গুৱাহাটীৰ জালুকবাৰীস্থিত ড° ভূপেন হাজৰিকা সমাধিক্ষেত্ৰত সৌন্দৰ্য উপভোগ কৰিবলৈ আহি কালি সন্ধিয়া শুভম কুমাৰ ৰায় নামৰ ১৬ বছৰীয়া কিশোৰ এজনে কৰুণ মৃত্যুক আকোৱালি ল’বলগীয়া হয়।
ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে এই ঘটনাত গভীৰ শোক প্ৰকাশ কৰিছে আৰু কি কাৰণত আৰু কাৰ ভুলৰ বাবে এজন কিশোৰে প্ৰাণ হেৰুৱাবলগীয়া হ’ল তাৰ এক সঠিক তদন্তৰ দাবী জনাইছোঁ।
ড° ভূপেন হাজৰিকা সমাধি ক্ষেত্ৰৰ চোৱা-চিতাৰ দায়িত্বত থকা লোকনিৰ্মাণ বিভাগৰ চূড়ান্ত দায়িত্বহীনতাৰ বাবে যে এই দুৰ্ঘটনাটো হ’বলৈ পালে সেয়া নিশ্চিত।
পৰিয়ালৰ সৈতে অতি আনন্দৰে সমাধি ক্ষেত্ৰৰ সৌন্দৰ্য উপভোগ কৰিবলৈ আহিছিল পাণ্ডুৰ বি বি চি কলনি নিবাসী শুভমে। কিন্তু আচৰিত কথা যে সমাধি ক্ষেত্ৰত ঘুৰি ফুৰতে শুভমে ফোৱাৰাৰ পানী স্পৰ্শ কৰে আৰু লগে লগে বিদ্যুৎস্পৃষ্ট হৈ ছটফটাই শেষ নিশ্বাস ত্যাগ কৰে।
এই ঘটনাই সকলো অংশৰ মানুহকে স্তম্ভিত আৰু ক্ষোভিত কৰি তুলিছে। ডি ৱাই এফ আইয়ে এই ঘটনাৰ ক্ষিপ্ৰ তদন্ত কৰি উপযুক্ত ব্যৱস্থা ল’বলৈ চৰকাৰৰ ওচৰত দাবী জনাইছে।
