মণিপুৰৰ ননী জিলাত পুনৰ সংঘটিত হৈছে ৰক্তাক্ত সংঘৰ্ষ। শনিবাৰে পুৱা দুটা সশস্ত্ৰ সংগঠনৰ মাজত হোৱা গুলীয়াগুলিত তিনিজন কুকি যুৱক নিহত হয়। কেকৰু নগা গাঁৱত সংঘটিত হৈছে এই ঘটনা।
কুকি সংগঠন ‘কুকি ইনপি মণিপুৰ’ৰ দাবী, মৃত লোককেইজন গাঁওৰক্ষী আছিল আৰু নগাসকলৰ এটা সশস্ত্ৰ দলে হত্যা কৰিছে।
অৱশ্যে দুয়োটা সশস্ত্ৰ সংগঠনৰ মাজত হোৱা মুখামুখি সংঘৰ্ষত তেওঁলোকৰ মৃত্যু হোৱা বুলি আৰক্ষীয়ে জানিবলৈ দিয়ে। ঘটনাস্থলীৰ পৰা আৰক্ষীয়ে বন্দুক, গুলী, ড্ৰোন আৰু কেইবাটাও বোমা উদ্ধাৰ কৰে।
আৰক্ষীয়ে জনোৱা মতে, নিহত কেইজনৰ নাম থাংলানছাং চিংগন, থাংহোছেই হাওকিপ আৰু লমিনছাং কিপগেন। তেওঁলোক আটাইকেইজনেই চুৰাচান্দপুৰ জিলাৰ বাসিন্দা।
যোৱা ২৯ অক্টোবৰৰ পৰা অঞ্চলটোত গুলীয়াগুলি চলি আহিছে। বৰ্তমান তাত কেন্দ্ৰীয় বাহিনী মোতায়েন কৰা হৈছে।
কুকি সংগঠনটোৰ অভিযোগ যে অঞ্চলটোৰ নিৰাপত্তাজনিত সমস্যাৰ বিষয়ে আগতীয়াকৈ অৱগত কৰাৰ পিছতো প্ৰশাসনে কোনো ব্যৱস্থা গ্ৰহণ নকৰিলে। ফলত সাধাৰণ লোকে অস্ত্ৰ-শস্ত্ৰ লৈ ৰাজপথলৈ ওলাই আহি অঞ্চলটোত পহৰা দিবলৈ বাধ্য হয়। স্থানীয় ৰাইজে এই ঘটনাৰ বাবে মণিপুৰ চৰকাৰ আৰু প্ৰশাসনৰ নিষ্ক্ৰিয়তাক জগৰীয়া কৰিছে।
আনহাতে, একেদিনাই মেইটেই আৰু নগা সংগঠনে যৌথভাৱে ইম্ফলত প্ৰতিবাদী সমদল উলিয়ায়। ২০২৩ চনত সাম্প্ৰদায়িক হিংসা আৰম্ভ হোৱাৰ পিছত মণিপুৰত এইটো অন্যতম সমদল। শেহতীয়াকৈ উগ্ৰপন্থী আক্ৰমণত তিনিজন মেইটেই যুৱকক হত্যা কৰাৰ ঘনাৰ প্ৰতিবাদত এই সমদল উলিওৱা হয়। টিডিম খেলপথাৰৰ পৰা আৰম্ভ হোৱা এই পদযাত্ৰাৰ অন্ত পৰে পশ্চিম ইম্ফলৰ থাউ খেলপথাৰত।
এই সমাৱেশত কেন্দ্ৰক ‘প্ৰক্সি যুদ্ধ’ আৰু ‘নাৰ্কো-সন্ত্ৰাসবাদ’ বন্ধ কৰাৰ বাৰ্তা দিয়া হয়। ইয়াৰ উপৰিও ম্যানমাৰ সীমান্তৰ পৰা অসম ৰাইফলছ আঁতৰাই সম্পূৰ্ণ নিৰপেক্ষ বাহিনী নিয়োগ কৰাৰ দাবী উত্থাপন হয়। এন আৰ চি ৰূপায়ণৰ লগতে স্থানচ্যুত লোকৰ পুনৰ সংস্থাপনৰ বাবেও দাবী উত্থাপন হৈছে। আনকি মণিপুৰৰ উপ-মুখ্যমন্ত্ৰী নেমচা কিপগেনৰ স্বামীৰ বিৰুদ্ধে সাধাৰণ নাগৰিকক হত্যা কৰাৰ অভিযোগ তুলি পদত্যাগৰ দাবী উত্থাপন হৈছে।
