২৪ ৰ লোকসভা নিৰ্বাচনলৈ মাজত আৰু এটা বছৰ বাকী থকা অৱস্থাতে সঘনে উচ্চাৰিত হৈছে বিৰোধী ঐক্যৰ কথা। পিছে এই চৰ্চাৰ মাজতে দেশৰ ৰাজনীতিত ক্ৰমাৎ উত্থান ঘটা আম আদমী পাৰ্টিৰ মুৰব্বী অৰবিন্দ কেজৰিৱালে কৰিছে এক বিশেষ মন্তব্য। কেজৰিৱালৰ মতে, চৰ্চিত এই বিৰোধী ঐক্যতকৈ জনসাধাৰণৰ ঐক্যহে গুৰুত্বপূৰ্ণ।
কেজৰিৱালৰ মতে, কিছু লোকে বিৰোধী দলৰ মাজত ঐক্য গঢ়ি তুলিবলৈ যিমানেই চেষ্টা নকৰক কিয়, যদি জনসাধাৰণে কাৰোবাক সমৰ্থন কৰাৰ সিদ্ধান্ত লৈছে, তেন্তে সেই ব্যক্তিজনকে ভোট দিব। গণতন্ত্ৰত জনসাধাৰণ সৰ্বোচ্চ আৰু বিৰোধী দলসমূহে ইতিবাচক এজেণ্ডা লৈ তেওঁলোকৰ ওচৰলৈ যাব লাগে বুলিও মন্তব্য কৰে দিল্লীৰ মুখ্যমন্ত্রীগৰাকীয়ে।
তেওঁ কয় যে যদি সকলোৱে কাৰোবাক পৰাস্ত কৰিবলৈকে একত্ৰিত হোৱাৰ কথা কয়, তেতিয়া জনসাধাৰণে সেই কথা ভাল নাপায়। কাৰোবাক পৰাস্ত কৰা বা জয়ী কৰাটো জনসাধাৰণৰ কাম আৰু সেয়া তেওঁলোকৰ ওপৰতে এৰি দিয়া উচিত বুলি উল্লেখ কৰে কেজৰিৱালে।
১০ মে’ত অনুষ্ঠিত হ’বলগীয়া জলন্ধৰ লোকসভাৰ উপ-নিৰ্বাচনৰ প্ৰতি লক্ষ্য ৰাখি জলন্ধৰ ভ্ৰমণৰ সময়তে সাংবাদিকৰ আগত তেওঁ এই মন্তব্য কৰে। যোৱা জানুৱাৰী মাহত কংগ্ৰেছৰ সাংসদ সন্তখ সিং চৌধাৰীৰ মৃত্যু হোৱাৰ বাবে এই উপ-নিৰ্বাচন অনুষ্ঠিত কৰা হ’ব।
তৃতীয় ফ্ৰণ্টৰ সৈতে আপৰ সহযোগিতাৰ সম্ভাৱনীয়তা সন্দৰ্ভত কৰা এক প্ৰশ্নৰ উত্তৰত অৰবিন্দ কেজৰিৱালে কয় যে গণতন্ত্ৰত জনসাধাৰণেই সৰ্বোচ্চ। বিৰোধী ঐক্য গঢ়ি তোলাৰ কথা বহু চৰ্চা হয়। কিন্তু যিদিনা জনসাধাৰণ একত্ৰিত হ’ব, তেওঁলোকে কি কৰা হ’ব সেয়া নিৰ্ণয় কৰিব বুলি তেওঁ লগতে মন্তব্য কৰে।
উল্লেখ্য যে, ২৪ ৰ লোকসভা নিৰ্বাচনত বৰ্তমানৰ শাসকীয় বিজেপিক প্ৰতিহত কৰাৰ স্বাৰ্থত বিৰোধী ঐক্যৰ প্ৰসঙ্গত সৰৱ চৰ্চা চলিছে। সমান্তৰালভাৱে চৰ্চিত হৈছে এই ঐক্যমঞ্চত অৰবিন্দ কেজৰিৱাল নেতৃত্বাধীন আপৰ সহযোগিতাৰ প্ৰসঙ্গ। এনে পৰিস্থিতিত কেজৰিৱালৰ এই কৌশলী মন্তব্য স্বাভাৱিকতেই লক্ষণীয় হৈ পৰিছে।
