোমবাৰে, উচ্চতম ন্যায়ালয়ে গোচৰটো খাৰিজ কৰে। দুই ন্যায়াধীশৰ বিচাৰপীঠে কয় যে যদি আৱেদনখন গ্ৰহণ কৰা হয়, তেন্তে দেশখনত জুই জ্বলিব পাৰে।
ন্যায়াধীশ কে এম জোছেফ আৰু বি ভি নাগাৰাথনাৰ বিচাৰপীঠে কয়, “এয়া সঁচা যে এটা সময়ত আক্ৰমণকাৰীসকলে আমাৰ দেশ শাসন কৰিছিল। কিন্তু ইতিহাসৰ এটা নিৰ্দিষ্ট অধ্যায় তাৰ বাবে মচি পেলাব নোৱাৰি। দেশৰ ইতিহাসে বৰ্তমান আৰু ভৱিষ্যত প্ৰজন্মক কেতিয়াও ভয় খুৱাব নোৱাৰে।”
উচ্চতম ন্যায়ালয়ে লগতে কয়, “ভাৰত এখন ধৰ্মনিৰপেক্ষ দেশ। আৰু হিন্দু কেৱল এটা ধৰ্ম নহয়, ই জীৱন-যাপনৰ এটা উপায়ো। হিন্দু ধৰ্মত কোনো গোঁড়ামি নাই। সেয়েহে, দেশৰ সাম্প্ৰদায়িক সম্প্ৰীতি ধ্বংস হব পৰা এনে অতীত অপ্ৰয়োজনীয়ভাৱে বিচাৰি নুলিয়াব। আমি দেশখনত জুই লগাব নোৱাৰো।‘’
শীৰ্ষ ন্যায়ালয়ৰ ন্যায়াধীশ দুগৰাকীয়ে বিজেপি নেতাজনৰ পিআইএলৰ উদ্দেশ্যৰ ওপৰতো প্ৰশ্ন উত্থাপন কৰে।
কিছু দিনৰ পৰা বিজেপি চৰকাৰে মোগলসকলে দিয়া নামটো সলাই সংশ্লিষ্ট স্থানৰ ‘প্ৰাচীন’ নাম ৰখাৰ উদ্যোগ লৈছে। এই কামটো ত্বৰান্বিত কৰিবলৈ বিজেপি নেতা উপাধ্যায়ে এটা নামকৰণ আয়োগ গঠনৰ প্ৰস্তাৱ দিছিল। ভাৰতীয় পুৰাতাত্ত্বিক জৰীপয়ে গৱেষণা কৰিব আৰু বিভিন্ন স্থানৰ মূল নামৰ এখন তালিকা প্ৰকাশ কৰিব আৰু সেই ঠাইবোৰৰ নাম সলনি কৰা হ’ব। ৰাজহুৱা স্বাৰ্থৰ আবেদনখনত এই দাবী কৰা হৈছিল।
উপাধ্যায়ে উ ল্লেখ কৰিছিল, “আমি স্বাধীনতাৰ ৭৫ বছৰ উদযাপন কৰি আছোঁ, কিন্তু তথাপিও দেশৰ বহুতো গুৰুত্বপূৰ্ণ স্থানৰ নাম দেখি নিৰ্মম আক্ৰমণকাৰীসকলৰ ইতিহাসৰ কথা মনত পৰি যায়।‘’
