যোৱা ২০২১ চনৰ ৪ নৱেম্বৰত দীপাৱলীত অসমৰ মুখ্যমন্ত্ৰী হিমন্ত বিশ্ব শৰ্মাই ৰাজ্যৰ ৰাজধানী দিছপুৰত উদ্বোধন কৰিছিল দিছপুৰৰ পৰা ডাউন টাউন সংযোগী উৰণীয়া সেতু। ব্যাপক আড়ম্বৰপূৰ্ণভাৱে অনুষ্ঠিত কৰা হৈছিল এই সেতুৰ উদ্বোধনী অনুষ্ঠান। সংবাদ মাধ্যমতো অনুষ্ঠানটোৱে যথেষ্ট চৰ্চা লাভ কৰিছিল। মুখ্যমন্ত্ৰীৰ লগতে অনুষ্ঠানত উপস্থিত আছিল মিত্ৰজোঁটৰ চৰকাৰৰ কেইবাগৰাকীও সদস্য তথা বিধানসভাৰ অধ্যক্ষ বিশ্বজিৎ দৈমাৰী।
সেতুখন উদ্বোধন কৰি মুখ্যমন্ত্ৰী হিমন্ত বিশ্ব শৰ্মাই সমবেত লোকসকলক উদ্দেশ্যি ঘোষণা কৰিলে যে চৰকাৰী সময়সীমাৰ পূৰ্বেই ১২৭ কোটি টকাৰ উৰণীয়া সেতুখন সম্পূৰ্ণ কৰা হৈছে। নিৰ্ধাৰিত ৩৬ মাহৰ বিপৰীতে ২২ মাহতে সেতুৰ কাম সম্পূৰ্ণ হোৱাটোৱে আন্তঃগাঁথনি বৃদ্ধিৰ গতি ত্বৰান্বিত কৰাৰ ক্ষেত্ৰত চৰকাৰৰ সৰ্বোচ্চ প্ৰচেষ্টাক প্ৰতিফলিত কৰিছে বুলি মন্তব্য কৰিছিল হিমন্ত বিশ্ব শৰ্মাই।
আড়ম্বৰপূৰ্ণ এই উদ্বোধনী অনুষ্ঠানে ব্যাপক চৰ্চা লাভ কৰিলেও শেহতীয়াকৈ এই সমগ্ৰ অনুষ্ঠানটোৰ আঁৰৰ আন এক ছবিহে পোহৰলৈ আহিছে। পোহৰলৈ আহিছে এই অনুষ্ঠানৰ নামত হোৱা বিত্তীয় অনিয়মৰ এক চাঞ্চল্যকৰ তথ্যহে। ৰাজ্যৰ এক সংবাদ সংস্থা দ্য ক্ৰছকাৰেণ্ট আৰু ৰাষ্ট্ৰীয় সংবাদ সংস্থা দ্য ৱায়াৰৰ প্ৰতিবেদনত পোহৰলৈ আহিছে এই তথ্য।
এই প্ৰতিবেদনটোৱে পোহৰলৈ অনা তথ্য মতে, সেতুৰ উদ্বোধনী অনুষ্ঠানৰ পাঁচ মাহ পিছতহে অসম চৰকাৰে অনুষ্ঠান আয়োজনৰ বাবে নিবিদা আহ্বান কৰি কাকতত বিজ্ঞাপন প্ৰকাশ কৰিছিল। আৰ টি আইৰ উত্তৰত প্ৰকাশ পোৱা মতে, ২০২১ চনৰ ৪ নৱেম্বৰত মেগা উদ্বোধনী অনুষ্ঠান অনুষ্ঠিত হোৱাৰ বিপৰীতে অসম চৰকাৰে ২০২২ চনৰ ৯ মাৰ্চত নিবিদা আহ্বানেৰে প্ৰকাশ কৰিছিল বিজ্ঞাপন।
৯ মাৰ্চত প্ৰকাশিত এই বিজ্ঞাপনত ১৫ দিনৰ ভিতৰত উৰণীয়া সেতু উদ্বোধনী অনুষ্ঠানৰ বাবে নিবিদা বিচৰা হৈছিল। নিবিদা দাখিলৰ শেষ তাৰিখ আছিল ১৮ মাৰ্চ, ২০২২। পিছে এইখিনিতে প্ৰকাশিত নিবিদা আহ্বানৰ বিজ্ঞাপন কেৱল ফাইলৰ নথি হিচাপে দেখুৱাৰ কৌশল হিচাপেহে প্ৰকাশ কৰা বুলি গুৰুতৰ অভিযোগ উত্থাপন হৈছে।
আৰ টি আইৰ উত্তৰ মতে, গুৱাহাটীস্থিত দুটা ব্যৱসায়িক প্ৰতিষ্ঠান – মেছাৰ্ছ জে এম কে কনষ্ট্ৰাকচন এণ্ড চাপ্লাইয়াৰ আৰু ড্ৰিম এ-মেজ আৰু অঞ্জন শৰ্মা নামৰ এগৰাকী ঠিকাদাৰে নিবিদাত অংশগ্ৰহণ কৰিছিল। আশ্চৰ্যকৰভাৱে, তিনিও নিবিদাকাৰীয়ে উল্লেখ কৰা ঠিকনাটো আছিল একেটা অঞ্চলৰে– কামাখ্যা ধাম, গুৱাহাটী। তদুপৰি নিবিদাত অংশগ্ৰহণ কৰা জেএমচি কনষ্ট্ৰাকচনৰ স্বত্বাধিকাৰী যুগানন্দ শৰ্মা, ড্ৰিম এ-মেজৰ স্বত্বাধিকাৰী ভাস্কৰ শৰ্মা আৰু আনগৰাকী ব্যক্তি অঞ্জন শৰ্মাও আছিল প্ৰকৃততে ব্যৱসায়িক সহযোগী।
তিনিও গৰাকী ব্যক্তি আন এটা ব্যৱসায়িক প্ৰতিষ্ঠানৰ সহ-পৰিচালক: মেচাৰ্ছ আছাম কেমিষ্টছ ডিষ্ট্ৰিবিউটৰ্ছ প্ৰাইভেট লিমিটেড নামৰ এটা প্ৰতিষ্ঠানৰ সঞ্চালক পদতো আছিল। আৰ টি আইৰ উত্তৰ অনুসৰি, নিবিদাৰ পাছত পি ডব্লিউ ডিয়ে মেছাৰ্ছ ড্ৰিম এ-মেজক অনুষ্ঠান আয়োজনৰ স্বত্বত অনুমোদন জনায়। লক্ষণীয়ভাৱে, এই প্ৰতিষ্ঠানটোৰ স্বত্বাধিকাৰী ভাস্কৰ শৰ্মা মুখ্যমন্ত্ৰী হিমন্ত বিশ্ব শৰ্মাৰ পৰিয়ালৰ এক ঘনিষ্ঠ ব্যৱসায়িক সহযোগী। পি ডব্লিউ ডি মন্ত্ৰালয়ে ভাস্কৰ শৰ্মাৰ প্ৰতিষ্ঠানলৈ তিনিটা ৱৰ্ক অৰ্ডাৰ জাৰি কৰিছিল।
দ্য ৱায়াৰ আৰু দ্য ক্ৰছকাৰেণ্টে লাভ কৰা ৱৰ্ক অৰ্ডাৰত দেখা গৈছে যে ভাস্কৰ শৰ্মাৰ প্ৰতিষ্ঠানটোক উৰণীয়া সেতু উদ্বোধনৰ বাবে মাত্ৰ অস্থায়ী ব্যৱস্থাৰ বাবেই ৪৫,৯৪,৬৫৭ টকা দিয়া হৈছিল। পি ডব্লিউ ডিৰ দিছপুৰ টেৰিটৰিয়েল ৰোডছ ডিভিজনৰ কাৰ্যবাহী অভিযন্তাই স্বাক্ষৰ কৰা ৱৰ্ক অৰ্ডাৰ অনুসৰি এই ৰাশিৰে ১৩,৩৫,৭৩১ টকা ৰটাৰী কাপোৰেৰে ঢাকি দিয়া আৰু সাজ সজ্জাৰ বাবে আবণ্টন দিয়া হৈছিল।
আনহাতে, ৰাজ্যৰ বিভিন্ন জনগোষ্ঠীৰ গামোচা, মুখ্যমন্ত্ৰীৰ প্ৰতিচ্ছবি, ফ্লেক্স ব’ৰ্ডেৰে ফ্লাইঅভাৰৰ সৌন্দৰ্যবৰ্ধনৰ বাবে ১৪,৩২,৯৫০ টকা আৰু তিনিখন তোৰণ নিৰ্মাণৰ বাবে ১৮,২৫,৮৮৬ টকা আবণ্টন দিয়া হৈছিল। ভাস্কৰ শৰ্মাক দিয়া ৱৰ্ক অৰ্ডাৰ কেইখন ভালদৰে চালে দেখিবলৈ পোৱা যাব যে ১৩,৩৫,৭৩১ টকাৰ কামৰ ভিতৰত ৰ’টাৰী দুটা বিভিন্ন ট্ৰাইবেল গামোচাৰে ঢাকিবলৈ ৬,৫০,৯১৪ টকা, কৃত্ৰিম ঘাঁহৰ জাপিৰ নামত ১,৩৩,২৮২ টকা, পোহৰৰ সাজ-সজ্জাৰ বাবে ৪,১৩,২৮০ টকা আৰু বাঁহৰ সাজোনৰ নামত ৫৯,০৪০ টকা আবণ্টন দিয়া হৈছিল৷
ভাস্কৰ শৰ্মাই লাভ কৰা ১৪,৩২,৯৫০ টকাৰ দ্বিতীয়খন ৱৰ্ক অৰ্ডাৰ অনুসৰি মুখ্যমন্ত্ৰী ড০ হিমন্ত বিশ্ব শৰ্মাৰ ফটো, ফ্লেক্স, পতাকা আৰু বিভিন্ন জনগোষ্ঠীয় গামোচাৰ বাবে ৭,৬৮,৭৫০ টকা আৰু ৰঙা, বগা আৰু সোণালী কাপোৰেৰ ফ্লাই অভাৰৰ ফেন্সিং ঢাকি দিয়াৰ বাবে ৬,৬৪,২০০ টকা আবণ্টন দিয়া হয়৷ ভাস্কৰ শৰ্মাৰ ১৮,২৫,৮৮৬ টকাৰ ৱৰ্ক অৰ্ডাৰ অনুসৰি ৩০০ ফুল গছ সাত দিনৰ বাবে স্থাপন কৰাৰ বাবে ১,৫৪,৯৮০ টকা, জেনেৰেটৰৰ বাবে ১,১৮,৮১৮ টকা, লাইটিঙৰ বাবে ১,৯৩,৭২৫ টকা আবণ্টন দিয়া হৈছিল৷
ইয়াৰ বাহিৰেও গেটত ঢোল স্থাপন, জাপি, ফুলাম গামোচা আদিৰ বাবেও পৃথকে পৃথকে ধন আবণ্টন দিয়া হৈছিল৷ ভাস্কৰ শৰ্মালৈ এই নিবিদা অনুমোদনৰ আঁৰত মুখ্যমন্ত্ৰী হিমন্ত বিশ্ব শৰ্মাৰ পৰিয়ালৰ সৈতে থকা ঘনিষ্ঠ ব্যৱসায়িক সম্পৰ্কই অনুঘটক হিচাপে কাম কৰিছিল নেকি সেই লৈ এতিয়া ব্যাপক প্ৰশ্ন উঠিছে। দ্য ক্ৰছকাৰেণ্ট আৰু দ্য ৱায়াৰে প্ৰতিবেদনটোত ভাস্কৰ শৰ্মাৰ সৈতে মুখ্যমন্ত্ৰী পৰিয়ালৰ আন কেতবোৰ ব্যৱসায়িক সম্পৰ্কও পোহৰলৈ আনিছে।
