প্ৰথমখন এদিনীয়া আন্তৰ্জাতিকত দুৰ্দান্ত জয়ৰ পিছত দ্বিতীয়খন মেচত পৰাস্ত হ’ল ৰোহিত-বিৰাট বিহীন টীম ইণ্ডিয়া। শনিবাৰে ব্ৰীজটাউনত হাৰ্দিক পাণ্ডিয়াৰ দলটোক ৬ উইকেটত পৰাস্ত কৰি শৃংখলা সমতা স্থাপন কৰে ৱেষ্ট ইণ্ডিজে। ৮০টা বল বাকী থকা অৱস্থাতে কেৰিবিয়ান দলটোৱে জয়লাভ কৰে।
প্ৰথমে বেটিং কৰি ভাৰতে ৪০.৫ অভাৰত ১৮১ ৰান সংগ্ৰহ কৰি অল আউট হয়। ৱেষ্ট ইণ্ডিজে নিৰ্দ্ধাৰিত লক্ষ্য অনুসৰণ কৰি ৩৬.৪ অভাৰতে ৪ টা উইকেট হেৰুৱাই বিজয় সাৱ্যস্ত কৰে। ছাই হোপে ৬৩ ৰানত অপৰাজিত হৈ থাকি দলটোক বিজয়ী কৰে। মেচৰ শ্ৰেষ্ঠ হিচাপেও বিবেচিত হয় ৱেষ্ট ইণ্ডিজৰ অধিনায়কগৰাকী।
লগতে পঢ়ক: গুৰুতৰভাৱে অসুস্থ পশ্চিমবংগৰ প্ৰাক্তন মুখ্যমন্ত্ৰী বুদ্ধদেৱ ভট্টাচাৰ্য; ৰখা হৈছে ভেন্টিলেচনত
হোপে কিচি কৰ্টীৰ সৈতে তেওঁৰ ৯১ ৰানৰ পঞ্চম উইকেটৰ পাৰ্টনাৰশ্বিপ আছিল মেচখনৰ টাৰ্নিং পইণ্ট। কিচিয়ে ৪৮ ৰানত অপৰাজিত হৈ থাকে। শ্বাৰ্দুল ঠাকুৰৰ বাহিৰে ভাৰতৰ বাকী বলাৰসকল বিফল হয়।
টছত জয়ী হৈ হোপে ভাৰতক বেট কৰিবলৈ পঠিয়ায়। মেচখনত ৰোহিত শৰ্মা, বিৰাট কোহলীক জিৰণি দিয়া হয়। ঈশান কিষাণ-শুভমান গিলৰ যুটিৰ আৰম্ভণি ভাল আছিল। অপেনিং যুটিটোৱে প্ৰথম উইকেটত ৯০ ৰান সংযোজন কৰে। ৪৯টা বলত ৩৪ ৰান কৰি আউট হয় গিল। ঈশানৰ পৰা আহে আৰু এটি অৰ্দ্ধশতক। ৬টা চাৰি আৰু ১টা ছয়ৰ সহায়ত ৫৫টা বলত ৫৫ ৰান সংগ্ৰহ কৰে ঈষানে। এদিনীয়া মেচত এইটো তেওঁৰ পঞ্চম অৰ্দ্ধশতক।
লগতে পঢ়ক: এতিয়াৰে পৰা হোৱাটছএপত প্ৰেৰণ কৰিব পাৰিব ভিডিঅ’ মেছেজ; কেনেদৰে কৰিব ব্যৱহাৰ?
ঈশান কিষানৰ আউটৰ লগে লগে আৰম্ভ হয় ভাৰতৰ বেটিং দুৰ্যোগ। মধ্যম ক্ৰমৰ সকলোৱে ফ্লপ হয়। সঞ্জু চেমচনে ৯, অক্ষৰ পেটেলে ১, হাৰ্দিক পাণ্ডিয়াই ৭ ৰান কৰে। সূৰ্যকুমাৰ যাদৱে অলপ চেষ্টা কৰিলেও ২৪ ৰানত আউট হয়। ভাৰতে মেচখনত বেটিং অৰ্ডাৰৰ ক্ষেত্ৰত অপ্ৰয়োজনীয়ভাৱে পৰীক্ষা-নিৰীক্ষা কৰিছিল। অক্ষৰক চাৰি নম্বৰলৈ পঠিয়াই সূৰ্য্যক ছয় নম্বৰলৈ নমাই অনা হয়। ভাৰতীয় বেটছমেনসকলে গোটেই ৫০ অভাৰেই খেলিব নোৱাৰিলে। ৪০.৫ অভাৰত ১৮১ ৰান সংগ্ৰহ কৰি অল আউট হয় দলটো।
ৱেষ্ট ইণ্ডিজে এই সোণালী সুযোগ নেহেৰুৱালে। ব্ৰেণ্ডন কিং, কাইল মেয়াৰ্ছে প্ৰথম উইকেটত ৫৩ ৰান সংযোজন কৰে। কিন্তু কম সময়ৰ ভিতৰতে ৪টা উইকেট হেৰুৱাই এটা সময়ত বিপদত পৰিছিল ৱেষ্ট ইণ্ডিজ। ছাই হোপে অধিনায়কৰ ইনিংছ খেলি দলটোক পুনৰ জয়ৰ পথলৈ আনে। ২টা চাৰি আৰু এটা ছয়ৰ সহায়ত ৮০টা বলত ৬৩ ৰান কৰি অপৰাজিত হৈ থাকে। কিচি কাৰ্তিয়ে তেওঁক যোগ্য সংগ দিয়ে। তেওঁ ৬৫টা বলত ৪৮ ৰান সংগ্ৰহ কৰে।
লগতে পঢ়ক: ভাৰতত বাঘৰ সংখ্যা ৩৬০০ অতিক্ৰম; ৭৮৫ টা বাঘৰ সংখ্যাৰে দেশৰ শীৰ্ষত মধ্যপ্ৰদেশ
ৱেষ্ট ইণ্ডিজে ৩৬.৪ অভাৰত নিৰ্দ্ধাৰিত লক্ষ্যত উপনীত হয়। শ্বাৰ্দুল ঠাকুৰে ৩টা উইকেট দখল কৰে।বাকী বলাৰ সকল বিফল হয়। বলিঙতো একাধিক পৰীক্ষা কৰিবলৈ গৈ ডুবিল ভাৰত। ৱেষ্ট ইণ্ডিজে শৃংখলাত সমতা স্থাপন কৰে। মঙলবাৰে অনুষ্ঠিত হ’ব এদিনীয়া শৃংখলাৰ অন্তিমখন খেল।
