অসম চৰকাৰৰ বাল্য বিবাহ বিৰোধী অভিযান সন্দৰ্ভত পুনৰ সমালোচনাত মুখৰ হৈ পৰিছে বিধায়ক অখিল গগৈ। আজি অসম বিধান সভা চৌহদত সংবাদ মাধ্যমক সম্বোধন কৰি ৰাইজৰ দলৰ সভাপতি তথা শিৱসাগৰ সমষ্টিৰ বিধায়কগৰাকীয়ে বাল্যবিবাহৰ দোহাই দি ৰাজ্য চৰকাৰে আইন উলংঘা কৰিছে বুলি অভিযোগ কৰে।
বিধায়ক গৰাকীয়ে আজি বিধান সভাৰ ভিতৰতো এই বিষয়ক লৈ প্ৰশ্ন উত্থাপন কৰা বুলি সদৰী কৰে। বিধায়ক অখিল গগৈয়ে কয় যে মুখ্যমন্ত্ৰী হিমন্ত বিশ্ব শৰ্মাই সদায় বাতৰিৰ শিৰোনামা দখল কৰি ৰাখিবৰ বাবে চেষ্টা কৰে আৰু তাৰেই এক অংশ বাল্যবিবাহৰ বিৰুদ্ধে এই অভিযান।
তেওঁ লগতে অসম চৰকাৰৰ এই অভিযান কেনেদৰে আইন বিৰুদ্ধ, সেই বিষয়েও বাখ্যা কৰে। তেওঁ কয় যে Prohibition of Child Marriage Act 2006 ৰ ১৫ নং দফাৰ অধীনত ষ্পষ্টভাৱে কোৱা হৈছে যে বাল্যবিবাহ ৰোধ কৰিবৰ বাবে Prohibition Officer থাকিব লাগে।
কিন্তু হিমন্ত বিশ্ব শৰ্মা নেতৃত্বাধীন বিজেপি চৰকাৰে এই Prohibition Officer নিযুক্তিয়েই দিয়া নাছিল বুলি তেওঁ উল্লেখ কৰে। তেওঁ লগতে যোৱা ফেব্ৰুৱাৰী মাহত তেখেতৰ লগতে বিৰোধী নেতাসকলে এই বিষয়টোৰ ওপৰত চৰকাৰক প্ৰশ্ন কৰাৰ পাছত চৰকাৰে ততাতৈয়াকৈ গাওঁ পঞ্চায়তৰ সচিব সকলক Prohibition Officer হিচাপে নিযুক্তি দিছিল বুলিও মন্তব্য কৰে।
কিন্তু বিধায়ক গগৈয়ে আইনৰ উদ্ধৃতি দি উল্লেখ কৰে যে ১৫ নং দফাৰ ভিতৰতে উল্লেখ আছে যে গাওঁ পঞ্চায়তৰ সচিবজন সহকাৰী Prohibition Officer হিচাপেহে থাকিব পাৰে। চৰকাৰে এনে এক ভুল কেনেকৈ কৰিব পাৰে বুলি প্ৰশ্ন কৰি বিধায়ক গগৈয়ে ইয়াৰ দ্বাৰাই চৰকাৰৰ প্ৰকৃততে বাল্যবিবাহ ৰোধৰ কোনো সদিচ্ছা নথকাৰ কথা প্ৰতিপন্ন হয় বুলি দাবী কৰে।
বিধায়ক অখিল গগৈয়ে লগতে চৰকাৰে এতিয়ালৈকে বাল্যবিবাহ প্ৰতিৰোধ আইনৰ বিধি সমূহো প্ৰস্তুত কৰা নাই বুলি অভিযোগ কৰিছে। তদুপৰি Prohibition Officer সকলকো বাল্যবিবাহৰ বিৰুদ্ধে সজাগতা বা প্ৰচাৰ অভিযান চলাবলৈও কোনো দ্বায়িত্ব দিয়া নাই বুলি মন্তব্য কৰিছে অখিল গগৈয়ে।
