গা ধোৱাৰ সময়ত বা আন কাৰণতো আমাৰ কাণত পানী সোমালে আমি সাধাৰণতে কাণখন একাষৰীয়া কৰি মূৰ জোকাৰি সেয়া বাহিৰ কৰিব খোজো। পিছে আমি এনে কৰা যে প্ৰকৃততে উচিত নহয়, সেয়া আমি কেতিয়াবা ভাবিছো নে?
গৱেষকসকলৰ মতে, ইয়াৰ ফলত নষ্ট হৈ যাব পাৰে আমাৰ মগজু। তাৰ পৰিৱৰ্তে আপুনি কাণত অলপ সুৰা (alcohol) বা ভিনেগাৰৰ টোপাল দি সমাধান কৰিব পাৰে এই সমস্যা।
এয়া আমি কোৱা কথা নহয়, গৱেষকে আগবঢ়াইছে এই দিহা। এই গৱেষণা আমেৰিকাৰ প্ৰখ্যাত কৰ্নেল ইউনিভাৰ্ছিটি আৰু ভাৰ্জিনিয়া টেকৰ। মগজু সুৰক্ষাত মদ বা ভিনেগাৰ কিদৰে সম্ভৱ!
কাৰণ, মদ বা ভিনেগাৰৰ পৃষ্ঠটান (surface tension) পানীতকৈ কম। গৱেষকৰ মতে, পৃষ্ঠটানৰ বাবে পানীখিনি কাণৰ পৰা ওলাই আহিব নোখোজে।
পৃষ্ঠটান কি? ধৰক, গিলাচ এটাত আপুনি উপচি যোৱাকৈ পানী ৰাখিছে। দেখিব, গিলাচৰ পৃষ্ঠভাগতকৈ সামান্য ওপৰলৈকে পানী ভৰালেও এটা নিৰ্দিষ্ট পৰিমাণলৈকে পানীখিনি বাগৰি নপৰাকৈ থাকে।
পানীখিনি স্ফীত, টান খাই থকাৰ দৰে থাকে, কিন্তু এটা নিৰ্দিষ্ট মাত্ৰালৈকে সি বাগৰি নপৰাকৈ থাকিব খোজে— সেয়া পৃষ্ঠটানৰ ফল। পানীৰ উপৰিভাগৰ কণাসমূহ (particles)ৰ আকৰ্ষণৰ ফলত এই পৃষ্ঠটানৰ সৃষ্টি হয়।
মদ, ভিনেগাৰৰ দৰে কম পৃষ্ঠটানৰ জুলীয়া পদাৰ্থই পানীৰ পৃষ্ঠটান ভাঙি দিয়াৰ ফলত পানীখিনি কাণৰ পৰা সহজে ওলাই আহে আৰু আপুনি মূৰ জোকাৰিব নালাগে।
গৱেষকসকলৰ মতে, কাণত সোমোৱা পানী উলিয়াবলৈ জোকাৰাৰ তীব্ৰতাই মগজু নষ্ট কৰিব পাৰে আৰু লগতে মুকলি কৰিব পাৰে সংক্ৰমণৰ বাট।
মুখগহ্বৰ বা কাণৰ দৰে মগজুৰ সৈতে লাগি থকা যিকোনো অংশতে সংক্ৰমণ অত্যন্ত বিপজ্জনক আৰু সি চিধা আৰু সহজে মগজুলৈ বিয়পিব পাৰে। গৱেষক সকলৰ মতে, শিশুৰ ক্ষেত্ৰত মগজু নষ্ট হোৱাৰ সম্ভাৱনা প্ৰাপ্তবয়স্কতকৈ বহুত বেছি। কাৰণ, শিশুৰ কাণৰ পথ সৰু।
তেওঁলোকে কৰা পৰীক্ষা মতে, শিশুৰ কাণৰ পৰা পানী উলিয়াবলৈ প্ৰয়োজন হোৱা জোকাৰণি পৃথিৱীৰ মাধ্যাকৰ্ষণ শক্তিতকৈ ১০গুণ বেছি।
২০১৯ চনৰ ২৩ নৱেম্বৰত আমেৰিকাৰ চিয়াতলত আমেৰিকান ফিজিকেল চ’চাইটিৰ এক বাৰ্ষিক সভাত এই গৱেষণা প্ৰতিবেদন দাখিল কৰা হৈছিল। গৱেষণাটোত ভাৰতীয় মূলৰ বিজ্ঞানী অনুজ বাকচ’তাও জড়িত আছিল।
