NSA, UAPA, PSA, TADA, POTAৰ দৰে আইন কেইখন চৰকাৰে ব্ৰিটিছৰ দিনৰ পৰাই দেশৰ নিৰীহ জনগণৰ বিৰুদ্ধে বহু সময়ত নানা ধৰণৰ অজুহাতত ব্যৱহাৰ কৰি আহিছে।
বিভিন্ন চৰকাৰে বিভিন্ন সময়ত এনে ঔপনিৱেশিক আইন দেশৰ বিৰোধী ৰাজনৈতিক কৰ্মী, ট্ৰেড ইউনিয়নৰ নেতা, মানৱ অধিকাৰ কৰ্মী, সাংবাদিক, বুদ্ধিজীৱীৰ মাত স্তব্ধ কৰিবলৈ, প্ৰতিবাদী কণ্ঠ ৰুদ্ধ কৰিবলৈ ব্যৱহাৰ কৰা আমি দেখিছোঁ, আৰু এনে দমনকাৰী স্বভাৱ বৰ্তমানৰ চৰকাৰ খনৰ এক পৰিচিত চৰিত্ৰ।
এই কথাটো লগতে উপেক্ষা কৰিব নোৱাৰি যে কংগ্ৰেছ/বিজেপি/(আঞ্চলিক) সকলো চৰকাৰে এই কঠোৰ আইন কেইখন কাশ্মীৰী নাগৰিক সকলৰ বিৰুদ্ধে, ধৰ্মীয় সংখ্যালঘু, আদিবাসী, অসম, নাগালেণ্ড, মণিপুৰৰ ৰাজনৈতিক কৰ্মীসকলৰ বিৰুদ্ধে বাৰে বাৰে আৰু অতি সঘনাই ব্যৱহাৰ কৰিছে, বিশেষকৈ যেতিয়াই এই লোকসকলে নিজৰ ভূখণ্ডত ৰাষ্ট্ৰৰ সাম্ৰাজ্যবাদী লুণ্ঠন শাসন আৰু বিভিন্ন চৰকাৰৰ স্বৈৰাচাৰী আচৰণৰ বিৰুদ্ধে সজ্জোৰে প্ৰতিবাদ কৰিছে অথবা জনমত গঢ়িবলৈ চেষ্টা কৰিছে।
ৰাষ্ট্ৰই নিজৰ প্ৰজাৰ স্বাৰ্থ ৰক্ষাৰ পোছাকত, সন্ত্ৰাসবাদৰ বিৰুদ্ধে সক্ৰিয় হোৱাৰ ভাও জুৰি নিজৰ পক্ষত নথকা যিকোনো চেতনা/ধাৰণাক সুবিধাজনকভাৱে দমন কৰে, কৰি আহিছে, অসমৰ ৰাইজক ইয়াৰ উদাহৰণ বোৰ মনত পেলাই দিয়াৰ প্ৰয়োজন কিজানি নাই।
দিশপুৰীয়া ৰজাঘৰীয়াৰ পৃষ্ঠপোষকতা আৰু আশীৰ্বাদত কিন্তু জি.পি. সিঙে দুটা সমসাময়িক ঘটনাত ব্যৱস্থা গ্ৰহণ কৰি/নকৰি “অসমীয়া জাতিয়তাবাদী” চেতনাৰ বিৰুদ্ধে কিছু এপাত এৰিলে!
“অসমীয়া এইবোৰ ভাবি চোৱাৰ বহাগেই বতৰ কিজানি!
এইবোৰ দেখি-শুনি এলাই-এথানি, ক’বলৈ মন যায় কঁপাই ধৰণী,
নতুন পুৰুষে কিছু কাম কৰাৰ ব’হাগেই বতৰ কিজানি!”
