বাহাল থাকিল চুৰাট আদালতৰ ৰায়। নিৰ্দোষ সাব্যস্ত নহ’ল ৰাহুল গান্ধী। আজি গুজৰাট উচ্চ ন্যায়ালয়ত নাকচ হ’ল ৰাহুল গান্ধীৰ আবেদন। উচ্চ ন্যায়ালয়ত বিমুখ হোৱাৰ পিছত এতিয়া কংগ্ৰেছ নেতাগৰাকীৰ সমুখত কেৱল উচ্চতম ন্যায়ালয়।
চাৰি বছৰ পুৰণি ‘মোদী উপাধি’ কেন্দ্ৰিক গোচৰত চলিত বৰ্ষৰ মাৰ্চ মাহত চুৰাট আদালতে ৰাহুল গান্ধীক দোষী সাব্যস্ত কৰি দিয়া ৰায়দানত স্থগিতাদেশ বিচাৰি কংগ্ৰেছ নেতাগৰাকী গুজৰাট উচ্চ ন্যায়ালয়ৰ কাষ চাপিছিল যদিও আদালতে আজি গান্ধীৰ আবেদন নাকচ কৰে।
গুজৰাট উচ্চ ন্যায়ালয়ৰ ন্যায়াধীশ হেমন্ত প্ৰচ্ছকৰ বিচাৰপীঠে আজি গান্ধীৰ আবেদন সন্দৰ্ভত ৰায়দান কৰি কয় যে ৰাহুল গান্ধীৰ বিৰুদ্ধে আৰু প্ৰায় আঠটা অপৰাধমূলক মানহানিৰ অভিযোগ বিচাৰাধীন হৈ আছে। আদালতে লগতে গান্ধীৰ স্থগিতাদেশ আবেদনৰ কোনো ভিত্তি নাই বুলি উল্লেখ কৰে।
উচ্চ ন্যায়ালয়ৰ বিচাৰপীঠে ৰাহুল গান্ধীক দোষী সাব্যস্ত কৰি কৰা চুৰাট আদালতৰ ৰায়ক ন্যায্য, সঠিক আৰু আইনী আখ্যা দিয়ে। বিচাৰপীঠে কয়, “বৰ্তমানৰ গোচৰৰ পিছতো তেওঁৰ বিৰুদ্ধে আৰু কিছুমান গোচৰ ৰুজু হৈ আছে। তেনে এটা গোচৰ দাখিল কৰিছে সাৱৰকাৰৰ নাতিয়ে।”
অৱশ্যে, ইতিপূৰ্বে আদালতে দুবছৰৰ কাৰাদণ্ডৰ শাস্তি স্থগিত ৰখাৰ বাবে ৰাহুল গান্ধী এতিয়া কাৰাৰুদ্ধ নহয়। কিন্তু, চুৰাট আদালতৰ ৰায়ৰ পিছতে তেওঁৰ সাংসদ পদ খাৰিজ হোৱাৰ বাবে ২০ জুলাইৰ পৰা আৰম্ভ হ’বলগীয়া সংসদৰ আগন্তুক অধিৱেশনত গান্ধীয়ে ভাগ ল’ব নোৱাৰিব।
আজি উচ্চ ন্যায়ালয়ে গান্ধীৰ আবেদন নাকচ কৰাৰ বাবে এতিয়া তেওঁ উচ্চতম ন্যায়ালয়ৰ কাষ চাপিব লাগিব। যদি উচ্চতম ন্যায়ালয়েও তেওঁৰ অনুৰোধ নাকচ কৰে, তেতিয়া অহা বৰ্ষত অনুষ্ঠিত হ’বলগীয়া লোকসভা নিৰ্বাচনত ৰাহুল গান্ধীয়ে প্ৰতিদ্বন্দ্বিতা কৰিব নোৱাৰে।
এনে পৰিস্থিতিত স্বাভাৱিকতেই আগন্তুক লোকসভা নিৰ্বাচনৰ প্ৰাকমুহূৰ্তত কংগ্ৰেছৰ বাবে এয়া এক মোক্ষম আঘাত হিচাপে বিবেচিত হ’ব।
উল্লেখ্য যে, ২০১৯ চনৰ লোকসভা নিৰ্বাচনৰ পূৰ্বে কৰ্ণাটকৰ কোলাৰত এক সভাত নিজ বক্তব্যত ৰাহুল গান্ধীয়ে ‘সকলো চোৰৰ উপাধি মোদী কিয় হয়’ বুলি মন্তব্য কৰিছিল। ইয়াৰ পিছতে বিজেপিৰ বিধায়ক তথা গুজৰাটৰ প্ৰাক্তন মন্ত্ৰী পূৰ্ণেশ মোদীয়ে দাখিল কৰিছিল এজাহাৰ।
পূৰ্ণেশ মোদীৰ এই এজাহাৰৰ ভিত্তিত ৰাহুল গান্ধীৰ বিৰুদ্ধে গোচৰ ৰুজু কৰা হৈছিল। চলিত বৰ্ষৰ মাৰ্চ মাহত এই গোচৰৰ ৰায়দান কৰি চুৰাট আদালতে ৰাহুল গান্ধীক দোষী সাব্যস্ত কৰে আৰু তেওঁক দুবছৰৰ কাৰাদণ্ডৰ শাস্তিৰে দণ্ডিত কৰে।
অৱশ্যে আদালতে কংগ্ৰেছ নেতাগৰাকীক জামিন মঞ্জুৰ কৰি ৩০ দিনৰ বাবে শাস্তি স্থগিত ৰাখে আৰু এই ৰায়ৰ বিৰুদ্ধে আপীল কৰিবলৈ অনুমতি দিয়ে। পিছত চুৰাট আদালতৰ এই ৰায়ক গুজৰাট উচ্চ ন্যায়ালয়ত প্ৰত্যাহ্বান জনাইছিল কংগ্ৰেছ নেতাগৰাকীয়ে।
২০১৯ চনৰে এক মন্তব্যৰ বাবে চুৰাট আদালতৰ দ্বাৰা দুবছৰৰ কাৰাদণ্ডৰে দণ্ডিত হোৱা কংগ্ৰেছ নেতা ৰাহুল গান্ধীৰ আগন্তুক দুটা বছৰৰ ঠিকনা আজি নিৰ্ণয় কৰিব গুজৰাট উচ্চ ন্যায়ালয়ে। চূড়ান্ত শুনানিৰ প্ৰায় দুইমাহৰ পিছত আজি এই গোচৰৰ ৰায়দানৰ বাবে সাজু হৈছে গুজৰাট উচ্চ ন্যায়ালয়।
