অসমে বিহু নাচি গিনিজ বুক অৱ ৱৰ্ল্ড ৰেকৰ্ডৰ পৃষ্ঠাত নিজৰ নাম খোদিত কৰাৰ কিছুদিন পিছতে ৰাজ্যৰ বড়ো জনগোষ্ঠীয়ে এতিয়া ২০ হাজাৰৰো অধিক শিল্পীৰ সৈতে নতুন গিনিজ ৱৰ্ল্ড ৰেকৰ্ড গঢ়ি তোলাৰ লক্ষ্যৰে নিজৰ পৰম্পৰাগত বাগুৰুম্বা নৃত্য প্ৰদৰ্শনৰ বাবে সাজু হৈছে ।
সাংবাদিকৰ সৈতে হোৱা এক সাক্ষাৎকাৰত অল বড়ো ষ্টুডেণ্টছ ইউনিয়নৰ উপদেষ্টা কুসুম স্বৰ্গীয়াৰীয়ে কয় যে, “আপোনালোক সকলোৱে জানে যে যোৱা ১৪ এপ্ৰিলত গুৱাহাটীত বিহু নাচেৰে বিশ্ব অভিলেখ গঢ়াৰ পিছত চৰকাৰে এতিয়া গিনিজ ৱৰ্ল্ড ৰেকৰ্ডৰ লক্ষ্যৰে বড়ো সকলৰ লোকনৃত্য বাগাৰুম্বা নৃত্য প্ৰদৰ্শন কৰিবলৈ চিন্তা কৰিছে।”
বিটিআৰৰ কাৰ্যবাহী বিষয়া প্ৰমোদ বড়োৱে বাগুৰুম্বা নৃত্যক লৈ গিনিজ বুক অৱ ৱৰ্ল্ড ৰেকৰ্ডত বড়োসকলৰ বাগুৰুম্বা নৃত্যক অন্তৰ্ভুক্ত কৰাৰ পৰিকল্পনাৰ কথা ঘোষণা কৰিছে।
অহা বছৰলৈ হ’ব লগা বাগুৰুম্বাৰ মেগা ডান্সৰ বাবে ইতিমধ্যে প্ৰস্তুতি চলাইছে বড়ো সাহিত্য সভাকে ধৰি অন্যান্য বডো সংগঠনসমূহে।
অসমৰ মুখ্যমন্ত্ৰী হিমন্ত বিশ্ব শৰ্মাইও বড়ো সম্প্ৰদায়ৰ লোকনৃত্যক বিশ্ব দৰবাৰলৈ অনাৰ বাবে চৰকাৰে পদক্ষেপ গ্ৰহণ কৰিব বুলি ঘোষণা কৰিছে।
অহা বছৰ এই অনুষ্ঠানটি সফল হ’লে বাগুৰুম্বা নৃত্যই এক নতুন গিনিজ ৱৰ্ল্ড ৰেকৰ্ড গঢ়ি তুলিব আৰু অসমৰ বৈচিত্ৰময় সাংস্কৃতিক ঐতিহ্যক উজ্জ্বল কৰি তুলিব।
বডো সম্প্ৰদায়ে নিজৰ নৃত্য বিশ্বৰ মঞ্চত প্ৰদৰ্শন কৰাৰ প্ৰচেষ্টাই অঞ্চলটোৰ অনন্য পৰম্পৰাৰ প্ৰতি দৃষ্টি আকৰ্ষণ কৰাটো নিশ্চিত আৰু ভৱিষ্যত প্ৰজন্মৰ বাবে ইয়াক সংৰক্ষণ কৰাত সহায় কৰিব।
