শনিবাৰে পুৱা বজালী জিলাৰ বিছান্নালা নদীৰ পাৰৰ সমীপত পুতি থোৱা অৱস্থাত উদ্ধাৰ হয় এগৰাকী ১১ দিনীয়া কন্যা শিশু।
জিলাখনৰ ডুবি মালিপাৰা অঞ্চলত সংঘটিত হয় এই ঘটনা।
সূত্ৰ অনুসৰি শিশুটিৰ পিতৃয়ে নগদ ৪ লাখ টকাত শিশুটিক বিক্ৰী কৰাৰ চেষ্টা চলাইছিল যদিও পৰিয়ালৰ লোকৰ হস্তক্ষেপত তেওঁৰ কু-অভিপ্ৰায় ব্যৰ্থ হয়।
জানিব পৰা মতে, শিশুটিক বিক্ৰী কৰাৰ অভিসন্ধি বিফল হোৱাৰ পিছত পিতৃ নিৰঞ্জন মালাকাৰে সন্তানটি হত্যা কৰি সমাধিস্থ কৰাৰ সিদ্ধান্ত লোৱা বুলি অভিযোগ উঠিছে। বৰ্তমান পলাতক অৱস্থাত আছে নিৰঞ্জন।
ইফালে দণ্ডাধীশৰ উপস্থিতিত বজালী আৰক্ষীয়ে অপৰাধ সংঘটিত হোৱা স্থানত উপস্থিত হৈ মৃত শিশুটি উদ্ধাৰ কৰে। নিৰঞ্জনৰ ঘৰৰ পৰা প্ৰায় এক কিলোমিটাৰ দূৰত্বত থকা বিছান্নালা নদীৰ পাৰত সমাধিস্থ কৰা হৈছিল শিশুটিৰ মৃতদেহ।
খবৰ অনুসৰি, গোচৰৰ সৈতে জড়িত দুজন ব্যক্তিক সোধা-পোছাৰ বাবে আটক কৰিছে আৰক্ষীয়ে।
আচৰিত হ’বলগীয়া কথাটো হ’ল এই ঘটনাৰ লগত পাঠশালাৰ এজন জ্যেষ্ঠ চিকিৎসক নামো সাঙোৰ খাই পৰিছে।
সংবাদ মাধ্যমৰ সৈতে হোৱা কথা-বতৰাত অভিযুক্ত নিৰঞ্জন মালাকাৰৰ ভাতৃয়ে কয়, ‘আজি পুৱা ৫.৩০ বজাৰ পৰা ৬ বজাৰ ভিতৰত নিৰঞ্জনে ফোন কৰি আমাক জনাইছিল যে তেওঁৰ নৱজাত কন্যাৰ মৃত্যু হৈছে। ফলস্বৰূপে আমি ইয়াত উপস্থিত হ’লোঁ, কিন্তু উপস্থিত হৈ নিৰঞ্জন নিৰুদ্দেশ বুলি জানিব পাৰোঁ।
পৰিয়ালৰ লোকৰ অভিযোগ মতে, নিৰঞ্জনৰ ভনী জোৱায়েকে চিকিৎসকৰ সহায়ত নৱজাতকটি বিক্ৰী কৰাৰ প্ৰয়াস কৰিছিল।
