অহা বছৰ উত্তৰ প্ৰদেশৰ বিধানসভা নিৰ্বাচন। তৎপৰ হৈ উঠিছে কংগ্ৰেছ। প্ৰাদেশিক সংগঠনত ডাঙৰ আৰু আচৰিত ধৰণৰ সালসলনি কৰিছে কংগ্ৰেছে। অজয় ৰায়ক দলৰ উত্তৰ প্ৰদেশৰ ৰাজ্যিক সভাপতি পদৰ পৰা অপসাৰণ কৰা হৈছে। তেওঁৰ ঠাইত প্ৰতাপগড়ৰ ৰামপুৰ খাছ সমষ্টিৰ বিধায়িকা তথা এগৰাকী প্ৰবীণ নেত্ৰী আৰাধনা মিশ্ৰ ‘মোনা’ক মুৰব্বী হিচাপে নিযুক্তি দিয়া হৈছে।
আনহাতে, নিৰ্বাচনমুখী পঞ্জাৱতো দলৰ সভাপতি সলনি কৰা হৈছে। খৰ্গে আৰু ৰাহুল গান্ধীয়ে এজন জাট শিখ নেতাৰ সলনি আন এজন জাট শিখ নেতাক বাছি লৈছে। এই ৰাজ্যৰ নতুন কংগ্ৰেছ সভাপতি হৈছে জলন্ধৰ কেন্টনমেন্টৰ দীৰ্ঘদিনীয়া বিধায়ক তথা হকী কিংবদন্তি পাৰ্গত সিং।
কংগ্ৰেছৰ এই পদক্ষেপ দুয়োখন ৰাজ্যতে অতি কৌশলগত বুলি বিবেচিত হৈছে। উত্তৰ প্ৰদেশত কংগ্ৰেছে আৰাধনা মিশ্ৰ ‘মোনা’ক দলৰ সভানেত্ৰী কৰি ৰাজ্যৰ মহিলা আৰু ব্ৰাহ্মণ ভোটাৰক আকৰ্ষণ কৰিবলৈ চেষ্টা চলাইছে।
কংগ্ৰেছৰ জ্যেষ্ঠ নেতা তথা ৰাজ্যসভাৰ সাংসদ প্ৰমোদ তিৱাৰীৰ কন্যা আৰাধনা মিশ্ৰ বিধানসভাত দলৰ বলিষ্ঠ কণ্ঠ। ৰাজনৈতিক বিশ্লেষকসকলৰ মতে সমাজবাদী পাৰ্টিৰ সৈতে মিত্ৰতা আৰু আগন্তুক ২০২৭ চনৰ নিৰ্বাচনৰ প্ৰতি লক্ষ্য ৰাখি শতিকা পুৰণি দলটোৱে এই যুগান্তকাৰী পৰিৱৰ্তন সাধন কৰিছে।
আনহাতে, পঞ্জাৱত কংগ্ৰেছৰ ভিতৰৰ আভ্যন্তৰীণ সংঘাত তুংগত। অস্বস্তিকৰ অৱস্থা হাই কমাণ্ডৰ। যোৱা মাহত ৰাহুল গান্ধীয়ে ৰাজ্যখনৰ দায়িত্বত থকা কেন্দ্ৰীয় নেতাক সলনি কৰিছিল। ভূপেশ বাঘেলৰ ঠাইত শচীন পাইলট নিযুক্তি দিয়া হৈছিল।
ৰাজা ওৱাৰিং আৰু প্ৰাক্তন মুখ্যমন্ত্ৰী চৰণজিৎ সিং চান্নীৰ নেতৃত্বত চলি থকা গোটটোৰ সংঘাতত বাঘেলে এটা পক্ষৰ প্ৰতি পক্ষপাতিত্ব কৰাৰ অভিযোগ উত্থাপন হৈছিল। তাৰ পাছত দলৰ ভিতৰত ‘নিৰপেক্ষ’ হিচাপে পৰিচিত পাৰ্গত সিঙক ৰাজ্যিক সংগঠনৰ দায়িত্ব দিয়া হ’ল।
মন কৰিবলগীয়া যে ১০ বছৰ পূৰ্বে কংগ্ৰেছত যোগদান কৰাৰ পূৰ্বে পাৰ্গত সিং শিৰোমণি আকালি দলৰ সৈতে জড়িত আছিল। এই পদৰ বাবে জাট শিখ সম্প্ৰদায়ৰ আন কেইবাজনো নেতাৰ নামো চৰ্চাত আছিল, তাৰ ভিতৰত আছিল প্ৰাক্তন উপ-মুখ্যমন্ত্ৰী সুখজিন্দৰ সিং ৰান্ধাৱা, ৰানা কে পি সিং আৰু সুখৱিন্দৰ সিং সৰকাৰিয়া। অৱশ্যে পাৰ্গতে সকলোকে পিছ পেলাই নেতৃত্ব পালে।
