ৰাজ্যত পুনৰ সংঘটিত হৈছে যৌতুক সম্পৰ্কীয় অপৰাধ। যৌতুক সম্পৰ্কীয় সমস্যাৰ পৰিণতিত আজি দক্ষিণ কামৰূপৰ গৰৈমাৰীত আত্মহত্যা কৰে দুটি সন্তানৰ এগৰাকী মাতৃয়ে। যৌতুকৰ দাবীৰে স্বামীগৃহত মহিলাগৰাকীক নিয়মিত চলোৱা আতিশয্যৰ পৰিণতিত এই চৰম পদক্ষেপ গ্ৰহণ কৰে বুলি অভিযোগ উঠিছে।
সূত্ৰ অনুসৰি, মহিলাগৰাকীয়ে স্বামীৰ পিতৃয়ে দাবী কৰা যৌতুক আদায় দিব নোৱাৰাৰ বাবে মহিলাগৰাকীক তেখেতৰ স্বামীয়ে কেইবাবাৰো শাৰীৰিক নিৰ্যাতন চলাইছিল। যাৰ ফলশ্ৰুতিত বিষাক্ত দ্ৰব্য সেৱন কৰি আত্মহত্যাৰ দৰে চৰম সিদ্ধান্ত বাচি লয় মহিলাগৰাকীয়ে।
মৃত মহিলাগৰাকীৰ নাম জয়নফা খাতুন বুলি জানিব পৰা গৈছে। স্থানীয় ৰাইজৰ অভিযোগ অনুসৰি খাতুনৰ স্বামী মহিদুল ইছলামে তেওঁৰ পৰিয়ালৰ পৰা যৌতুক হিচাপে গাড়ী আৰু দামী সামগ্ৰীৰ দাবী কৰিছিল। পত্নীয়ে এই দাবী পূৰণ কৰিব নোৱাৰাৰ বাবে স্বামীয়ে মদ্যপান কৰি অত্যাচাৰ চলাইছিল।
মহিলাগৰাকীৰ এগৰাকী প্ৰতিৱেশীৰ ভাষ্য মতে, মহিদুল ইছলামে প্ৰতিদিনে মদ্যপান কৰি জয়নফা খাতুনক মাৰপিট কৰিছিল। এনে অত্যাচাৰত জৰ্জৰিত হৈ খাতুনে বিষ পান কৰে কৰিবলৈ বাধ্য হয় বুলি প্ৰতিৱেশী মহিলাগৰাকীয়ে অভিযোগ কৰিছে। ইফালে খাতুনে বিষপান কৰাৰ পিছত তেওঁৰ দুই সন্তানে কান্দি কান্দি ওচৰ-চুবুৰীয়াৰ ওচৰত সহায় বিচাৰিছিল বুলিও মহিলাগৰাকীয়ে উল্লেখ কৰিছে।
খবৰ পোৱাৰ লগে লগে চুবুৰীয়া একাংশ লোকে সংকটজনক অৱস্থাত জয়নফা খাতুনক গৰৈমাৰী কমিউনিটি হেল্থ চেণ্টাৰলৈ লৈ যায়। কিন্তু তেওঁৰ স্বাস্থ্যৰ অৱস্থা সংকটজনক হোৱাৰ বাবে চিকিৎসকে গুৱাহাটী চিকিৎসা মহাবিদ্যালয়লৈ প্ৰেৰণ কৰাৰ পৰামৰ্শ দিয়ে।
কিন্তু চুবুৰীয়া লোকসকলে সম্ভাৱ্য চিকিৎসা সেৱা প্ৰদান কৰিবলৈ অনুৰোধ কৰাত চিকিৎসকগৰাকীয়ে চিকিৎসা চলায় যদিও কেইমিনিটমানৰ পাছতে তেওঁৰ মৃত্যু হয়। পিছত মহিলাগৰাকীৰ মৃতদেহ মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰা হয়।
