বিৰোধী মিত্ৰজোঁট ইণ্ডিয়ান নেশ্যনেল ডেভেলপমেণ্ট ইনক্লুছিভ এলায়েন্সে (ইণ্ডিয়া) সংসদত মণিপুৰৰ হিংসাক লৈ অনিৰ্দিষ্টকালীন বিতৰ্কৰ দাবী জনাই মোডী চৰকাৰৰ ওপৰত হেঁচা বৃদ্ধিৰ বাবে লোকসভাত অনাস্থা প্ৰস্তাৱ আনিবলৈ সাজু হৈছে। সূত্ৰ অনুসৰি এই ক্ষেত্ৰত আম আদমি পাৰ্টিৰ ৰাজ্যসভাৰ সাংসদ ৰাঘৱ চাড্ডাই উদ্যোগ লৈছে।
উল্লেখ্য যে ২০ বছৰৰ পাছত বিৰোধীয়ে দেশৰ এখন নিৰ্বাচিত চৰকাৰৰ বিৰুদ্ধে অনাস্থা প্ৰস্তাৱ উত্থাপন কৰিবলৈ ওলাইছে। ইয়াৰ পূৰ্বে ২০০৩ চনত অটল বিহাৰী বাজপেয়ী নেতৃত্বাধীন এন ডি এ চৰকাৰৰ বিৰুদ্ধে শেষবাৰৰ বাবে অনাস্থা প্ৰস্তাৱ অনা হৈছিল।
মণিপুৰৰ হিংসাক লৈ সংসদৰ ভিতৰত বিৰোধী আৰু চৰকাৰৰ মাজত চলি থকা সংঘাতৰ মাজতে মঙলবাৰে পুৱা ৰাজ্যসভাৰ বিৰোধী দলপতি মল্লিকাৰ্জুন খৰ্গেৰ কাৰ্যালয়ত বিৰোধী দলসমূহৰ সংসদীয় নেতাসকলে এক বৈঠকত মিলিত হৈ সংসদত তেওঁলোকৰ পৰৱৰ্তী কৌশলৰ বিষয়ে আলোচনা কৰে। তাতেই লোকসভাত অনাস্থা প্ৰস্তাৱ উত্থাপন কৰাৰ সিদ্ধান্ত লোৱা হৈছে।
লগতে পঢ়ক: আই আৰ চি টি চিৰ ৱেবছাইটৰ চাৰ্ভাৰ ডাউন; দূৰণীবটীয়া যাত্ৰীয়ে কাটিব পৰা নাই ৰে’লৰ টিকট
এই বৈঠকত কংগ্ৰেছ নেতা জয়ৰাম ৰমেশ, প্ৰমোদ তিৱাৰী, আম আদমি পাৰ্টিৰ ৰাঘৱ চাড্ডা, তৃণমূল কংগ্ৰেছৰ ডেৰেক অ’ব্ৰাইন আদি উপস্থিত থাকে।
সূত্ৰ অনুসৰি ইণ্ডিয়া মিত্ৰজোঁটৰ সকলো পক্ষই অনাস্থা প্ৰস্তাৱ আগবঢ়াবলৈ সন্মতি প্ৰকাশ কৰিছে। হিংসাত্মক পৰিস্থিতিৰ সৃষ্টি হোৱা মণিপুৰৰ পৰিস্থিতি সন্দৰ্ভত প্ৰধানমন্ত্ৰী নৰেন্দ্ৰ মোডীক সংসদত কেনেদৰে ভাষণ দিবলৈ বাধ্য কৰিব পাৰি সেই সন্দৰ্ভত বিভিন্ন বিকল্পৰ ওপৰত আলোচনা হোৱাৰ পিছতে এই সিদ্ধান্ত গ্ৰহণ কৰা হয়। বিৰোধীয়ে ধাৰণা কৰিছে যে এই বিষয়টোৰ ওপৰত চৰকাৰক আলোচনা আৰম্ভ কৰিবলৈ বাধ্য কৰাবলৈ এয়া এক ফলপ্ৰসূ উপায়।
কিন্তু কেৱল লোকসভাতে নহয় বিৰোধী দলসমূহে মণিপুৰ বিষয়ক লৈ ৰাজ্যসভাতো বিজেপি চৰকাৰক কেনেদৰে নিৰস্ত্ৰ কৰিব পাৰি তাৰ কৌশল ৰচনা কৰিছে। উল্লেখযোগ্য যে কংগ্ৰেছ আৰু অন্যান্য বিৰোধী দলসমূহে সংসদত বিতং আলোচনা আৰু মণিপুৰৰ পৰিস্থিতি সন্দৰ্ভত প্ৰধানমন্ত্ৰী নৰেন্দ্ৰ মোডীৰ বক্তব্যৰ দাবী জনাইছে।
লগতে পঢ়ক:মণিপুৰত জনগোষ্ঠীয় হিংসাৰ বিৰুদ্ধে আইজলত হাজাৰ হাজাৰ লোকৰ প্ৰতিবাদ
২০ জুলাইৰ পৰা আৰম্ভ হৈছে সংসদৰ বৰ্ষাকালীন অধিৱেশন। তেতিয়াৰ পৰাই লোকসভা আৰু ৰাজ্যসভা বিৰোধীৰ প্ৰতিবাদ আৰু শ্লোগানেৰে উত্তাল হৈ পৰিছে।
এই সন্দৰ্ভত সংসদীয় মন্ত্ৰী প্ৰহ্লাদ যোশীয়ে কয় যে বিৰোধীয়ে অনাস্থা প্ৰস্তাৱ আনিব আনক। চৰকাৰে সেইটো লৈ চিন্তিত নহয়। চৰকাৰৰ হাতত পৰ্যাপ্ত সংখ্যা আছে। দৰাচলতে বিৰোধী সাংসদকে ধৰি সমগ্ৰ দেশেই জানে যে এন ডি এৰ লোকসভাত যিমান সাংসদ আছে, তাৰ লগে লগে বিৰোধীৰ হাতত অনাস্থা প্রস্তাৱ উত্থাপন কৰি নৰেন্দ্র মোডী চৰকাৰৰ আসনখন লৰাব পৰাৰ ক্ষমতা নাই৷
দৰাচলতে এই প্ৰস্তাৱ অনাৰ আঁৰৰ বিৰোধীৰ লক্ষ্য হৈছে প্ৰধানমন্ত্ৰীক সংসদত ভাষণ দিবলৈ বাধ্য কৰা। চৰকাৰৰ বিৰুদ্ধে অনাস্থা প্রস্তাৱ আনিলে ভোটদানৰ আগে আগে সেই প্রস্তাৱটোৰ ওপৰত বিতর্ক হয়৷ চৰকাৰৰ মুৰব্বীগৰাকীয়ে এই প্ৰস্তাৱৰ প্ৰতি সঁহাৰি জনায়।
২০০৩ চনত কংগ্ৰেছ আৰু অন্যান্য বিৰোধী দলসমূহে অটল বিহাৰী বাজপেয়ী চৰকাৰৰ বিৰুদ্ধে অনাস্থা প্ৰস্তাৱ দাখিল কৰি তদানীন্তন প্ৰতিৰক্ষা মন্ত্ৰী জৰ্জ ফাৰ্নাণ্ডেছক কেন্দ্ৰীয় কেবিনেটলৈ পুনৰ নিযুক্তি দিয়াৰ প্ৰতিবাদ কৰিছিল। যদিও এই সংখ্যা বাজপেয়ীৰ পক্ষত আছিল, তথাপিও এই অনাস্থা প্ৰস্তাৱক বিৰোধীয়ে চৰকাৰৰ বিৰুদ্ধে কেইবাটাও অভিযোগ উত্থাপন কৰাৰ সুযোগ হিচাপে ব্যৱহাৰ কৰিছিল।
লগতে পঢ়ক:Honda Monkey: নতুন বাইক ১২৫ চিচিৰ হোণ্ডা মাংকি মুকলি; চেহেৰা দেখি লাগিব ভেল্কি!
নিৰ্বাচনত চৰকাৰে সহজ জয় লাভ কৰিছিল। এন ডি এয়ে লাভ কৰে ৩১২টা আৰু বিৰোধীয়ে ১৮৬টা ভোট লাভ কৰে। AIADMK, নেছনেল কনফাৰেন্সে ভোটদানৰ পৰা বিৰত থাকে। মায়াৱতীৰ বহুজন সমাজ পাৰ্টিয়ে চৰকাৰৰ পক্ষত ভোট দিয়ে। ২০১৮ চনত ৱাই এছ আৰ কংগ্ৰেছে মোডী চৰকাৰৰ বিৰুদ্ধে অনাস্থা প্ৰস্তাৱ উত্থাপন কৰিবলৈ বিচাৰিছিল। কিন্তু শেষত বৈঠকৰ কাম-কাজত বাৰে বাৰে ব্যাঘাত জন্মাব পৰাৰ বাবে এই প্রস্তাৱ মানি লোৱা নহ’ল৷
