২২ গজৰ যুঁজত ভাৰত-পাকিস্তান মানেই ক্ৰিকেটপ্ৰেমীৰ মাজত শিহৰণ। কেৱল ভাৰত বা পাকিস্তানৰ ক্ৰিকেট অনুৰাগী বুলিয়েই নহয়, সমগ্ৰ ক্ৰিকেট বিশ্বতে ভাৰত-পাকিস্তান মেচৰ উন্মাদনা পৰিলক্ষিত হয়। আগন্তুক আইচিচি এদিনীয়া বিশ্বকাপতো গ্ৰুপ পৰ্যায়ত মুখামুখি হ’ব ভাৰত-পাকিস্তান।
আইচিচিৰ ঘোষিত সূচী অনুসৰি, ১৫ অক্টোবৰত আহমেদাবাদত অনুষ্ঠিত হ’ব লাগে ভাৰত পাকিস্তানৰ এই বহু প্ৰত্যাশিত মেচ। আগন্তুক এই মেচখনৰ প্ৰতি ইতিমধ্যেই উৎকণ্ঠা দেখিবলৈ পোৱা গৈছিল ক্ৰিকেট অনুৰাগীৰ মাজত। কিন্তু এতিয়া বিচিচিআই – এ এই মেচখনৰ দিনাংক পুনৰ নিৰ্ধাৰণৰ চিন্তা-চৰ্চা চলাইছে।
মূলত: উক্তি দিনাৰ পৰা আৰম্ভ হ’বলগীয়া নৱৰাত্ৰি উৎসৱৰ বাবেই মেচখনৰ তাৰিখ পুনৰ নিৰ্ধাৰণ কৰাৰ সম্ভাৱনা আছে বুলি জানিব পৰা গৈছে। গুজৰাটত নৱৰাত্ৰি উৎসৱৰ জনপ্ৰিয়তাৰ কথা বিবেচনা কৰি নিৰাপত্তা সংস্থাসমূহে উক্ত দিনা ভাৰত-পাকিস্তান মেচ আয়োজনৰ ক্ষেত্ৰত উদ্বেগ প্ৰকাশ কৰা বুলি জানিব পৰা গৈছে।
ইতিমধ্যে এই বহু প্ৰত্যাশিত হাই প্ৰফাইল মেচখনৰ টিকট বিক্ৰী হৈ যোৱাৰ পিছতো ভাৰতীয় ক্ৰিকেট নিয়ন্ত্ৰণ ব’ৰ্ড, চমুকৈ বিচিচিআই- এ মেচখনৰ তাৰখি পুনৰ নিৰ্ধাৰণৰ কৰিবলৈ চিন্তা কৰা বুলি বাতৰি প্ৰকাশ পাইছে। বিচিচিআইৰ এক সূত্ৰ অনুসৰি উক্ত মেচখন ১৫ অক্টোবৰৰ পৰিৱৰ্তে ১৪ অক্টোবৰত অনুষ্ঠিত হ’ব পাৰে।
উল্লেখ্য যে, ভাৰতে ৮ অক্টোবৰত চেন্নাইত অষ্ট্ৰেলিয়াৰ বিৰুদ্ধে বিশ্বকাপৰ অভিযান আৰম্ভ কৰিব। আনহাতে, ৬ অক্টোবৰত নেডাৰলেণ্ডৰ বিপক্ষে প্ৰথমখন মেচত অৱতীৰ্ণ হ’ব পাকিস্তান। ইয়াৰ পিছতে দলটোৱে পুনৰ ১২ অক্টোবৰত হায়দৰাবাদত শ্ৰীলংকাৰ বিৰুদ্ধে দ্বিতীয় মেচত ভাগ ল’ব।
এনে পৰিস্থিতিত ভাৰত-পাক মেচখন এদিন আগুৱাই দিলে পাকিস্তান কিছু অসুবিধাৰ সন্মুখীন হ’ব পাৰে। প্ৰতিপক্ষ ভাৰতৰ বিপক্ষে হাই প্ৰফাইল মেচখনৰ অনুশীলনৰ বাবে তেতিয়া পাকিস্তানে মাত্ৰ এদিনৰ সময়হে লাভ কৰিব। এই দিশটোও অৱশ্যে বিচিচিআই- ৰ বিবেচনাৰ আওতালৈ আহিব।
