শনিবাৰে প্ৰকাশ পোৱা ২০২২ চনৰ বাঘৰ লোকপিয়লৰ শেহতীয়া বিশ্লেষণ অনুসৰি বিশ্বৰ ৭৫% বাঘৰ সংখ্যা ভাৰতত আছে আৰু আনুমানিক ৩৬৮২ টা বাঘ বনত আছে। এই সংখ্যা এপ্ৰিল মাহৰ ৩,১৬৭ টাৰ হিচাপতকৈ যথেষ্ট বেছি পোৱা গৈছে।
উল্লেখ্য যে দেশৰ ভিতৰতে সৰ্বাধিক বাঘৰ সংখ্যা মধ্যপ্ৰদেশত। ২০১৮ চনত এই ৰাজ্যত বাঘৰ সংখ্যা আছিল ৫২৬টা। ২০২২ চনত ই ৭৮৫ লৈ বৃদ্ধি পায়। অৰ্থাৎ যোৱা চাৰি বছৰত ৰাজ্যত বাঘৰ সংখ্যা ২৫৯টা বৃদ্ধি পাইছে।
যোৱা চাৰি বছৰত মধ্যপ্ৰদেশত বাঘৰ সংখ্যা বৃদ্ধি পাইছে। মধ্যপ্ৰদেশৰ মুখ্যমন্ত্ৰী শিৱৰাজ সিং চৌহানে শনিবাৰে আন্তঃৰাষ্ট্ৰীয় ব্যঘ্ৰ দিৱসত টুইটযোগে এই মন্তব্য কৰে। কেন্দ্ৰীয় পৰিৱেশ আৰু বন্যপ্ৰাণী মন্ত্ৰী ভূপেন্দৰ যাদৱে এই সাফল্যৰ বাবে মধ্যপ্ৰদেশ চৰকাৰক অভিনন্দন জ্ঞাপন কৰে।
ভাৰতীয় সংৰক্ষণ আৰু বন্যপ্ৰাণী কৰ্তৃপক্ষই ‘ষ্টেটাছ অৱ টাইগাৰ: কো প্ৰিডেটৰ এণ্ড প্ৰে ইন ইণ্ডিয়া’ শীৰ্ষক এক প্ৰতিবেদন প্ৰকাশ কৰিছে। সেই প্রতিবেদন অনুসৰি মধ্য প্রদেশত দেশৰ ভিতৰতে সর্বাধিক বাঘৰ সংখ্যা পোৱা গৈছে৷ বাঘৰ সংখ্যা হিচাপত কৰ্ণাটক (৫৬৩) আৰু উত্তৰাখণ্ড (৫৬০) ক্ৰমে দ্বিতীয় আৰু তৃতীয় স্থানত আছে।
শিৱৰাজ সিং চৌহানে শনিবাৰে লিখিছে, ‘ৰাজ্যৰ জনসাধাৰণৰ লগতে বন বিভাগৰ সহায়ৰ বাবে মহান ফলাফল লাভ কৰা হৈছে। বৰ আনন্দৰ বিষয়। যোৱা চাৰি বছৰত ৰাজ্যত বাঘৰ সংখ্যা ৫২৬ৰ পৰা ৭৮৫লৈ বৃদ্ধি পাইছে।”
জানিব পৰা মতে, ২০০৬ চনত মধ্যপ্ৰদেশত বাঘৰ সংখ্যা আছিল ৩০০। তেতিয়াৰ পৰা মধ্যপ্ৰদেশত বাঘৰ সংখ্যা ক্ৰমাৎ বৃদ্ধি পাইছে। বৰ্তমান মধ্যপ্ৰদেশত সৰ্বাধিক বাঘ আছে যদিও ২০১৪ চনত বাঘৰ সংখ্যাৰ ক্ষেত্ৰত কৰ্ণাটক আগবাঢ়ি আছিল। ২০১৪ চনত কৰ্ণাটকত বাঘৰ সংখ্যা আছিল ৪০৬টা। মধ্যপ্ৰদেশত আছিল ৩০০। কিন্তু ২০১৮ চনত মধ্যপ্ৰদেশে এই ক্ষেত্ৰত কৰ্ণাটকক অতিক্ৰম কৰিছে।
দেশৰ ৫৩টা ব্যঘ্ৰ সংৰক্ষিত বনাঞ্চলৰ ভিতৰত উত্তৰাখণ্ডৰ কৰবেট টাইগাৰ ৰিজাৰ্ভত সৰ্বাধিক ২৬০টা বাঘৰ সংখ্যাৰ তথ্য পোৱা গৈছে, তাৰ পিছতে আছে কৰ্ণাটকৰ বান্দীপুৰ (১৫০) আৰু নগৰহোলে (১৪১), মধ্যপ্ৰদেশৰ বান্ধৱগড় (১৩৫), উত্তৰ প্ৰদেশৰ দুধৱা (১৩৫)।
গঁড়ৰ বাবে পৰিচিত বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানত ১০৪টা বাঘৰ তথ্য পোৱা গৈছে আৰু পশ্চিম বংগ আৰু বাংলাদেশত বিস্তৃত সুন্দৰবনত ১০০টা ঢেকীয়াপতীয়া বাঘৰ তথ্য পোৱা গৈছে।
