শাসকীয় বিজেপি চৰকাৰৰ নীতিৰ বিৰুদ্ধে ক্ষোভ প্ৰকাশ কৰি আজি পুনৰ দেশৰ ৰাজধানী দিল্লীত এক মৃদু কম্পন তুলিলে কেইবাটাও কৃষক আৰু শ্ৰমিক সংগঠনে। দিল্লীৰ ৰামলীলা ময়দানত কেইবাটাও বাওঁপন্থী ট্ৰেড ইউনিয়ন আৰু কৃষক সংগঠনৰ সহযোগত অনুষ্ঠিত হোৱা সমাৱেশত সহস্ৰাধিক শ্ৰমিক আৰু কৃষকে অংশগ্ৰহণ কৰে।
কৃষক-শ্ৰমিক সংগঠনসমূহে বিজেপি নেতৃত্বাধীন কেন্দ্ৰীয় চৰকাৰে কৃষক আৰু শ্ৰমিকসকলৰ মৌলিক প্ৰয়োজনীয়তাক অৱজ্ঞা কৰাৰ অভিযোগ তোলাৰ লগতে লগতে চৰকাৰী ভুল নীতিৰ পৰিপ্ৰেক্ষিতত জীৱিকা হেৰুওৱাৰ অভিযোগ উত্থাপন কৰি বিক্ষোভ প্ৰদৰ্শন কৰে।
চেণ্টাৰ অৱ ট্ৰেড ইউনিয়ন (CITU), সৰ্বভাৰতীয় কিষাণ সভা (AIKS), আৰু সৰ্বভাৰতীয় কৃষি শ্ৰমিক সংঘ (AIAWU)ৰ উদ্যোগত শ্ৰমিক-কৃষকৰ এই যৌথ সমাৱেশ অনুষ্ঠিত হয়।
সমাৱেশত কৃষক-শ্ৰমিক নেতাসকলে এই সমাৱেশখনে দেশৰ শ্ৰমিকসকলৰ উত্থাপিত ক্ষোভৰ ইংগিত বহন কৰিছে বুলি চৰকাৰক সকীয়াই দিয়ে। এক আনুষ্ঠানিক বিবৃতিত সমাৱেশৰ উদ্যোক্তাসকলে কৃষক-শ্ৰমিকসকলে শিক্ষা, স্বাস্থ্যসেৱা আৰু মৰ্যাদাপূৰ্ণ জীৱনৰ সুবিধা প্ৰদান কৰিবলৈ চৰকাৰী নীতিৰ দাবী কৰে বুলি প্ৰকাশ কৰিছে।
হাৰিয়ানা, পঞ্জাৱ, ৰাজস্থান, উত্তৰ প্ৰদেশ, হিমাচল প্ৰদেশ, জম্মু-কাশ্মীৰ, মহাৰাষ্ট্ৰ, অন্ধ্ৰ প্ৰদেশ, তেলেংগানা, কেৰেলা, কৰ্ণাটক, অসম, ত্ৰিপুৰা, মণিপুৰ, গুজৰাটকে ধৰি দেশৰ বিভিন্ন প্ৰান্তৰ পৰা শতাধিক শ্ৰমিক, কৃষকে এই সমাৱেশত অংশগ্ৰহণ কৰা বুলি বিবৃতিটোত লগতে কোৱা হৈছে।
