মুখ্যমন্ত্ৰী হিমন্ত বিশ্ব শৰ্মাই শনিবাৰে ৰাজ্যৰ সকলো ৰাজ্যিক বিশ্ববিদ্যালয় আৰু মহাবিদ্যালয়ত ৰাষ্ট্ৰীয় শিক্ষা নীতি (এন ই পি), ২০২০ ৰ আৰম্ভ কৰাৰ কথা ঘোষণা কৰে।
উল্লেখ্য যে সমগ্ৰ দেশৰ ভিতৰতে এন ই পি ২০২০ ৰূপায়ণ কৰা প্ৰথম ৰাজ্যসমূহৰ ভিতৰত অসম অন্যতম ।
এন ই পি আৰম্ভ হোৱাৰ লগে লগে সমগ্ৰ ৰাজ্যৰ সকলো উচ্চ শিক্ষানুষ্ঠানে স্নাতকৰ পাঠ্যক্ৰম তিনি বছৰৰ পৰা চাৰি বছৰলৈ বৃদ্ধি কৰিব লাগিব।
মুখ্যমন্ত্ৰীয়ে টুইটযোগে কয়, “ভাৰতৰ প্ৰয়োজন সমূহ সহজ কৰি তুলিবলৈ মাননীয় প্ৰধানমন্ত্ৰী নৰেন্দ্ৰ মোডীয়ে ৰাষ্ট্ৰীয় শিক্ষা নীতি, ২০২০ ৰ কল্পনা কৰিছিল।”
তেওঁ লগতে কয়, ‘সেই লক্ষ্যত উপনীত হোৱাৰ লগতে শিক্ষণৰ একাধিক পথ সৃষ্টিৰ বাবে অসমে আজি মহাবিদ্যালয় আৰু বিশ্ববিদ্যালয় সমূহত চাৰি বছৰীয়া স্নাতক ডিগ্ৰীৰ কাৰ্যসূচী আৰম্ভ কৰিছে।
ভাৰতীয় শিক্ষা ব্যৱস্থালৈ বৈপ্লৱিক পৰিৱৰ্তন অনাৰ লক্ষ্যৰে ৰাষ্ট্ৰীয় শিক্ষা নীতি (এন ই পি) ২০২০ৰ আধাৰত এই পাঠ্যক্ৰমসমূহ প্ৰস্তুত কৰা হ’ব।
নতুন কাৰ্যসূচীৰ সফল ৰূপায়ণ নিশ্চিত কৰিবলৈ গুৱাহাটী বিশ্ববিদ্যালয়ে ইতিমধ্যে বিষয়টো আলোচনা কৰি বিভিন্ন সমিতি আৰু মঞ্চৰ পৰা অনুমোদন লাভ কৰিছে। গুৱাহাটী বিশ্ববিদ্যালয়ৰ উপাচাৰ্যৰ অধ্যক্ষতাত একাডেমিক কাউন্সিলেও চাৰি বছৰীয়া স্নাতক কাৰ্যসূচীৰ পাঠ্যক্ৰমত অনুমোদন জনাইছে।
