ছাফ চেম্পিয়নশ্বিপৰ খিতাপ অক্ষুণ্ণ ৰখাৰ দৌৰত আৰু এখোজ আগবাঢ়িছে ডিফেণ্ডিং চেম্পিয়ন ভাৰত। ভাৰতীয় দলক সন্মুখৰ পৰা নেতৃত্ব দি বিগত দেওবাৰে ইণ্টাৰকণ্টিনেণ্টেল কাপত শ্ৰেষ্ঠত্ব অৰ্জনত প্ৰধান ভূমিকা লোৱা ভাৰতীয় ফুটবলৰ মহানায়ক ছেত্ৰীৰ নেতৃত্বতে ক্ৰমাগত দ্বিতীয়টো খিতাপ অৰ্জনৰ দিশত অগ্ৰসৰ হৈছে প্ৰবল আত্মবিশ্বাসী ভাৰতীয় দল।
আজি ছাফ চেম্পিয়নশ্বিপৰ নিজৰ দ্বিতীয়খন মেচত নেপালক ২-০ গলত পৰাস্ত কৰি ভাৰত অগ্ৰসৰ হৈছে ছেমিফাইনেললৈ। প্ৰতিযোগিতাৰ প্ৰথম মেচত পাকিস্তানৰ বিপক্ষে দৰ্শনীয় হেট্ৰিকেৰে জয়ৰ নায়ক হৈ পৰা অধিনায়ক সুনীল ছেত্ৰীয়ে আজিৰ জয়তো পালন কৰে গুৰুত্বপূৰ্ণ ভূমিকা।
নেপালৰ বিৰুদ্ধে আজিৰ মেচখনত অৱশ্যে প্ৰথমাৰ্ধত ভাৰতীয় দলৰ প্ৰদৰ্শন আছিল পূৰ্বৰ মেচখনৰ তুলনাত কিছু দুৰ্বল। এই দুৰ্বলতাৰ বাবেই প্ৰথমাৰ্ধত নেপালৰ গলবক্সত আঘাত সনাত ব্যৰ্থ হয় ভাৰতীয় দল। অৱশ্যে দ্বিতীয়াৰ্ধত ছন্দোদয় ঘটা ভাৰতীয় দলটোৱে ক্ৰমাগত আক্ৰমণেৰে নেপালৰ ডিফেঞ্চ ব্যতিব্যস্ত কৰি তোলে।
ধাৰাবাহিক আক্ৰমণৰ চোক বৃদ্ধি কৰি খেলৰ ৬১ মিনিটত প্ৰথমটো সফলতা লাভ কৰে ভাৰতে। দলৰ মেৰুদণ্ডস্বৰূপ সুনীল ছেত্ৰীৰ জৰিয়তে আহে এই সফলতা। নাওৰেম মহেশ সিঙে বাওঁফালেৰে ছেত্ৰীলৈ আগুৱাই দিয়া এক নিখুঁত পাছ নেপালৰ নেটলৈ ঠেলি ভাৰতক প্ৰথমটো অগ্ৰগতি দিয়ে ছেত্ৰীয়ে।
ইয়াৰ পাছতে অধিক বৃদ্ধি পায় ভাৰতৰ আক্ৰমণ। বিশেষকৈ নেপালৰ ডিফেঞ্চত একপ্ৰকাৰে ত্ৰাস হৈ পৰে নাওৰেম-ছেত্ৰী যুটী। ৬৯ মিনিটত সাহালে ঠেলি দিয়া বলত ছেত্ৰীয়ে পুনৰ নেপালৰ নেট অভিমুখে শ্বট লয় যদিও নেপালৰ গলৰক্ষকে ছেত্ৰীৰ শ্বট প্ৰতিহত কৰে।
কিন্তু গলৰক্ষকৰ হাতৰ পৰা বল গলপোষ্টত লাগে আৰু ঘূৰি আহি বল পুনৰ পৰে নাওৰেমৰ ভৰিত। সুযোগ সন্ধানী নাওৰেমে এই সহজ সুযোগ গললৈ ৰূপান্তৰিত কৰি ভাৰতৰ জয় নিশ্চিত কৰাৰ লগতে দেশৰ হৈ প্ৰথমটো গল স্ক’ৰ কৰাৰ সাফল্য অৰ্জন কৰে।
উল্লেখ্য যে, আজিৰ এই মেচখনত ভাৰতীয় দলৰ ষ্টেণ্ডত উপস্থিত নাছিল মুখ্য প্ৰশিক্ষক ইগ’ৰ ষ্টিমাক। পূৰ্বৰ মেচখনত ৰেড কাৰ্ডৰ সন্মুখীন হোৱাৰ বাবে আজিৰ মেচখনত নিলম্বিত হ’বলগা হৈছিল প্ৰশিক্ষকগৰাকী। অৱশ্যে ষ্টিমাক অবিহনেই ভাৰতীয় দলে ক্ৰমাগত অষ্টমখন মেচত ক্লিন শ্বীট ৰাখিবলৈ সক্ষম হয়।
ছেমি ফাইনেললৈ অগ্ৰসৰ হোৱা ভাৰতৰ অৱশ্যে সূচী অনুসৰি গ্ৰুপ পৰ্যায়ৰ আৰু এখন মেচ বাকী আছে। অহা ২৭ জুনত কুৱেইটৰ বিপক্ষে গ্ৰুপৰ অন্তিমখন মেচত অৱতীৰ্ণ হ’ব ডিফেণ্ডিং চেম্পিয়ন দলটো।
