মাৰমেইড অৰ্থাৎ জলপৰী বা মৎসকন্যা। এণ্ডাৰচনৰ সাধু পঢ়াসকল এই কাহিনীৰ বিষয়ে অৱগত। এই কল্পকাহিনীৰ আলমত ১৯৮৯চনত ডিজনীয়ে একে নামেৰেই এই ছবিখন নিৰ্মাণ কৰিছিলে। যেতিয়াৰ পৰা এই ছবিখন নিৰ্মাণৰ কথা চলিছিলে,তেতিয়াৰে পৰাই ছবিখনক লৈ যথেষ্ট জল্পনা-কল্পনাও চলিছিলে। গত ৮মে’ তাৰিখে মুক্তিপ্ৰাপ্ত এই ছবিখন বৰ্তমানেও চিত্ৰগৃহত চলি আছে। পৰিচালনা ৰব মাৰ্ছেলৰ আৰু চিত্ৰনাট্য-ডেভিড মেগীৰ। এই ছবিৰ নিৰ্মাণৰ প্ৰকাৰক- “লাইভ এক্সন এডাপচন”- বুলি কোৱা হয়।
চিনেমাৰ আৰম্ভণি ঘটে জোৱাৰ-ভাটাৰ নীলাভ ৰঙৰ মাজত। দৃষ্টিনন্দন সাগৰ আৰু সাগৰতলীৰ ৰাজ্য এটলান্টিকাৰ আটাইতকৈ সৰু ৰাজকুমাৰী এৰিয়েল আন ৰাজকুমাৰীকেইজনীৰ দৰে নহয়। এৰিয়েল আনুসান্ধিৎসু,উৎসুক আৰু নিত্যনতুনতাৰ প্ৰতি আগ্ৰহী। সাগৰতলীৰ বাদেও বাহ্যিক পৃথিৱীখন চাবৰ অপাৰ আগ্ৰহ। এইখিনিতে দা লিটিল মাৰমেইডক ২০২১বৰ্ষৰ ডিজনীৰেই এনিমেটেড ছবি-“লুকা”ৰ লগত এক সংযোগ দেখিবলৈ পোৱা যায়। মাথোঁ দা লিটিল মাৰমেইডতকৈ লুকা এখন ছবিৰূপে বহুগুণে উন্নত আছিল। আৰু এইখিনিৰে পৰাই ছবিখনৰো উত্থানৰ এক বিৰাট সুযোগ আছিলে। আৰম্ভণিৰে পৰাই সাংগিতীক কল্পকাহিনীৰ ছবি যিহেতু গীতৰ প্ৰয়োগ আছে। ডিঅ’ন বীবেৰ আলোকশিল্পৰ কাম চকুত লগা সমগ্ৰ চিনেমাখনতেই। পিছে ডিজনীৰ এই মহা-আয়োজনৰ ছবিখনত অতিকৈ মন্থৰ গতিৰ বাবে অতি আমনিদায়ক এখন ছবি হৈ ৰ’ল। আৰু চিত্ৰনাট্যত থকা খুঁটৰ বাবে কোনো সময়তেই কোনোধৰণৰেই আৱেগ-বিষাদ,আনন্দ,প্ৰেম,যন্ত্ৰণা,কূটিলতা,জটিলতা তথা হাস্যৰস একোৰেই লগতেই সংযুক্ত হোৱাৰ থলেই নাছিল। ৰাজকুমাৰ-ৰাজকুমাৰীৰ প্ৰেম,প্ৰেমত বাধা,বাধা নেওচি মিলন-আদিবোৰৰ কল্পকাহিনীৰ কথন হয়তোবা কিবাকৈ শিশুৰ বাবে মনোৰঞ্জক হ’ব পাৰে,কিন্তু প্ৰাপ্তবয়স্কসকলৰ বাবে এই ছবিখনৰ দুঘন্টাৰ দৈৰ্ঘ্য পাৰ কৰা কঠিন। এক কথাত ডিজনীৰ এই বৃহৎ আয়োজন এক ব্যৰ্থ প্ৰয়াসৰ বাদে আন একো নহয়।
ৱেইট স্মিথৰ সম্পাদনাৰ দিশ ভাল। এলেন মেনকেনৰ আৱহ- সংগীতৰ লগতেই সংগীত পৰিচালনাৰ সামগ্ৰিক দিশটিও ভাল লগা এক অংশ ছবিখনৰ। হাল্লে বেইলীয়ে মূখ্য চৰিত্ৰত অৰ্থাৎ মাৰমেইড এৰিয়েলৰ চৰিত্ৰত অভিনয় কৰিছে।
-ৰিমলী বৰকটকী।
মেইল- [email protected]
