দেশৰ বিৰোধী দলসমূহে প্ৰধানমন্ত্ৰী নৰেন্দ্ৰ মোডী নেতৃত্বাধীন বিজেপি চৰকাৰক ক্ষমতাৰ পৰা উৎখাত কৰিবলৈ বদ্ধপৰিকৰ হৈছে। সেই উদ্দেশ্যে বিৰোধী মিত্ৰতা গঠন কৰা হৈছে। কংগ্ৰেছ, তৃণমূল, এন চি পি, শিৱসেনা (উদ্ধৱ), আৰ জে ডি, জে ডি ইউ, সমাজবাদী পাৰ্টি, চি পি এমকে ধৰি প্ৰায় ২৬ টা দল সেই মিত্ৰতাত আছে।
যোৱা মাহত বাংগালুৰুত অনুষ্ঠিত এখন বৈঠকত এই মিত্ৰজোঁটৰ নাম INDIA অৰ্থাৎ Indian National Developmental Inclusive Alliance নামেৰে নামকৰণ কৰা হৈছিল।
এই নামকৰণত অতিষ্ঠ হৈ এই নামৰ বিৰুদ্ধে দেশৰ সৰ্বোচ্চ আদালতত জনস্বাৰ্থৰ গোচৰ ৰুজু হৈছিল। কিন্তু উচ্চতম ন্যায়ালয়ে এই গোচৰ খাৰিজ কৰে। বিৰোধী দল সমূহে প্ৰচাৰ আৰু বিজ্ঞাপনৰ বাবে INDIA নামটো ব্যৱহাৰ কৰা বুলি অভিযোগ কৰি উচ্চতম ন্যায়ালয়ত ৰাজহুৱা লেখা আবেদন দাখিল কৰা হৈছিল।
শুকুৰবাৰে উচ্চতম ন্যায়ালয়ৰ ন্যায়াধীশ সঞ্জয় কিষাণ কৌল আৰু ন্যাধীশ সুধাংশু ঢুলীয়াৰে গঠিত বিচাৰপীঠে পৰ্যবেক্ষণ কৰে যে এই আবেদন প্ৰচাৰৰ বাবে দাখিল কৰা হৈছে।মনোৰঞ্জনৰ বাবে দাখিল কৰা লেখ আবেদন বুলি অভিহিত কৰি এই লেখ আবেদন গ্ৰহণ কৰিবলৈ অস্বীকাৰ কৰে।
ইয়াৰ বিৰুদ্ধে যুক্তি দি লেখ আবেদনকাৰীৰ হৈ অধিবক্তা ধাৱাল ইউনিয়ালে কয় যে ২০২৪ চনৰ সাধাৰণ নিৰ্বাচনৰ বাবে এন ডি এ বনাম INDIA”, “PM Modi vs INDIA”, “BJP, can you challenge INDIA আদি বিভিন্ন শ্লোগান প্ৰচাৰ কৰিছে। এনেধৰণৰ শ্লোগানে প্ৰত্যক্ষ বা পৰোক্ষভাৱে আমাৰ জাতিৰ ঐক্য, মৰ্যাদা আৰু আমাৰ জাতিৰ অখণ্ডতাক কলংকিত কৰি তুলিছে। বিৰোধীয়ে কেৱল ক্ষমতা লাভৰ বাবে দেশখনৰ নাম অপব্যৱহাৰ কৰিছে।’’
ইয়াৰ উত্তৰত ন্যায়ালয়ৰ বিচাৰপীঠে লেখ আবেদনকাৰী অধিবক্তা ধাৱাল ইউনিয়াক এই সম্পৰ্কে উচ্চতম ন্যায়ালয়ৰ কাষ চপাৰ সলনি নিৰ্বাচনী আয়োগৰ কাষ চাপিবলৈ কয়। লগতে বিচাৰপীঠে এই লেখ আবেদন প্ৰচাৰৰ বাবে ব্যৱহাৰ কৰা বুলিও কটুক্তি কৰে অধিবক্তাগৰাকীক।
উল্লেখ্য যে, প্ৰধানমন্ত্ৰী নৰেন্দ্ৰ মোদীয়ে লোকসভাত ভাষণ দি বিৰোধী মিত্ৰজোঁটৰ এই নামক লৈ ঠাট্টা-মস্কৰা কৰিছিল। তেওঁ কয়, ‘বিৰোধীৰ এই মিত্ৰতাই ভাৰতক বিভাজিত কৰিছে।
