আম আদমি পাৰ্টীৰ ৰাজ্যিক কাৰ্যনিৰ্বাহকৰ এখন সভা আজি গোলাঘাট নগৰৰ নিকটৱৰ্তী ৰঙাজানত অনুষ্ঠিত হয়।
প্ৰথম বাৰৰ বাবে গুৱাহাটীৰ বাহিৰত অনুষ্ঠিত হোৱা কাৰ্যনিৰ্বাহকত তৃণমূলত দলৰ সাংগঠনিক কাম-কাজৰ পৰ্যালোচনা কৰা হয়।
সভাপতি ডা৹ ভবেন চৌধুৰীৰ সভাপতিত্বত আৰু অসমৰ বাবে ৰাষ্ট্ৰীয় তত্ত্বাৱধায়ক ৰাজেশ শৰ্মা ডাঙৰীয়াৰ উপস্থিতত অনুষ্ঠিত হোৱা সভাখনে দলৰ বিভিন্ন শাখা, যেনে মহিলা শক্তি, ছাত্ৰ শক্তি, যুৱ শক্তি আৰু সংখ্যালঘু শক্তিৰ কাম-কাজৰো অনাগত দিনত পৰিকল্পনা কৰা হয়।
সভাত আগন্তুক গাঁও পঞ্চায়ত আৰু লোকসভা নিৰ্বাচনৰ বিষয়ে গুৰুত্বপূৰ্ণ আলোচনা কৰি কেতবোৰ দলীয় সিদ্ধান্ত গ্ৰহণ কৰা হয়। অসমৰ ৰাজনীতি সততা আৰু কামৰ ৰাজনীতিলৈ ৰূপান্তৰ কৰিবলৈ অনাগত দিনত আম আদমি পাৰ্টীয়ে কাম কৰি যোৱাৰ সিদ্ধান্তৰে আজিৰ কাৰ্যনিৰ্বাহক সভাই ৰাজ্যখনৰ যুৱ প্ৰজন্মক তথা শিক্ষিত লোকসকলক ৰাজনীতিৰ পথাৰলৈ আগবাঢ়ি আহিবলৈ আহ্বান জনায়।
ৰাজ্যখনৰ কোনো লোকে যদি আহিবলগীয়া নিৰ্বাচনত প্ৰতিদ্বন্দ্বিতা কৰিবলৈ মনতে আশা পুহি ৰাখিছে, তেন্তে তেওঁলোকক আম আদমি পাৰ্টীয়ে আদৰণি জনাব। ৰাজ্যখনত কামৰ ৰাজনীতি প্ৰতিষ্ঠা কৰিবলৈ ইচ্ছুক সকলোৰে বাবে আপৰ দুৱাৰ খোলা আছে।
আজিৰ কাৰ্যনিৰ্বাহকত ৰাভা হাচং, সোণোৱাল-কছাৰি, মিচিং, ডিমা হাচাও আৰু কোচ-ৰাজবংশী স্বাৰত্ত শাসিত পৰিষদৰ নিৰ্বাচনত প্ৰতিদ্বন্দ্বিতা কৰিবৰ বাবে ৰণকৌশল প্ৰস্তুত কৰে। লোকসভা নিৰ্বাচনৰ সাম্ভাব্য প্ৰাৰ্থী চিনাক্ত কৰিবলৈ জিলা ভিত্তিত একোখনকৈ সমিতি গঠন কৰাৰ প্ৰস্তাৱ লোৱা হয়।
ইয়াৰ লগতে প্ৰতিমাহে ৰাজ্যিক কাৰ্যনিৰ্বাহকৰ সভাখন আন আন জিলাত আয়োজন কৰিবলৈ প্ৰস্তাৱ লোৱা হয়। সেই সূত্ৰে পৰৱৰ্তী কাৰ্যনিৰ্বাহক সভাখন শোণিতপুৰ জিলা সমিতিৰ আতিথ্যত আয়োজন কৰা হ’ব।
