তামিলনাডুৰ ৰাজ্যপাল আৰ এন ৰবিয়ে মুখ্যমন্ত্ৰীৰ লগত পৰামৰ্শ নকৰাকৈয়ে বৰ্খাস্ত কৰে কাৰাগাৰত থকা মন্ত্ৰীক। ষ্টেলিন চৰকাৰৰ মন্ত্ৰী ভি চেন্থিল বালাজী নিযুক্তিৰ দুৰ্নীতি আৰু আৰ্থিক অপব্যৱহাৰৰ অভিযোগত কাৰাগাৰত আছে। বৃহস্পতিবাৰে ৰাজ্যপালগৰাকীয়ে চেন্থিলৰ মন্ত্ৰী পদ খাৰিজ কৰে। এইটো তামিল ৰাজনীতিত ‘অভূতপূৰ্ব’ ঘটনা বুলি গণ্য কৰা হৈছে।
এই ঘটনাক কেন্দ্ৰ কৰিয়েই এই দক্ষিণৰ ৰাজ্যখনৰ ৰাজ্যপাল আৰু ৰাজ্য চৰকাৰৰ মাজৰ সংঘাত চৰম সীমাত উপনীত হ’ল। সূত্ৰ অনুসৰি ষ্টেলিন চৰকাৰে ৰাজ্যপালৰ সিদ্ধান্তক প্ৰত্যাহ্বান জনাই উচ্চতম ন্যায়ালয়লৈ যাব পাৰে।
নিযুক্তিৰ ক্ষেত্ৰত দুৰ্নীতি আৰু আৰ্থিক অপব্যৱহাৰৰ অভিযোগত প্ৰৱৰ্তনকাৰী সঞ্চালকালয়ে (ইডি) মন্ত্ৰী চেন্থিলৰ ঘৰত অভিযান চলায়। প্ৰায় ১৮ ঘণ্টাৰ জেৰাৰ অন্তত ১৪ জুনত তেওঁক গ্ৰেপ্তাৰ কৰা হৈছিল। বুকুৰ বিষৰ বাবে সেন্থিলক ততাতৈয়াকৈ চিকিৎসালয়লৈ লৈ যোৱা হয়। চিকিৎসকে তেওঁৰ ক’ৰ’নাৰী এঞ্জিওগ্ৰাম কৰি তৎক্ষণাত বাইপাছ অস্ত্ৰোপচাৰৰ পৰামৰ্শ দিয়ে।
যোৱা বুধবাৰে আদালতত হাজিৰ কৰোৱা হৈছিল চেন্থিলক। আদালতে তেওঁক ১২ জুলাইলৈকে কাৰাগাৰত ৰখাৰ নিৰ্দেশ দিয়ে। বৃহস্পতিবাৰে তামিলনাডু ৰাজভৱনৰ এক বিবৃতিত কোৱা হৈছে যে, ‘’বালাজী আৰ্থিক আত্মসাতকে ধৰি কেইবাটাও গুৰুতৰ দুৰ্নীতিৰ গোচৰত বিচাৰাধীন হৈ আছে। এজন মন্ত্ৰীয়ে নিজৰ পদৰ অপব্যৱহাৰ কৰি তদন্তত প্ৰভাৱ পেলাইছে। আইন আৰু ন্যায়ত বাধা দিছে। এনে পৰিস্থিতিত ৰাজ্যপালে লগে লগে তেওঁক কেবিনেটৰ পৰা অপসাৰণ কৰে।”
সাধাৰণতে এজন মন্ত্ৰীক মুখ্যমন্ত্ৰীয়ে কেবিনেটৰ পৰা অপসাৰণ কৰিব পাৰে। মুখ্যমন্ত্ৰীৰ পৰামৰ্শৰ ভিত্তিত এই সিদ্ধান্তত ছীল-মোহৰ মাৰে ৰাজ্যপালগৰাকীয়ে। কিন্তু এই ক্ষেত্ৰত মুখ্যমন্ত্ৰীৰ সৈতে কোনো ধৰণৰ আলোচনা নকৰাকৈ দলৰ মন্ত্ৰীজনক ‘একপক্ষীয়ভাৱে’ অপসাৰণ কৰাত ক্ষোভ প্ৰকাশ কৰিছে ডি এম কে চৰকাৰে। এই সন্দৰ্ভত মুখ্যমন্ত্ৰী এম কে ষ্টেলিনে কয় যে, “মন্ত্ৰীক অপসাৰণ কৰাৰ কোনো অধিকাৰ ৰাজ্যপালৰ নাই। আমি আইনী পথত যাম।”
ইপিনে, ৰাজ্যপালৰ সৈতে ষ্টেলিন চৰকাৰৰ সংঘাত অৱশ্যে নতুন কথা নহয়। ৰাজ্যপালৰ ‘অসাংবিধানিক’ আচৰণক লৈ যোৱা বছৰ ডি এম কেই ৰাষ্ট্ৰপতি দ্ৰৌপদী মুৰ্মুক আবেদন দিছিল।
অৱশ্যে মুখ্যমন্ত্ৰী ষ্টেলিনে চেন্থিলক গ্ৰেপ্তাৰ কৰাৰ পিছতো কেবিনেট পদৰ পৰা অপসাৰণ কৰা নাছিল। তেওঁ চেন্থিলক দপ্তৰহীন মন্ত্ৰী হিচাপে ৰাখি থৈছিল। বৃহস্পতিবাৰে ৰাজ্যপালগৰাকীয়ে চেন্থিলৰ কেবিনেট পদ কাঢ়ি লয়।
