কথিত আছে এখন হাবিত দুটা বাঘে শাসন কৰিব নোৱাৰে। এটাই কৰিলে আনটোৱে নেজ পেলাই আঁতৰি যাব লাগিব। প্ৰধানমন্ত্ৰী মোদীৰ সৈতে সংঘটিত এক ঘটনাক্ৰমৰ পাছতে এই কথিত কথাষাৰ পুনৰ দেশত চৰ্চা লাভ কৰিছে।
আপোনালোকে চাগে ভাবিছে আমি ক’ৰ বাঘৰ কথা কৈ আছো? প্ৰজেক্ট টাইগাৰৰ ৫০ বছৰ সম্পূৰ্ণ হোৱাৰ উপলক্ষ্যে প্ৰধানমন্ত্ৰী নৰেন্দ্ৰ মোদীয়ে কৰ্ণাটকৰ বান্দীপুৰ টাইগাৰ ৰিজাৰ্ভত বাঘ দৰ্শন কৰিবলৈ গৈছিল। কিন্তু সেই দিনটোত প্ৰধানমন্ত্ৰী মোদীৰ ভাগ্য বেয়া আছিল। প্ৰায় দুণ্টা জীপ ছাফাৰী কৰিও এটা বাঘৰো দৰ্শন লাভ নকৰিলে প্ৰধানমন্ত্ৰী মোদীয়ে। প্ৰধানমন্ত্ৰী মোদীয়ে বাঘ দৰ্শনত ব্যৰ্থ হোৱাত এতিয়া জ্বলি পুৰি মৰিছে বিজেপিৰ নেতা-কৰ্মী। সেয়ে বিফল মনোৰথ লৈ প্ৰধানমন্ত্ৰী নৰেন্দ্ৰ মোদীয়ে টাইগাৰ ৰিজাৰ্ভখনৰ পৰা ওভতি অহাৰ পাছতে এতিয়া শাসকীয় বিজেপিৰ নেতা-কৰ্মীৰ মস্তিষ্কই উলিয়াইছে এক নতুন সূত্ৰ।
বিজেপিৰ নেতা-কৰ্মীৰ দাবী যে জীপ চালকৰ বাবেই প্ৰধানমন্ত্ৰী মোদীয়ে দৰ্শন লাভ নকৰিলে। মধুসূদন নামৰ ২৯ বছৰীয়া জীপ চালকজনে পুৱা ৭.১৫ বজাৰ পৰা ৯.৩০ লৈ প্ৰধানমন্ত্ৰীক লগত জীপ ছাফাৰী কৰিলেও প্ৰধানমন্ত্ৰী মোদীয়ে বাঘ দেখাত সমৰ্থ নহয়।
প্ৰধানমন্ত্ৰী নৰেন্দ্ৰ মোদীয়ে বাঘ দৰ্শন লাভ নকৰাত যত দোষ নন্দ ঘোষৰ দৰে দায়ী হ’লগৈ মধুসূদন নামৰ জীপ চালকজনৰ। চালকজনে ইচ্ছাকৃতভাৱে ভুল বাটেৰে নিয়াৰ বাবেই প্ৰধানমন্ত্ৰী মোদীয়ে বাঘৰ দৰ্শন লাভ নকৰিলে। এই দাবী শাসকীয় বিজেপিৰ। বিজেপিৰ দাবী যে এই দোষৰ শাস্তি হিচাপে চালকজনৰ জীপখনৰ অনুজ্ঞা বাতিল কৰিব লাগে। ইফালে মধুসূদনৰ বাহনখনৰ পঞ্জীয়ন বাতিল কৰা বুলিও সামাজিক সামাজিক মাধ্যমত প্ৰচাৰ হৈছে।
অৱেশ্যে বিজেপিৰ নেতা-কৰ্মীৰ এই নিকৃষ্ট প্ৰচাৰত ভেটা দিলে স্বয়ং সংৰক্ষিত বনাঞ্চলখনৰ কৰ্তৃপক্ষই। সংৰক্ষিত বনাঞ্চলখনৰ কৰ্তৃপক্ষই চালক মধুসূধনৰ কাষত থিয় দিছে। তেওঁলোকৰ মতে প্ৰধানমন্ত্ৰী বিশেষ নিৰাপত্তাৰক্ষী গোট, আৰক্ষী আৰু ৰিজাৰ্ভৰ কৰ্তৃপক্ষই আগতীয়াকৈ নিৰ্ধাৰণ কৰি যোৱা বাটেৰেহে চালকে প্ৰধানমন্ত্ৰী মোদীক ছাফাৰী কৰাইছিল। কৰ্তৃপক্ষৰ মতে চালকজনে তেওঁক দিয়া দায়িত্ব সুচাৰুৰূপে পালন কৰিছিল।
এতিয়া প্ৰশ্ন হয যত দোষ নন্দ ঘোষৰ দৰে কেৱল চালকক কিয় দোষ জাপি দিছে বিজেপিৰ নেতা-কৰ্মীয়ে? কিয় চালকজনক টাৰ্গেট কৰি লৈছে বিজেপিয়ে? পুনৰ প্ৰধানমন্ত্ৰীক দেৱতা সজাই প্ৰধানমন্ত্ৰীৰ নিৰাপত্তাত নিয়োজিত বিশেষ নিৰাপত্তা গোট আৰু বিজেপি শাসিত কৰ্ণাটক আৰক্ষীক ক্লীণশ্বিট দিবলৈ এই প্ৰপাগণ্ডা সৃষ্টি কৰিছে নেকি? এতিয়া দেশৰ সচেতন নাগৰিকৰ মনত এই প্ৰশ্ন খুন্দা মাৰিছে।
