ঝাৰখণ্ডৰ ধনবাদত সংঘটিত হৈছে এক শোকাৱহ ঘটনা। ভৌৰা কলিয়াৰী এলেকাত অবৈধভাৱে পৰিচালিত এটা খনি খহি পৰাৰ ফলস্বৰূপে তিনিগৰাকী লোকৰ মৃত্যু হোৱাৰ লগতে কেইবাগৰাকীও আবদ্ধ হৈ পৰিছে স্খলনস্থলীত।
ভাৰত ককিং কয়লা লিমিটেড (BCCL)ৰ ভৱৰা কলিয়াৰী এৰিয়াত সংঘটিত হয় এই ঘটনা। জিলাখনৰ এগৰাকী উচ্চপদস্থ আৰক্ষী বিষয়াই জানিবলৈ দিয়া মতে, এই ঘটনাৰ পিছতে উদ্ধাৰ অভিযান আৰম্ভ কৰা হয়।
অৱ্যশ্যে উদ্ধাৰকাৰী দলটোৰ উদ্ধাৰ অভিযান সমাপ্ত হোৱাৰ পিছতহে ঘটনাত নিহত আৰু আহত হোৱা লোকসকলৰ লগতে ঘটনাস্থলীত আৱদ্ধ হৈ থকা লোকসকলৰ সঠিক সংখ্যা জানিব পৰা যাব বুলি আৰক্ষী বিষয়াগৰাকীয়ে উল্লেখ কৰে।
ইফালে ঘটনা সন্দৰ্ভত এগৰাকী প্ৰত্যক্ষদৰ্শীয়ে জানিবলৈ দিয়া মতে, খনিটো খহি পৰাৰ সময়ত গাঁৱৰ বহু স্থানীয় লোক অবৈধ খননত লিপ্ত হৈছিল।
তেওঁ লগতে কয় যে স্থানীয় লোকৰ সহায়ত স্খলনস্থলীৰ পৰা তিনিগৰাকী ব্যক্তিক উলিয়াই আনি চিকিৎসালয়লৈ লৈ যোৱা হয় যদিও চিকিৎসকে আটাইকেইগৰাকীকে মৃত ঘোষণা কৰে।
